Ўзбекистон Суперлигаси 26-турида мавсумнинг ҳал қилувчи ўйинларидан бирига гувоҳ бўлдик. «Пойтахт дербиси» - таъқибчи «Пахтакор» ва пешқадам «Локомотив» ўртасидаги қарама-қаршиликка бежиз «чемпионлик ўйини» сифатида қаралмади.
«Шерлар» ўзаро тўқнашувга қадар «темирйўлчилар»дан 3 очко ортда қолишаётган ва рақибга тенглашиш имкониятига эга эдилар.
Аммо дербига юқори кайфиятда тайёргарлик кўрган Андрей Фёдоров шогирдлари ишончли ғалабага эришиб, ўртадаги тафовутни 6 очкога етказиб қўйишди. Улар яна кубок чорак финалидаги мағлубият учун муносиб реванш олишди.
Ёдингиздадир, «Пахтакор» стадионида ўтказилган ўша баҳсда Шота Арвеладзе шогирдлари 4:0 ҳисобида устун келишганди.
Хуллас, Суперлига финишига 6та тур қолган паллада «Локо» чемпионликка анча яқинлашди. Биз «Пойтахт дербиси»дан сўнг меҳмонлар вакили - ярим ҳимоячи Санжар Шоаҳмедовни махсус суҳбатга тортдик.
- Санжар, ғалабанинг муҳим омили сифатида қайси жиҳатни тилга оласиз?
- Ўйлашимча, энг асосий омил - бу ҳамжиҳатлик. Йигитлар бутун ўйин давомида бир тану бир жон бўлиб ҳаракат қилишди. Ғалабага иштиёқимиз ҳам баланд эди. Бу каби ўйинларда битта хато ҳам қимматга тушиши та-йин. Мураббийларимиз бу борада бизни қайта-қайта огоҳлантиришди.
- Майдонга тушишдан олдин биринчи рақам остида ўйнаш ҳақида кўрсатма берилдими ёки вазиятга қараб ҳаракатланиш буюрилди?
- Олдимизга битта вазифа қўйилди - ғалаба қозониш. Табиийки, ғолиб чиқиш учун рақиб дарвозасини ишғол этиш талаб қилинади. Шуни инобатга олган ҳолда, илк дақиқалардан ҳужумга ўтдик. Натижада майдон эгалари дарвозасини бир эмас, 3 марта ишғол қилдик.
- Лекин таваккалчилик бор эди: «Пахтакор» худди кубок баҳсидаги каби қарши ҳужумларда сизларни жазолаши ҳеч гап эмасди...
- Ҳа, тўғри. Лекин «Локомотив» уйда ўйнайдими ёки сафарда - ҳамиша ҳужумкор футболга таянади. Бу сафар ҳам шундай бўлди. Тўғри, ҳимояни ҳам унутмадик. Стандарт вазиятларни инобатга олмаганда, 2-3 нафар футболчимиз орқада қолиб, ҳимоядан чиқмади. Улар ҳужумга қўшилганларида ўринларини бошқа футболчилар «ёпиб» туришди. Умуман, ҳимоя ва ҳужум уйғунлиги олдиндан режага киритилганди.
- Кубок ярим финалидаги мағлубият учун реванш олинди, дейиш мумкинми?
- Очиғи, бу учрашувга кубокдаги мағлубият учун алам олиш имконияти сифатида қарамагандик. Демак, реванш ҳақида гапириш ортиқча. Мақсадга эришиш учун чемпион бўлишимиз керак. Бунинг учун эса биринчи галда, «Пахтакор»ни мағлубиятга учратишимиз талаб этиларди. Олдимизда турган биринчи вазифани бажардик. Энди қолган баҳсларда ҳам бугунгидек шиддатни сақлаб қолсак, бас.
- Умуман, «Пахтакор - «Локомов» учрашувига «чемпионлик ўйини» сифатида қаралиши тўғрими?
- Йўқ! Чунки олдинда ҳали 6та тур бор. Кучли олтиликдан жой олган ҳар бир жамоа «Локомотив»ни енгиши мумкин. Чемпионлик расман қўлга киритилмагунига қадар хотиржам тортишга ҳаққимиз йўқ.
- Шундай, лекин чемпионлик маррасига жуда яқин келганинглар ҳам факт.
- Ҳа, имкониятимиз анча яхши. Лекин чемпионлик масаласи узил-кесил ҳал бўлганича йўқ. Қолаверса, кучли олтиликдаги ҳар бир жамоада ўзига яраша мақсади бор. Умуман, камида 2та таъқибчимиз ҳали чемпионликдан умид узмаган.
- Демак, «Пахтакор» билан тенг миқдорда очко тўплаган «Навбаҳор» ҳам курашдан четда эмас, шундайми?
- Ҳа, «Навбаҳор» ҳам чемпионликдан умидвор. Унда камида 2-ўринни эгаллаш учун реал имконият бор.
- Қуйи гуруҳда ўйинлар расмиятчилик учун ўтказилаётгандек таассурот уйғотмоқда. Бу борада фикрингиз қандай?
- Иккинчи олтиталик доирасидаги учрашувларни ҳам имкон қадар кўриб боряпман. Шахсан менда сиз айтган таассурот йўқ - ўйинларда шиддат кўзга ташланяпти. Тўғри, ўткинчидек кўринган 1-2та учрашув бўлиши мумкин. Аммо умумий ҳолатга паст баҳо бериш нотўғри, менимча.
Камолиддин АЛИМОВ суҳбатлашди
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
