Эрон U-15 бош мураббийи Муҳаммад Яварий: «CAFA U-15 championship” мусобақаси биз учун катта тажриба майдонидир»
“CAFA U-15 championship” мусобақасида иштирок этаётган терма жамоалар бош мураббийлари билан суҳбат уюштиришда давом этамиз. Бугунги меҳмонимиз Эрон U-15 терма жамоаси бош мураббийи Муҳаммад Яварий.
- Суҳбатимиз аввалида Ўзбекистон – Эрон ўйини ҳақида фикрингизни билмоқчи эдик.
- Ушбу ўйин иккала терма жамоа учун ҳам мусобақа давомидаги энг яхши ўйинлардан бири бўлди. Ғалабага бўлган иштиёқ, шижоат Эрон терма жамоасида кўпроқ бўлганлиги сабабли омад бизларга кулиб боқди. Бу бизнинг тинимсиз меҳнатимиз меваси деб ўйлайман. Ўзбекистон терма жамоаси ҳам яхши ўйин кўрсатди ва мен бу жамоани мусобақадаги энг кучли терма жамоалардан бири деб ҳисоблайман.
- Барчага маълумки Эрон терма жамоаси Осиёнинг энг кучли терма жамоаларидан бири ҳисобланади ва мунтазам турли мусобақаларда иштирок этади. Ўша мусобақалар орасида Эрон терма жамоаси учун “CAFA U-15 chаmpionship” мусобақасининг аҳамияти қандай?
- Жорий йил ҳисобидан “CAFA U-15 chаmpionship” турнири биз учун учинчи мусобақа ҳисобланади. Ўзбекистонга келгунга қадар биз Қатарда ва Арманистонда ташкил қилинган халқаро мусобақаларда иштирок этдик. Ўзбекистонда ўтказилаётган мусобақага тўхталадиган бўлсам, бу мусобақа биз учун жудаям аҳамиятга эга. Чунки Осиё доирасида ташкил қилинадиган мусобақаларда биз хоҳласак-хоҳламасак Қирғизистон, Туркманистон, Тожикистон, Ўзбекистон ёки Афғонистонга қарши тўп суришимизга тўғри келади. Улар билан ўйинларда орттирган тажрибамиз келгуси ўйинларда ҳам албатта асқотади. Шу сабабли ҳам бу мусобақани Эрон терма жамоаси учун алоҳида аҳамиятга эга деб айта оламан.
- Юқорида Ўзбекистон терма жамоаси ҳақида фикрингизни айтиб ўтдингиз. Айтингчи қолган рақиблар қай даражада сизларга қаршилик кўрсата олишяпти?
- Барча рақибларга қарши ўйинлар биз учун финалга хос бўлган кайфиятда ўтяпти. Агар ҳар бир рақибга алоҳида тўхталадиган бўлсам, Афғонистон терма жамоасини олайлик. Уларда жуда ҳам яхши жамоа шаклланган. Улар меҳнат қилишдан тўхтамасалар келажакда ажойиб натижаларни қайд этишларига ишончим комил. Тожикистон терма жамоаси ҳам чиройли ўйинларни намойиш қилмоқда. Ўзбекистон, Афғонистон ва Тожикистон менинг назаримда Туркманистон ҳамда Қирғизистонга нисбатан анча мазмунли ўйинларни намойиш қилишмоқда ва бу улар тўплаган очколар сонидан ҳам маълум. Қирғизистон ва Туркманистонда озгина тажриба етишмаётгани сезилиб қолмоқда.
- Эрон терма жамоаси барча ўйинда ғалаба қозониб турнир жадвалида етакчилик қилиб турибди. Бу ҳолат олдиндан уларда чемпионлик туйғусини уйғотиб сўнгги турда жамоанинг зарарига хизмат қилиб қолмасмикин?
- Йўқ. Болаларнинг руҳиятида бундай кайфият мавжуд эмас. Бизлар ҳар бир ўйиндан кейин ўша ўйиндаги ижобий натижаларни унутамиз ва аксинча ўйиндаги камчиликларни бартараф этиш борасида бош қотирамиз.
- “CAFA U-15 chаmpionship” ташкилотчилиги борасида ҳам фикрларингиз билан ўртоқлашсангиз.
- Авваламбор ташкилотчилик ҳақида гапириб ўтсам. Ўзбекистонда ўтаётган мусобақа жуда ҳам аъло даражада ташкил қилинибди. Ўзбекларнинг нақадар меҳмондўст халқ эканлигини биз самолётдан тушган заҳотиёқ ҳис қилдик. Бизга қаратилаётган эътибор, яратилаётган шарт-шароитлар юксак даражада. Мусобақа ташкилий қўмитасига озгина таклифларим мавжуд. Биринчиси, кейинги мусобақаларда машқ учун ажратилган майдонлар меҳмонхонага яқинроқ жойдан танланса, болалар учун анча енгиллик бўлар эди. Иккинчи таклифим, ўйинлар 2 кунда 1 марта эмас, 1 кун ўйин 2 кун дам тизимида ўтказилса футболчиларимизнинг тикланиши учун ҳам яхши бўлар эди. Бошқа эътирозларимиз мавжуд эмас.
- Самимий суҳбатингиз учун миннатдорчилик билдираман.
- Раҳмат. Ишларингизда муваффақиятлар тилайман.
Манба: www.ufa.uz
Киритилди: 09:14, 30.07.2018. Ўқилди: 2566 марта. Фикрлар: 1 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
