«Ювентус» ЕЧЛ гуруҳ босқичи доирасидаги «МЮ»га қарши беллашувга ҳозирлик кўраётган паллада хорижлик касбдошларимиз Миралем Пьянич билан бафуржа суҳбатлашишга муваффақ бўлишди. Футболчи уларга хунрезлик уруши арафасида турган собиқ Югославияни қай тариқа тарк этгани ҳақида гапириб берди.
90-йилларда 3-лиганинг «Дрини Зворник» клуби шарафини ҳимоя қилган Фахридин Пьянич мамлакатнинг турли нуқталарида тўп сургани боис, ижтимоий-сиёсий вазиятнинг кескинлашиб бораётганидан яхши хабардор эди. Шу сабабли футболчи яқинда дунёга келган тўнғич фарзанди - Миралем ва оиласини хавфсиз ҳудудга олиб кетиш тараддудида юрарди. Люксембургдаги дўстлари кўмагида Фахридин «Шиффланж» ярим профессионал жамоаси билан келишувга эришиб, бироз енгил тортди. Шарти - тўлиқсиз иш куни. Бундан ташқари, Пьянич бемалол рўзғор тебратиши учун клуб қўшимча иш билан таъминлашга ваъда берди. Бироқ режани амалга ошириш учун «Зворник» Пьянич шартномасини бекор қилиши ва сафарда талаб қилинадиган ҳужжатлар билан таъминлаши керак эди. Фахридиннинг икки уриниши самара бермагач, унинг рафиқаси - Фотима ишга киришди. У чақалоқ Миралемни кўтариб олганча «Зворник» офисига йўл олди. Табиийки, гўдак ҳеч нарсани тушунмасди. «Ойим Боснияни бутунлай тарк этишимизни истарди. Клубдагилар эса унинг илтимосини рад этишди. Айни шу паллада мен йиғлаб юборибман. Оқибатда мутасаддилар нима қилишни билмай қолишибди. Бироздан сўнг давлат котиби талабни қондиришга рози бўлибди: «Майли, шу чақалоқ ҳурмати ҳужжатларингизни бераман», - дея эслайди Пьянич.
Муаммони ҳал қилган ўша чақалоқ ҳозир 28 ёшда ва сешанба оқшомида «Олд Траффорд»ни йиғлатган «Ювентус»нинг муҳим қисми ҳисобланади. Гўдакликда тўкилган ўша беғубор кўз ёшлари у ва оила аъзолари ҳаётини тубдан ўзгартириб юборди. Зворникда юзлаб кишилар ҳаётдан бевақт кўз юмган, қолганлари бошпаналаридан жудо бўлишган пайтда Пьяничлар Люксембургда тинч-тотув турмуш неъматидан баҳраманд бўлишди. Туриннинг Континасса туманида қад ростлаган янги штаб-квартирада ота-онаси ҳақида ҳикоя қилар экан, Миралемнинг кўзлари тобора чақнаб борарди: «Ўша даврда улар жуда ёш эдилар - отам 22да, ойим 20да эди. Тақдир тақозоси билан улар бегона тилда сўзлашадиган қўшни давлатга қуруқ қўл билан йўл олишга мажбур бўлишди: 2 ёки 3 жомадондан бўлак ҳеч вақолари йўқ эди. Ҳа, ёш оила Люксембургдаги ҳаётини қайтадан бошлади. Тинимсиз меҳнат эвазига аста-секин ажойиб муҳитни яратишга муваффақ бўлишди. Ота-онам 27 йилдан бери тинч-тотув ҳаёт кечиришмоқда, камчиликлари йўқ. Люксембургда дунёга келган укам ва синглим яхши шароитда улғаймоқдалар. Бегона юртда шундай фаровон турмуш негизини яратган отам ва онам мен учун намуналар. Ҳар қандай юмушда улардан ибрат оламан».
Фахридин кундузи, Фотима тунда ишлашар, шу аснода Миралем ёлғизланиб қолмасди. Болакай ҳар куни отаси билан «Шиффланж» машғулотларига йўл оларди. Тез орада у отаси ёрдамида сафар сумкасини тартибга келтиришга одатланди. Айрим тенгдошлари учун машаққатдек туюлган юмушни Миралем завқ билан адо этарди. Хуллас, футболга бўлган қизиқиш шу зайлда шаклланиб, кун сайин ортиб борди.
