Игорь Шквирин «Олмалиқ»дан кетди. Энг аввало, «нима учун?» деган савол пайдо бўлиши турган гап. Клуб олий лигада 2008 йилдан буён ўйнай бошлаган ва шу вақт ичида қайд этилган натижаларга қарасак, ростдан ҳам мураббий нима учун истеъфога чиқарилгани кишини таажжубга солади. Тўғри, «Олмалиқ» ўтган йил элитада 13-ўринда қолди ва охирги 8 йилдаги энг ёмон натижасини қайд этди. Аммо олмалиқликлар шу вақтга қадар юқори поғоналарга даъво қилиб келганмидики, бунинг учун мураббий истеъфога чиқарилса?
«Олмалиқ» 2008 йилда 10, 2010 ва 2011 йилларда эса 11-ўринни эгаллаган. Ўша вақтларда нима учундир мураббийни ишдан бўшатишга ҳеч ким шошилмаган. Бундан эса шундай хулоса чиқарса бўладики, Шквириннинг истеъфосига натижанинг у қадар алоқаси йўқ. Тўғри-да, 11-поғонада қолдинг нима-ю, 13-ўринга тушдинг нима, фарқ катта эмас-ку. Олий лигадан тушиб кетмаса бўлгани, барибир, кучли учликка даъво қилмагандан кейин қайси ўринни олишининг нима аҳамияти бор? Шундай эмасми?
Боз устига, «Олмалиқ» мавсум давомида бирор марта қуйи ўринларга яқин келгани йўқ. Тўғри, истеъфога яна бир сабаб бўлиши мумкин - жамоанинг ўйин услуби раҳбариятга ёқмагандир. Аммо бу тахминни ҳам тезда бир четга суришга тўғри келади. Чунки «Олмалиқ» саккиз йилдан буён қандай ўйнаб келган бўлса, бу йил ҳам катта ўзгариш кузатилмади. Шундай экан, Игорь Шквириннинг истеъфосида ўйин услубининг айби катта эмас. Демак, бошқа сабаб бор.
Ўйлай-ўйлай, ниҳоят, саккиз йил давомида жамоани бошқариб келган мураббийнинг ишдан кетишига сабаб топгандек бўлдик. Афтидан, «Олмалиқ» раҳбарияти жамоани янги босқичга олиб чиқишга қарор қилган кўринади. Шквирин клубни бошқарган вақт давомида бирор марта кучли учликка кира олмади. Энг яхши натижа эса 2009 йилда қўлга киритилган - 4-ўрин. Бироқ шунда ҳам медаллар учун даъвогарлик қилмаган, мавсум охирида учинчи ўриндаги «Насаф» билан орадаги фарқ 7 очкони ташкил этарди. Бўлди, бори шу. Қолган мавсумларда жамоа пастроқ ўринларни эгаллаган.
Шквирин давридаги «Олмалиқ» буткул ўртамиёна жамоа эди, бир марта беш (2013 йил) ва икки марта олтинчи ўрин (2014 ва 2015 йиллар) қўлга киритилган. Бироқ ҳеч қачон яққол аутсайдер бўлмаган. Бу йил 13-поғонада қолиб кетгани билан янаги йил яна беш ёки олтинчи ўринга қайтиши ҳеч гап эмас эди. Бунақаси аввал ҳам бўлган. Шквиринга қўйиб беришганда яна ўша олтиликка қайтишни уддаларди. Ишонамиз. Аммо кўриб турганингиздек, у истеъфога чиқарилди. Демак, клуб раҳбариятининг ўйлаб қўйган бошқа режаси бор.
«Олмалиқ» Шквирин билан барқарор ўртамиёна клуб бўлиб қолиши мумкиндир, бироқ чемпионликка даъво қиладиган ва ҳатто, кучли учликка кира оладиган жамоа яратиш унинг қўлидан келмади. Бундан кейин ҳам ўзгариш бўлишига ишониш қийин. Агар мураббийнинг «Олмалиқ»дан кетиши сабаби шу бўлса, клуб раҳбариятининг қарорини тўғри тушунамиз. Энди янги бош мураббий ҳақида гаплашсак.
Келаси мавсумдан эътиборан «Олмалиқ»ни Виктор Кумиков бошқаради. Асли келиб чиқиши россиялик бўлган бу мутахассисни ўзбек футболи мухлислари яхши танишади. У 2006 йили «Машъал»ни Ўзбекистон кубоги финалига олиб чиққан, 2009 ва 2010 йилларда эса «Насаф» билан олий лигада бронза медалларини қўлга киритган. Аммо мураббийнинг Ўзбекистондан кўра Қозоғистон чемпионатида қўлга киритган ютуқлари анча салмоқли. Кумиков 2011 йилдан то 2014 йилга қадар Қарағанданинг «Шахтёр» клубини бошқариб, икки марта чемпионликка эришди. Шунингдек, мамлакат кубоги ва суперкубогида ҳам муваффақият қозонди. Қозоғистон клублари орасида биринчилардан бўлиб еврокубокларда иштирок этди. Ўз навбатида, унинг ютуқлари муносиб тақдирланди. Кумиков уч марта - 2011, 2012 ва 2013 йилларда Қозоғистонда «Йил мураббийи» сифатида тан олинган.
Мана, энди у «Олмалиқ»ни бошқаради. Юқорида Игорь Шквирин ҳамда Виктор Кумиковни ўзаро таққосладик ва очиғини тан олиш лозим, россиялик мутахассис устунроқ эканини ҳаммамиз тушуниб турибмиз. Фақат бир истисно - бу устунликни ҳали исботлаш лозим бўлади. Тўғри, «Олмалиқ» анча тажрибали мураббийга эга бўлди. Аммо бу тайинлов қай даражада самара келтиришини янги мавсумда кўриб оламиз. Кутганларимиз эса - «Олмалиқ» чемпионликка даъвогар клублар сафига ўтсин ва Осиё Чемпионлар Лигасида иштирок этсин. Олдиндан айтамиз, буни амалга ошириш анча қийин бўлади. Зеро, Қозоғистонда «Шахтёр» билан икки эмас, тўрт марта чемпионликка эришиш мумкин, бироқ олий лигада «Локомотив», «Бунёдкор», «Насаф» ва «Пахтакор»нинг орасига кириш осон эмас. Бу ёқда «Бухоро» билан «Қизилқум» ҳам қўл қовуштириб турмаслиги та- йин.
Биз чемпионлик ҳақида гапирмаяпмиз, кучли учликка ҳам розимиз. Акс ҳолда, Игорь Шквиринни истеъфога чиқариш шарт эмасди. «Олмалиқ» шундоқ ҳам барқарор ўртамиёналар сафига кирарди (охирги мавсум ҳисоб эмас). Хориждан мураббий олиб келинибдими, демак энди марҳамат қилиб, медаллар учун курашсин...
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
