Яшил майдондаги ажойиб ўйинлари билан мухлислар меҳрини қозонган футболчилар бутсаларини михга илгач, турли соҳалар бўйлаб кетишади. Одатда, биз уларнинг мураббийликда ўзларини синаб кўришганига гувоҳ бўламиз.
Аммо шундайлар ҳам борки, кутилмаган касбни танлаб, ўзларининг очилмаган қирраларини намоён этишади. Бугунги мақола айнан шундай футболчиларга бағишланади.
ФАБЬЕН БАРТЕЗ (Франция термаси, «Тулуза», «Марсель», «Монако», «МЮ», «Нант» клубларида ўйнаган)
Франция миллий жамоаси таркибида жаҳон ва Европа чемпионига айланган дарвозабон 2007 йили фаолиятини якунлашга қарор қилди. Аммо узоқ вақт ишсиз қолиб кетмади.
Орадан бир йил ўтиб, автоспорт оламига кирди ва Porsche Carrera Cup France турнирида қатнашди. 2013 йили эса Sofrev ASP Ferrari жамоасидаги шериги Морган Муллен-Траффор билан GT тоифасида Франция чемпионати ғолибига айланди.
«Манчестер Юнайтед»нинг собиқ посбони пойга якунлангач, ўз интервьюсида ҳамиша автопойгаларда қатнашишни орзу қилганини таъкидлади. Бартез Panis Barthez Competition жамоаси таркибида мунтазам равишда «Ле Ман 24 соати» пойгаларида иштирок этиб келмоқда.
БИКСАНТ (Бишенте) ЛИЗАРАЗЮ (Франция термаси, «Бордо», «Атлетик», «Бавария», «Марсель» клубларида ўйнаган)
Бартезнинг термадаги шериги, 90-йиллар охири 2000-йиллар бошида энг яхши қанот ҳимоячиларидан бири сифатида эътироф этилган Лизаразю жиу-житсу (Бразилия яккакураш тури) билан жиддий тарзда шуғуллана бошлади.
Ҳаттоки, 2009 йили 1-енгил дивизионда Европа чемпионига айланди. Шунингдек, Биксант серфинг ишқибози, ТВда экспертлик қилади, турли тилларни ўрганади (француз ва баск тилидан ташқари, у инглизча, немисча ва испанчани билади).
Лизаразю - серқирра шахс, у билан «ПСЖ»нинг муаммолари, Йоанн Гуркюффнинг жароҳати, умуман, исталган мавзуда суҳбатлашиш мумкин.
ТОМАС ГРАВЕСЕН (Дания термаси, «Вайле», «Гамбург», «Эвертон», «Реал», «Селтик» клубларида ўйнаган)
«Эвертон» сафида 100дан ортиқ ўйин ўтказган биринчи хорижлик футболчи, классик таянч ярим ҳимоячиси. Тушунарсиз ҳолатда Мадриднинг «Реал» клуби сафига қўшилган Гравесен ҳозир Лас-Вегасда яшайди. Покердаги омадли ўйинлари туфайли миллионерлар сафидан ўрин эгаллаган.
БАРРИ ХОРН (Уэльс термаси, «Рексхэм», «Портсмут», «Саутгемптон», «Эвертон», «Бирмингем», «Хаддерсфилд», «Шеффилд Уэнсдей», «Киддерминстер Харрирз», «Уолсолл», «Белпер Таун» клубларида ўйнаган)
«Эвертон»даги ўйинлари орқали мухлисларга танилган ярим ҳимоячи футболчиларнинг чекловларга мойиллигини инкор этганлардан биридир.
Унинг Ливерпуль радиосидаги фаолияти ёрқин кечди, Liverpool Echo газетасида ўз саҳифасига эга. Энг асосийси - Хорн 2014 йилдан буён Честер шаҳридаги Қироллик мактабида физика ва химия фанларидан дарс бермоқда.
ФРАНК ЛЕБЁФ (Франция термаси, «Йер», «Мо», «Лаваль», «Страсбур», «Челси», «Марсель», «Ал-Садд», «Ал-Вакра» клубларида ўйнаган)
Франциянинг энг иқтидорли авлод вакилларидан бири 2005 йили бутсаларини михга илди. Сўнгра Лос-Анжелесга бориб, Винни Жонс билан биргаликда «Голливуд» ҳаваскорлар жамоасида ўйновчи мураббий вазифасида ишлади. Калифорнияда яшаш асносида Лебёф болаликдаги орзусини рўёбга чиқаришга ошиқди ва актёрлар мактабига кирди.
Бугунги кунда у мунтазам равишда театрда роль ўйнамоқда, ўнлаб фильмларда суратга тушди. Улар орасида энг машҳури - Стивен Хокингнинг рафиқаси мемуарлари асосида ишланган «Барча нарсалар назарияси» фильми. Унда Лебёф шифокор образини яратган.
ГАИСКА МЕНДИЕТА (Испания термаси, «Кастельон», «Валенсия», «Лацио», «Барселона», «Мидлсбро» клубларида ўйнаган)
Футбол тарихидаги энг яхши пенальтичи мунтазам равишда Москвага бориб, афсоналар кубогида жаҳон термаси сафида ўйнайди. Аммо Мендиетанинг асосий қизиқиши мусиқа билан боғлиқ.
Яқинда ди-жей сифатида ишлашни бошлаган собиқ футболчи турли фестивалларда қатнашмоқда, Los Planetas инди-рок гуруҳига қўшиқлар ёзиб бермоқда.
ЖОРЖ ВЕА (Либерия термаси, «Майти Баролл», «Инвисибл Элевен», «Африка Спортс», «Тоннер», «Монако», «ПСЖ», «Милан», «Челси», «Манчестер Сити», «Марсель», «Ал-Жазира» клубларида ўйнаган)
«Олтин тўп» соҳиби, ўтмишда «Милан»да ажойиб ўйинлар кўрсатган ҳужумчи охир-оқибат мамлакат раҳбарлигига сайланган ягона футболчига айланди. Веа 2017 йилнинг декабрида ўтказилган сайловларнинг иккинчи босқичида ғолиб чиқиб, Либерия президенти бўлди.
Абдуллохон ИСРОИЛХОНОВ тайёрлади
InterFutbol.uz нинг Telegram даги саҳифасига уланинг – энг сўнгги янгиликлар, қизиқарли блоглар ва таҳлилий материаллар энди бир тўпламда.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Истиқлол
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
