Хабар бериб ўтганимиздек, ўсмирлар Олимпия ўйинларида оғир атлетикачимиз Муҳаммадқодир Тоштемиров кумуш медали соҳибига айланди. Биз ушбу муваффақиятдан сўнг спортчимизнинг фикрлари билан қизиқдик.
«Ўсмирлар Олимпиадасига жиддий тайёргарлик кўргандик. Баҳсларда Арманистон ва Мисрдан ташриф буюрган рақибларим кучли ҳисобланардилар. Бир килограмм фарқ билан мағлуб бўлганим бироз аламли бўлди.
Аммо, Олимпия ўйинларининг кумуш медалига эга чиққанимдан жуда хурсандман. Ўйлайманки, иштирокимдан мураббийларимнинг ҳам кўнгли тўлди. Олдинда кўплаб мусобақалар бор. Мен ўз устимда ишлаб, янада маҳоратимни тоблашим керак.
Ўсмирлар Олимпиадасининг кумуш медалини қўлга киритиш орқали, мен орзуларимдан бирини амалга ошира олдим. Қўллаб-қувватлаган барчага раҳмат айтаман», – деди спортчи.
Ўз навбатида спортчининг мураббийи Жўрабек Зоиров ҳам ўз фикрлари билан ўртоқлашди.
«III ёзги ўсмирлар Олимпия ўйинларига йил давомида тайёргарлик кўрдик. Муҳамаммадқодир мусобақада -77кг вазн тоифасида иштирок этди ва бу ерда кучли рақиблар етарлича эди. Масалан, арманистонлик полвон Европа чемпиони ҳисобланади.
Шунингдек, мисрлик спортчи ҳам ёмон натижа кўрсатгани йўқ. Биз рақибга бир килограмм фарқ билан мағлуб бўлдик ва якунда кумуш медаль билан кифояландик. Ўйлайманки, бу орқали биз терма жамоа учун муносиб номзодлар тайёрлаётганимизни кўрсата олдик.
Шуни алоҳида қайд этишим лозимки, ўсмирларимиз орасида Токио 2020 Олимпиадасида иштирок эта оладиган спортчиларимиз ҳам бор.
Муҳаммадқодир мусобақада силтаб кўтаришда 168 кг. натижа кўрсатиб, ўзининг шаҳсий рекордини янгилай олди. Бунгача унинг бу борадаги рекорди 167 кг. эди. Ушбу натижа билан у Осиё чемпионлигини қўлга киритганди.
Энди Тоштемировни -81кг вазн тоифасига ўтишини режалаштиряпмиз. Навбатдаги мусобақаларга жиддий тайёрланиб, камчиликларни бартараф этамиз», – деди мураббий.
Матнда хатолик топсангиз, ўша хатони белгилаб, бизга жўнатинг (Ctrl + Enter).