Ж.Корея октябрь ойида ўртоқлик ўйинлари ўтказиш учун рақиб қидирмоқда
Жанубий Корея футбол ассоциацияси октябрь ойида 2та ўртоқлик ўйини ташкил этиш учун рақиблар қидирмоқда.
"Октябрь ойидаги ФИФА кунларида УЕФА терма жамоалари ЖЧ-2018 саралаш ўйинларини ўтказади. Шу боис, Европа жамоалари билан ўртоқлик ўйини ташкил қилиш қийин бўлади. Шу боис, бу вақтда Жанубий Корея терма жамоаси Африка жамоалари билан тўқнаш келса керак", - деди КФА вакили.
Кореяликлар тўғридан-тўғри ЖЧ-2018 йўлланмасини қўлга киритишса, октябрь ойида ўртоқлик ўйинларида иштирок этишлари мумкин. Акс ҳолда, уларда бундай имконият бўлмайди. Боиси, Ж.Корея саралаш босқичида 3-ўринни эгалласа, октябрь ойида ЖЧ-2018 йўлланмаси учун плей-офф босқичида иштирок этишга мажбур бўлади.
Корея терма жамоаси ҳозирда гуруҳда 13 очко билан 2-ўринни эгаллаб турибди. Ўзбекистон эса улардан 1 очко кам жамғарган ҳолда, 3-ўринни банд этиб турибди. Ж.Корея 31 август куни ўз уйида Эронни қабул қилса, орадан 5 кун ўтиб Тошкентда Ўзбекистон меҳмони бўлади.
Осиёдаги саралаш босқичида гуруҳларда 3-ўринни эгаллаган жамоалар октябрь ойида ўзаро плей-офф босқичида иштирок этишади. Ғолиб чиққан жамоа ноябрь ойида КОНКАКАФ минтақаси вакили билан ЖЧ йўлланмаси учун плей-офф шаклида тўқнаш келади.
Манба: yonhapnews.co.kr
Киритилди: 11:50, 25.08.2017. Ўқилди: 6271 марта. Фикрлар: 3 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).