ЖЧ-2018 саралаш баҳсларининг ўта аҳамиятли иккита ўйини олдидан Ўзбекистон миллий жамоаси мураббийлар штабида ўзгариш рўй берди.
Бир қарашда, бу янгиликни анчадан буён кутаётгандик, десак тўғри бўлса керак. Айниқса, ушбу мутахассиснинг хорижлик экани кўпчиликнинг эътиборини тортди.
Хуллас, эндиликда термамизда жисмоний тайёргарлик билан Чима Мишел Онеке шуғулланади.
Ушбу мураббийнинг таъриф-у тавсифи Ўзбекистон футбол федерацияси расмий сайтида етарлича келтирилди. Онеке - Нигерия терма жамоаси собиқ футболчиси бўлиб, ўз вақтида Россиянинг «Анжи» клубида Гус Хиддинкка ёрдам берган. Аниқроғи, доғистонлик футболчиларнинг жисмоний тайёргарлигига масъул бўлган. Айнан шу иш 42 ёшли мураббийнинг фаолиятида энг таниқли давр ҳисобланади. Бундан ташқари, «Штутгарт» ва ПАОКда фитнесс-мураббий сифатида фаолият олиб борганини ҳам алоҳида таъкидлаб ўтиш жоиз. Чима Мишел Онеке ҳақида билишимиз лозим бўлган асосий маълумотлар шулардан иборат.
Албатта, шундай тажрибали мутахассиснинг Ўзбекистон бош жамоасида иш бошлагани ўз мевасини бермай қолмайди. Аммо масаланинг бош-қа томони ҳам бор. Онекега бўлган барча ҳурматни сақлаган ҳолда бир саволни ўртага ташласак - ўта муҳим учрашувлар ўтказилишига оз муддат қолган бир паллада, боз устига, термамиз таркиби йиғинларда бошқа, расмий учрашувларда эса умуман ўзгача кўриниш олишини инобатга олсак, бу мураббий жисмоний тайёргарлик бўйича сезиларли ўзгаришга қўл ура олармикан?
Мисол учун, бош жамоамизнинг Туркия сафарига асосан олий лигадаги футболчилар олиб кетилди. Мазкур йиғин жараёнида ички чемпионат вакилларининг Онекедан ниманидир ўрганишганига шубҳа йўқ. Аммо бу Хитой ва Жанубий Корея термаларига қарши баҳсларда шу ўйинчиларнинг аксарияти майдон четида қолади-ку. Майли, Чима Мишелнинг салоҳиятидан тўғри фойдалана билсак, бу нарса келгусида бизга асқотиши та-йин. Асосийси, футболчиларимиз тажриба тўплашади, жисмоний имкониятларида ўсиш кузатилади. Ва албатта, хорижлик мутахассиснинг меҳнатлари самара бериб, мундиал сари йўлимиз муваффақиятли якунланишидан умидвормиз. Бир сўз билан айтганда, мазкур тайинлов футболимизга фойда келтирсин.
Аслида, термамизга хорижлик мутахассис жалб этиш зарурати ҳақида сўнгги пайтларда кўп гапирилаётганди. Хусусан, ЎФФ раҳбарияти ҳам бу ишга жиддий киришиши натижасида мураббийлар штабида сербиялик Деян Журжевич иш бошлади. Аммо бу мутахассиснинг бугунги кунгача бўлган фаолияти нечоғли самара келтиргани фақат миллий жамоамиз мураббийларигагина аён. Зеро Ўзбекистон термаси ўйнаётган паллада Журжевич рақиблар ўйинини кузатиш учун сафарга жўнаган бўлади. Унинг қандай маълумотлар билан қайтгани эса, одатда, ошкор этилмайди.
Сербиялик мураббийдан фарқли равишда Онекенинг иши майдонда яққол кўринади. Яъни, агар у ҳақиқатан футболчиларнинг жисмоний тайёргарлигига ижобий таъсир ўтказа олса, вакилларимизда лат ейиш хавфи камаяди, чарчоқ аломатлари бартараф этилади ёки ўйинчиларнинг тикланиш жараёни тезлашади.
Яхши биламиз, терма жамоа ихтиёрида футболчилар нари борса 10-15 кун бўлишади. Йирик мусобақалар ўтказилган тақдирда бу муддат икки баробар ортиши мумкин. Демак, шу вақт ичида фитнесс-мураббий зиммасига жисмоний тайёргарлик борасида катта ўзгаришлар қилиш масъулияти юклатилади. Айнан шу сабабга кўра, клуб ва терма жамоадаги иш жараёни турлича кечади. Клублар бир неча ой давомида футболчиларнинг тайёргарлигини шакллантиришади, терма жамоа эса фақат энг яхши формадаги ўйинчиларни чақиради. Шу боис ҳам одатда термада жисмоний тайёргарлик бўйича кучли мутахассисга эҳтиёж катта эмас. Онекенинг фаолиятига назар ташласак, ҳали бирорта миллий жамоада ишламаганини кўришимиз мумкин. Демак, бунақаси унинг тажрибасида илк марта рўй бермоқда. Ким билади дейсиз, айни турдаги дебют мураббийни янада жиддийроқ ишлашга ундар?! Демак, бу ҳам бизнинг фойдамизга ишлаши мумкин бўлган факторлардан яна бири.
Албатта, Онеке термага ёрдам беришни истайди. Ўз навбатида, ундан 3-4 кун ичида Виталий Денисовни майдонга қайтаришни талаб қилмаймиз. Бунга ишониш қийин. Ахир у фитнесс-мураббий, сеҳргар эмас. ЎФФ расмий сайтидаги хабарда келтирилишича, «миллий терма жамоада жароҳатлар эпидемияси тарқалганлиги сабабли, қолаверса, кейинги икки ўйинга юқори жисмоний тайёргарлик кўриш мақсадида» мураббийлар штабига Онеке таклиф этилган. Демак, хорижлик мутахассисдан талаб этиладигани - жисмоний ҳолатни мукаммал ҳолга келтириш.
Ўзбекистон миллий жамоаси 31 августда сафарда Хитой термасига қарши майдонга тушади. 5 сентябрда эса Жанубий Корея Тошкентда меҳмон бўлади. Бу учрашувлар ўзбек футболининг яқин келажагини белгилаб беради. Албатта, биз фақат ғалабага умид боғлаймиз. Ҳал қилувчи паллага жуда оз муддат қолмоқда. Бу вақтда Онеке нималарни ўзгартира олади? Бу ҳақида энди сентябрда гаплашамиз...
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
