ЎФФ томонидан Суперлига клублари учун тасдиқланган ва ўйинчиларнинг жисмоний ҳолатини аниқлашга мўлжалланган, ўзбек футболида илк бор қўлланаётган тест-синовларини топшириш жараёнида қатнашаётган «Олмалиқ» клуби аъзоларидан бири Ғуломҳайдар Ғуломов мухбиримиз билан суҳбатда ушбу янгилик ҳамда жамоанинг тайёргарлик жараёни ҳақида гапирди.
- Ғуломҳайдар, жисмоний тайёргарликни аниқлаш мақсадида ўтказилаётган тест-синови қандай кечди?
- Аслида, ҳар бир янгилик ўз номи билан қизиқ бўлади. Албатта, ЎФФ томонидан қўлланилаётган бу чора-тадбирлар футболчиларнинг жисмоний ҳолатини яхшилаш, шу орқали терма жамоаларга кучли футболчиларни тайёрлашга хизмат қилади.
- Янги мавсум тайёргарликлари қай тарзда олиб бориляпти?
- Тараддудни 14 декабрдан бошладик. Машғулотларимиз Тошкент вилоятининг тоғли ҳудудида жойлашган «Олтин олма» мажмуасида бўлиб ўтмоқда.
Кунига икки маҳалдан шуғулланяпмиз. Асосан умумжисмоний тайёргарликка эътибор қаратиляпти. Дастлабки кунлари тикланишга йўналтирилган машғулот ўтказилганди.
- Машғулотларни Виктор Кумиковнинг ўзи ўтказяптими?
- Йўқ. Унинг ёрдамчилари ўтишяпти. Лекин Виктор Балютович ишлаб чиққан тайёргарлик дастури бўйича машғулот ташкил қилиняпти. Билишимча, бош мураббий ўқишга кетган. Икки-уч кунда қайтади, дейишди.
- Ўтган йилги таркибдан жой олганларнинг барчаси сафдами?
- Ҳамма эмас. Клуб билан шартномаси якунига етган Аброр Каримов, Вусол Магеррамов, Раҳматилло Бердимуродов, Ислом Иномов, Шавкат Муллажонов, Шота Григалашвили, Фарҳод Мусабеков, Яҳё Рўзиев каби футболчилар жамоани тарк этишди.
Уларнинг ўрнига бир гуруҳ янги футболчилар келишган ва бу ўйинчилар мураббийлар кўригидан ўтишмоқда. Шунингдек, ўринбосарлар жамоасида ўзини кўрсатганлар ҳам машғулотларга жалб қилинган.
- Кўрикда бўлиб турганлар орасида таниқли футболчилар борми?
- Отабек Зокиров, Жавлон Гусейнов, Абдумалик Абдуллаев сингари олий лигада катта тажриба тўплаган футболчилар кўрикда бўлиб туришибди.
Бундан ташқари, бугун (суҳбат 19 декабрь куни уюштирилган, - муаллиф) Қирғизистон термаси сардори ҳам машғулотларда қатнашяпти.
Самарқанднинг «Динамо» клубида ижара асосида ўйнаган футболчимиз Муҳаммад Исаев ҳам сафимизга қайтди. Бу футболчилар билан шартнома имзоландими, йўқми, билмайман.
- Клубда ўтган мавсум якунлари бўйича йиғилиш ўтказилдими? Жамоанинг иштироки қандай баҳоланди?
- Ҳали жамоавий йиғилиш ўтказилмади. Бу учрашув мавсум бошланиши олдидан ташкил этилади. Эҳтимол, клуб раҳбарияти мураббийлар штаби билан ўзаро ички йиғилиш ўтказгандир. Бундан хабарим йўқ.
Олдимизда турган асосий вазифа ўтган мавсум йўл қўйилган хато ва камчиликларни бартараф этиш ва кейинги йили уларни такрорламасликдан иборат. Бунинг учун янада кучлироқ тайёргарлик кўришимиз шарт.
- Мавсум якунлари юзасидан шахсий фикрингиз қандай?
- Кучли бешликка киришга арзийдиган жамоа тузилганди. Энг муҳими, ҳаммаси ўз қўлимизда эди. Ўз хатоларимиз туфайли иккинчи давра ўйинларини ўта суст ўтказдик.
Айниқса, иккинчи давранинг бошланиши биз учун омадсиз кечди. Ёдингизда бўлса, биринчи даврани 4-ўринда якунлагандик. Танаффусдан сўнг 9-10-поғоналарга тушиб кетдик.
Шунга қарамай, охирги ўйинларни кўтаринки кайфиятда ўтказиб, ўзимиз учун ўта муҳим бўлган очколарни йиғдик. Натижада 7-ўринни банд этдик. Виктор Кумиков томонидан янги тузилган жамоа учун бу ёмон натижа бўлмаса керак, деб ўйлайман.
- Айнан қандай хатоларга йўл қўйдинглар?
- Билмадим. Аниқ ниманидир келтиролмайман. Услубимиз жамоавий ўйинга мосланган. Ғалабага эришсак, бунга бутун жамоа сабаб бўлади. Яъни, бош мураббийдан тортиб, ишчиларгача.
Ва худди шундай, мағлубиятга учрасак, бутун жамоа сабабчи, яъни айбдор бўлади. Кимнидир ёки ниманидир айбдор деб кўрсата олмайман. Келинг, омад келмаган, деб ҳисоблайлик.
- «Олмалиқ» билан амалдаги шартномангиз муддати якунландими?
- 31 декабрь куни тугайди.
- Клуб раҳбарияти билан келишувни узайтириш бўйича музокара олиб бордингизми? Умуман, режаларингиз қандай?
- Ўзимга қолса, янги мавсумни ҳам «Олмалиқ»да ўтказган бўлардим. Раҳбарият билан оғзаки келишувимиз бор. Фақат расман шартнома таклиф қилишса бўлди.
- Бу масалада Виктор Кумиковнинг ўзи билан гаплашмадингизми?
- Ҳозирча йўқ. Клуб раҳбарияти билан суҳбатлашдим. Жамоага керак бўлмаганимда, буни ўзимга айтишарди, деб ўйлайман. Шартномани узайтирмасликка қарор қилинган футболчилар билан клуб раҳбарияти дўстона тарзда хайрлашди.
- Ўтган мавсум якунлари бўйича барча футболчилар билан ҳисоб-китоб ишлари тўлиқ амалга оширилдими?
- Ҳа, бу борада ҳеч қандай муаммо йўқ. Тўлиқ ҳисоб-китоб ишлари қилинди. Жамоанинг футболчилардан қарзи йўқ.
- ЎФФ ва ПФЛ олиб бораётган сиёсат бўйича шахсий фикрингиз қандай?
- Агар шу янги қарорлар ўзбек футболи ривожига хизмат қилса, бундан барча қатори мен ҳам хурсанд бўламан.
- «Олмалиқ» янги мавсумда грандларга етарлича ташвиш туғдира оладими?
- Агар ўйинлар ҳаққоний тарзда кечса, барча жамоалар грандларга етарлича ташвиш туғдира олади. Бунга шубҳам йўқ.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
