Англия терма жамоаси ЖЧ саралаши доирасидаги Словенияга қарши ўйинда қийинчилик билан ғалаба қозонди ва Россияда бўлиб ўтадиган Мундиал йўлланмасини нақд қилди. Ўйинда ягона бўлган голга «Тоттенхэм» ҳужумчиси Хари Кейн муаллифлик қилди. Ҳужумчи қўшимча вақтда гол уриб, Англияга йўлланмани тақдим этди. Охирги вақтларда Кейннинг жаҳон даражасидаги юлдузга айланиб бораётгани ҳақида кўп гапиришмоқда. Дарвоқе, Словения билан ўйинда Кейн жамоа сардори сифатида ҳаракат қилди.
ОМАДЛИ «ТАҚАЧИ»
Кейн мухлисларга «Тоттенхэм»даги ўйинлари билан танилди. Охирги икки мавсумда Англия Премьер-Лигаси тўпурари бўлди. Анчадан буён Англияда маҳаллий футболчи тўпурар бўлмаётганди. Кейн «Тоттенхэм» клуби тарбияланувчиси ҳисобланади. Бироқ унинг болалигида «Арсенал» либосида тушган расмлари ҳам тарқалганди. «Тоттенхэм»да порлашидан аввал ҳужумчи «Лестер»да ижарада ўйнаб юрганди. «Тулкилар»нинг чемпионликни қўлга киритган таркибида эмас албатта, сал олдинроқ. Кейин эса «Тоттенхэм» сафида захирадан майдонга туша бошлади. Кейн учун Европа Лигаси алоҳида қадрли мусобақа. Чунки айнан ўша мусобақада футболчи «Тақачилар»нинг асосий таркибида ўйнашни бошлаганди. 2013/14 йилги Европа Лигаси мавсумида Кейн порлаганди. Кетма-кет голлардан кейин эса Почеттино ҳужумчини Премьер-Лигада ҳам ўйната бошлади. Натижа эса ёмон эмас. Охирги учта мавсумда Харри Премьер-Лигада 21, 24 ва 29тадан гол урди. У ўз номига мос ҳаракат қилмоқда. Футболчининг исми инглизчада Harry Kane деб ёзилади. Ундаги учта ҳарфни ўзгартирса, инглизчада «тўфон» сўзи пайдо бўлади – hurricane.
МАВСУМ СEНТЯБРДА БОШЛАНАДИ
Англиянинг айни вақтдаги энг яхши футболчиси, Премьер-Лиганинг охирги икки мавсумидаги тўпурари бўлса-да, Кейн нима учундир августда ҳеч қачон гол урмаган. Жорий мавсумда кўпчилик Кейн бу серияни бузади деб кутди, лекин ўзининг энг яхши формасида бўлишига қарамай, ҳужумчи Премьер-Лиганинг августдаги ўйинларида гол ура олмади. Сентябрь бошланиши билан эса Харрини тўхтатиб қолишнинг имкони бўлмай қолди. Сентябрнинг биринчи кунида Англия терма жамоаси Мальтага қарши майдонга тушди. Кейн бу баҳсда иккита гол урди. Сентябрнинг охирги кунида эса «Тоттенхэм» сафида «Хаддерсфилд» дарвозасига иккита гол урди. Умумий ҳисобда Кейн сентябрда 13 та гол урди. Бу «Тоттенхэм» ва Англия терма жамоаси сафида урилган голларининг умумий ҳисоби. Кейн ЖЧ саралашининг охирги турида ҳам Литва дарвозасига урилган ягона голга муаллифлик қилди.
