Бу галги Испания суперкубоги ҳар доимгидан-да куилмаган бўлди. Чунки ҳеч ким “Барселона”нинг “Реал”га иккала ўйинда ҳам мағлуб бўлишини кутмаганди. Умумий ҳисоб 5:1 кўринишини олишини эса тахмин ҳам қилишмаганди. Том маънода мазкур ҳолат “Барселона” учун фожиа билан баробар бўлди. Хўш, бу фожианинг асосий айбдорлари кимлар?
АСОСИЙ АЙБДОР — БАРТОМЕУ
Албатта, жамоанинг бундай кучсизланиб қолишига асосий сабабчи Бартомеудир. Биринчидан, у Неймарни умуман кераксиз вазиятда сотиб юборди. Кераксиз деганимизнинг сабаби шундаки, айни дамда “Барселона”да Неймарнинг ўрнини боса оладиган футболчи йўқ. Нафақат “Барселона”да, балки бутун Европада Неймардек ўйнайдиган футболчини топиш мушкул. Ана шундай вазиятда жаноб Бартомеу 222 млн еврога ошиқ бўлди-ю, Неймарни сотди. Бу трансферни унинг ўзи ҳам хоҳлади, акс ҳолда “ПСЖ” уни осонгина қўлга кирита олмасди. “Реал” га қарши ўйинда эса Неймарнинг ўрни яхшигина билинди. Масалан, 11-дақиқада Суарес тўпни қанотдан узатганида Андре Гомеш қулай вазиятда суст ҳаракат қилди. 63-дақиқада эса Мессининг ажойиб узатмасини Роберто кўкка совурди. Ваҳоланки, Неймар бундай ҳолатларнинг кўпини голга айлантирган.
Иккинчидан, суперкубокка қадар “Барселона” тузукроқ трансферни амалга ошира олмади. Агар Коутинё, Дембеле ёки Дибаладан бирини харид қилишга улгурганида, эҳтимол, бугун вазият бошқача бўлармиди? “Барселона” ҳаракат қилди-ку, деманг, тўғри, уринди, аммо пулнинг бетига қараган одамнинг иши унмайди, деган гап бор. Каталония раҳбарияти айни дамда трансфер бозорида бироз майдакашлик қилаётгандек.
ИККИНЧИ АЙБДОР — ВАЛВЕРДЕ
Жаноб Валверде, бу сизга “Атлетик” эмас дегимиз келди ўйинни кўриб. Ваҳоланки, бош мураббий футболчиларни руҳан тайёрлай олмагани ўйин давомида яққол сезилди. Бугун “Барселона”да керакли шижоатни кўрмадик. Афтидан, Валверде ҳам, футболчилар ҳам совринни қўлдан чиқаришганига аллақачон ишониб бўлишганди. Бу эса Валверденинг хатоси. Ахир бу “Барселона”, “Атлетик” эмас, “Атлетик” “Реал”ни 3:1 ёки 3:0 га юта олмаслиги мумкин, бироқ “Барселона” юта оларди, ютган ҳам. Жаноб Валверде эса негадир футболчиларга ана шу руҳни сингдира олмаган кўринади. Ахир бир неча йил фақат “Матиз” ҳайдаб юриб, машина ҳайдашни фақат “Матиз” билан белгилашга ўрганган ҳайдовчи тўсатдан “Ласетти”га ўтириб қолса, довдираши бор гап. Валверде ҳам айни дамда мана шу ҳайдовчининг ҳолатида. Жаноб Валверде, “Барселона” “Матиз”га айланиб қолмасидан эс-ҳушингизни йиғиб олинг.
Хуллас, мавсум “Барселона” учун жуда-жуда ёмон бошланди. Умид қиламизки, бу ёғига ҳаммаси жойига тушади.
Низомжон ИСЛОМОВ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
