«Пахтакор» жамоасидаги бир неча йиллик иштироки билан мухлислар назарига тушган ҳужумкор ярим ҳимоячи Алишер Азизов ҳам легионерга айланди. У куни кеча Қирғизистоннинг бир неча карра чемпиони - «Дордой» клуби билан шартнома имзолади. Икки томон ўртасидаги келишув бир йилга мўлжалланган. Агар ҳаммаси ижобий давом этса, битим муддатини узайтириш ҳам мумкин. Сўнгги икки мавсумни «Обод»да ўтказган футболчи ўз голлари билан клубнинг олий лигага чиқишига катта ҳисса қўшганди. Азизов 2015 йилда Ўзбекистон биринчи лигаси тўпурарига айланганди. Ҳозирда ярим ҳимоячи янги жамоаси билан Туркия йиғинида иштирок этяпти. Биз Алишер Азизов билан боғланиб, ундан интервью олдик.
- Алишер, Қирғизистон клуби варианти қай тарзда пайдо бўлди?
- Ҳаммаси кутилмаганда рўй берди, десам янглишмайман. «Дордой» мураббийлари агентлардан ҳужумчиларни тавсия қилишларини сўрашган. Агентлар эса 3-4 нафар футболчининг ўйинлари ёзилган дискларни уларга етказишган. Мутахассислар дискларни кўриб чиққач, менинг вариантимда тўхташибди. Кейин расман мурожаат қилишгач, таклифни кўриб чиқиб, унга розилик бердим.
- «Дордой» клубида сизни ўзига қаратган асосий жиҳат нима бўлди?
- Бу клубнинг қитъада нуфузи жиҳатидан ОЧЛдан сўнг иккинчи ўринда турувчи ОФК кубогида иштирок этиши шартнома имзолашимда асосий омил бўлиб хизмат қилди. Қолаверса, «Дордой» Қирғизистоннинг энг совриндор жамоаси ҳисобланади, доимо ўз олдига юксак вазифаларни қўяди. Бу йил ҳам жамоа мамлакат чемпиони бўлиш ҳамда кубокни қўлга киритишни мақсад қилган. ОФК кубогида ҳам имкон қадар узоқроққа боришимиз шарт. Яна шуни ҳам айтишим керак, «Дордой»даги муваффақиятли иштироким билан терма жамоадан чақирув олишни мақсад қилганман.
- Янги жамоангиз билан яқиндан танишишга улгурдингизми?
- Танишиб олдим. Бу клубда шароитлар жуда ҳам яхши экан. Менга ҳар томонлама маъқул келди. Таркибдаги деярли барча футболчилар Қирғизистон миллий ва ёшлар терма жамоаси аъзолари. Жуда истеъдодли ўйинчилар жам бўлишган. Жамоада мендан ташқари яна уч легионер бор. Уларнинг икки нафари Ганадан, яна бири Россиядан. Мақтаняпти деманг-у, лекин шароитлари ҳавас қиладиган даражада экан. Балки, «Дордой» Қирғизистоннинг энг яхши клуби бўлгани учун ҳам шундайдир.
- Жамоа бош мураббийи билан гаплашиб олдингизми? Бу мутахассис ҳақидаги илк таассуротингиз қандай?
- Ҳа, суҳбатлашдик. Анчагина талабчан ва қаттиққўл мутахассис экан. Бу йил ўзимиз қатнашадиган барча турнирларда биринчи бўлишимиз кераклигини айтди. Шунингдек, ганалик ҳужумчи билан ўзаро тушуниб ўйнашим лозимлигини уқтирди. Мураббийимиз Руслан Сиддиқов Қирғизистон футболида катта обрў-эътиборга эга. Айтишим мумкинки, у киши бизга қўшни мамлакатнинг Миржалол Қосимови экан.
- «Дордой» савиясини олий лигамизнинг қайси клублари билан тенглаштира оласиз?
- Агар «Дордой» олий лигамизда иштирок этса, бемалол 7-12-ўринларни эгаллайди. Биздаги айнан мана шу поғонадаги жамоалар билан таққослаган бўлардим. Яратилган шароитлар бўйича элитамизнинг гранд клублари билан баҳслаша олади.
- Клуб стадиони ва базасида бўлдингизми?
- Ҳа. Бишкекдаги йиғинимиз чоғида базада яшадим. Стадион ва база бир жойда жойлашган экан. «Дордой» халқаро ўйинларни терма жамоага тегишли стадионда ўтказади.
- Алишер, икки йил мобайнида «Обод»да ўйнадингиз. Адашмасак, ҳали клуб билан шартномангиз бор эди. Тошкент жамоаси раҳбарлари осонликча қўйиб юборишдими?
- Худди шундай. Клуб мутасаддиларига миннатдорчилик билдираман. Мени тўғри тушуниб, «Дордой»га кетишимга қаршилик кўрсатишмади. Яна икки йиллик шартномам бўлишига қарамай, менга янги клубимда омад тилашди. Яхши кайфият, очиқ юз билан хайрлашдик.
- Қайси рақамни танладингиз?
- «Пахтакор»да мен учун севимли бўлиб қолган 23-рақамни танладим.
- Қайси позицияда ўйнаяпсиз?
- Баъзида ҳужумга қўйишяпти. Айрим ўйинларда ҳужумчи ортида ўйнаяпман.
- «Пахтакор»дан кейин фаолиятингизда бироз пасайиш кузатилди. Бу ҳолатни таҳлил қилиб кўрдингизми?
- Албатта, таҳлил қилганман. Шундай бўлишига ўзим сабабчиман. Бу борада ҳеч кимни айбламайман. Жароҳат сабаб сафдан чиқдим. Қайтганимда захирада ўтириб қолдим. Нимагадир фақат керак бўлмаган пайтда жароҳат оламан. Бунинг натижасида ўз жойимни бой бериб қўяман.
- Қирғизистонда легионерларга тахминан қанча маош тўлашади? Бу ердан кетиб ўйнашга арзийдими?
- «Дордой» мисолида айтсам, маош қониқтирди. Тўғриси, бошқа клубларни билмайман.
- Демак, биздан кўпроқ, шундайми?
- Йўқ. Улар маош борасида гранд жамоаларимизга тенглаша олишмайди. Лекин ўртамиёна клубларимиздан кўра яхшироқ.
- Қирғизистон чемпионати қачон бошланади?
- Худди бизда бўлгани каби 4 март куни старт олар экан. 4-5 март кунлари 1-тур учрашувлари ўтказилади. Олий лигада 8та жамоа иштирок этади. Ўйинлар 4та даврада ташкил этилади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
