Россиялик боксчи Александр Поветкиннинг канадалик Бермейн Стивернга қарши жанги олдидан топширган допинг намунасида тақиқланган модда аниқланди. Бу ҳақда Бутунжаҳон бокс кенгаши (WBC) раҳбари Маурисио Сулейман Twitter’даги саҳифаси орқали маълум қилди, деб хабар бермоқда «Спорт-Экспресс».
Хабарда қайд этилишича, Поветкиннинг Ихтиёрий допинг-тест топшириш ассоциацияси (VADA) томонидан олинган намунасида остарин моддаси топилди. Поветкин ва Стиверн жанги 17 декабрь куни Екатеринбург шаҳрида ўтказилиши керак эди. Бўлажак жанг бўлиб ўтиш-ўтмаслиги сўроқ остида қолмоқда.
Қайд этиш жоиз, 37 ёшли россиялик боксчида аввал ҳам допинг чиққанди. 21 май куни Поветкин АҚШлик Деонтей Уайлдерга қарши жанг қилиши керак эди. Бироқ россиялик боксчининг организмида мельдоний қолдиқлари аниқлангани учун жанг номаълум муддатга қолдирилди. WBC Поветкинга нисбатан тергов иши давом этгунига қадар Деонтей Уалдерга ўз титулини ихтиёрий равишда ҳимоя қилиш ҳуқуқини берди. Аввалроқ россиялик боксчининг «B» допинг намунасида 72 нанограмм, «А» намунасида 70 нанограмм мельдоний борлиги аниқланган эди.
Уайлдер томони жанг бекор қилингани учун Поветкин ва «Мир бокса» промоутерлик компаниясини судга бергани ва камида 5 миллион доллар миқдорида товон пулини қўлга киритишни истаётгани ҳақида хабар берилганди.
Кейинроқ «Мир бокса» промоутерлик компанияси раҳбари Андрей Рябинский америкалик боксчининг томони Поветкинни допинг қабул қилганликда оммавий рашивда айблагани учун судга мурожаат қилиб, Деонтей Уайлдердан 34,5 миллион доллар талаб қилгани маълум қилинган эди.
Шунингдек, шу йилнинг ноябрь ойида Бермейн Стиверн допинг намунасида ҳам тақиқланган препарат – метилгексанамин аниқланганди. Лекин канадалик боксчи 75 минг доллар жарима билан чекланди ва мазкур модда унинг организмига энергетик ичимлик орқали кирганини айтди.
Матнда хатолик топсангиз, ўша хатони белгилаб, бизга жўнатинг (Ctrl + Enter).