БЎЛАДИГАН САРДОР
Харри Кейнни Англия терма жамоаси бош мураббийи Гарет Саутгейт бекорга сардор сифатида танлагани йўқ. Юлдузларга тўла таркибда сардор танлаш жуда қийин масала. Рунидан кейин терма жамоага Гарри Кэхилл ҳамда Жордан Хендерсонлар ҳам сардор бўлишди, бироқ Саутгейт Кейн энг яхши вариант эканини тушуниб етди. Чунки у голлари билан жамоага натижа келтирмоқда. Бир сўз билан айтганда терма жамоанинг энг фойдали футболчиси. Бундай футболчилар эса жамоани ортидан эргаштира олади. Кэхилл ёки Хендерсонга футболчилардан бирортаси жаҳл устида «Сен ўзи нимани қойиллатдингки бизга сардорлик қиляпсан», дейиши мумкин, лекин Кейнга бундай дея олмайди. Чунки у жамоанинг асосий кучи ҳисобланади. Англия каби катта жамоаларда энг кучли футболчини сардор сифатида танлаш тўғри йўл. Кейн ёш бўлса ҳам, ҳозирда Англиянинг энг кучли футболчиси ҳисобланади.
КEЙИНГИ МАНЗИЛ МАДРИД?
Мадриднинг «Реал» клуби дунёнинг энг яхши футболчиларини сотиб олишни хуш кўради. Бундан ташқари Флорентина Перес «Тоттенхэм» етакчиларини Мадридга олиб келишни ҳам хуш кўради. Лука Модрич ва Гарет Бэйллар «Тоттенхэм»нинг асосий юлдузига айланишгач Мадрид томон йўл олишганди. Бу трансферлар ҳар икки клуб учун ҳам фойдали бўлган: «Реал» ажойиб футболчиларни қўлга киритган, «Тақачилар» эса яхшигина пул ишлаб олишган. Шу сабаб Кейннинг «Реал»га ўтиши ҳақида гапира бошлашди. Чунки Криштиану Роналдунинг ёши ўтмоқда, Бензема ҳам аввалги даражасида эмас ва ўз-ўзидан «Реал»га кучли марказий ҳужумчи керак. Айни вақтда Европанинг энг кучли марказий ҳужумчиларидан бири айнан Кейн. У ҳали ёш экани Переснинг режаларига тушиш эҳтимоли катта эканини англатади. «Тоттенхэм» ҳар қанча чиройли ўйнамасин, Англияда чемпионлик учун курашадиган жамоадан юқорироқ даражага кўтарила олмаяпти. Кейн эса дунёнинг энг яхшилари қаторидан ўрин олиши учун кўҳна қитъанинг энг кучли жамоаларида ўйнаши керак. Унинг Испанияга йўл олиши Англия терма жамоаси учун ҳам фойдали. Чунки…
2000 йиллар бошида шакллана бошлаган, кейинроқ Уэйн Руни билан бойиган Англия терма жамоасини мамлакат футболининг «Олтин авлоди» дейишарди. Чинданам Бекхэм, Оуэн, Жеррард, Лэмпард, Терри, Скоулз, Руни, Фердинанд, Коуллар бор таркиб жуда кучли эди. Бироқ улар ҳеч қандай соврин юта олишмади. Ҳозирги Англия терма жамоасига эса халқаро майдонда жуда беписанд қарашмоқда. Чунки жамоанинг энг асосий юлдузи бўлган Кейн ҳам Англиядагина ўз ўрни бор жамоада ўйнайди. Олдинги таркибдагилар «МЮ», «Ливерпуль», «Челси» сафида Европани ҳам забт этишганди. Шу сабаб Кейн «Реал»га ўтиши орқали нафақат ўзи учун бутун мамлакат футболи учун фойдали қарор қилган бўлади. Ҳужумчи учун жорий мавсумдаги Чемпионлар Лигаси жуда муҳим. Ҳозирча яхши қадам олган «Тоттенхэм» гуруҳдан чиқа олса, ўзи учун янги давр бошлай олиши мумкин. Лондонликлар гуруҳда «Реал» билан ҳам иккита ўйин ўтказишади. Бу баҳслар айниқса Кейн учун жуда муҳим бўлади. Дарвоқе Дэвид Бекхэм «Реал»га ўтишидан сал олдин «МЮ» сафида мадридликлар дарвозасига иккита гол урганди…
Ўткир ЖАЛОЛХОНОВ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