«Отам худди мен каби ярим ҳимоя чизиғида тўп сурган. Сал улғайгач, унинг яхшигина савия соҳиби эканига амин бўлдим. Профессионал даражада бамайлихотир фаолият юритиш имконияти унда йўқ эди. Чунки отам, аввало, оила хавфсизлигини таъминлаш билан банд бўлди, футболни биринчи ўринга қўя олмади. Аммо менинг рисоладагидек футболчи бўлишим учун қўлидан келганича ҳаракат қилди», - дейди Миралем.
Отаси орзу қилган мақомга эга бўлиш учун кичик Пьянич «Шиффланж» ёшлари таркибидан «Метц», «Лион» ва «Рома» клубларигача бўлган масофани босиб ўтди. Ниҳоят, у «А» сериянинг доимий гранди таклифига ҳам сазовор бўлди.
Италиядагилар Пьянични «пианист» деб аташади. Аслида, у майдон марказидаги «солист»лар ҳаракатини бошқараётган дирижёрга кўпроқ ўхшайди. «Ҳар учрашувда ўнлаб «степ овер» ёки «бэк хил»ларни намойиш этадиган дриблинг усталари тоифасидан эмасман. Менга ўйиндаги содда ҳаракатлар кўпроқ ёқади. Айнан шу оддийлик футболни мафтункор спорт тури даражасига олиб чиқди. Бир қарашда жуда содда туюлган ҳаракатни рисоладагидек амалга ошириш аслида осон эмас. Бу ҳамманинг қўлидан келавермайди. Мен Зайниддин Зидан, Хави, Андрес Иньеста, Андреа Пирло каби юлдузлар ўйинларини яқиндан кузатиш шарафига муяссар бўлдим. Уларнинг барча ҳаракатлари оддий. Аммо ана шу оддийликка яширинган икир-чикирлар жамоа ўйинига самара бахш этади. Бу футболчилар вазиятни бошқалардан кўра теранроқ ҳис этадилар ва тўғри қарор қабул қиладилар. Якунда жамоа ўз мақсадига эришади», - дейди ярим ҳимоячи.
«Степ овер» каби финтлар хусусида гап кетганда, кўз олдимизда Криштиану Роналду гавдаланади: «Агар Криштианунинг Манчестердаги ва ҳозирги ўйинларини солиштирадиган бўлсак, унинг сезиларли даражада ўзгарганига гувоҳ бўламиз. Ортиқча элементлардан халос бўлган содда ўйин Роналдуни дунёнинг энг яхши футболчиси мақомига олиб чиқди. Чунки у ҳар бир ҳаракатидан самара олишни ўрганиб олди. Криштиану Скоулзнинг услуби, машғулотларда тер тўкишидан лол қолгани ҳақида кўп ўқиганман. Дарҳақиқат, Пол ўз ҳаракатларидаги оддийликка путур етказмаган ҳолда ажойиб узатмаларни ижро этарди. Ўйлашимча, Роналду Скоулзга ўхшаган футболчилардан андоза олган», - дейди Миралем.
Унинг ўзи ҳам жамоасидаги касбдошларидан кўп нарсаларни ўрганди. Масалан, Жуниньо Пернамбукано Миралемга стандарт зарбаларини ўзига хос услубда амалга оширишни ўргатди. Ваҳоланки, улар «Лион»да атиги бир мавсум ёнма-ён тўп суришганди. Лекин ана шу қисқа вақт ичида Пьянич тажрибали жамоадошидан 8-рақамни ҳам мерос қилиб олишга улгурди. Бу икки футболчи ўртасидаги дўстона алоқа ҳамон давом этмоқда. «Очиғи, Жуниньонинг бошқалардан фарқи шундаки, унинг зарбалари доимо аниқ бўларди. Шунинг учун ҳам Пернамбукано стандартлар қиролига айланди», - дейди Миралем.
2011 йилда «Рома»га ўтган Пьянич Италия «А» сериясида 15та голни стандарт вазиятлардан урди. Ҳа, ҳозир унинг имкониятлари бироз камайди, чунки Роналду билан ёнма-ён тўп сурмоқда.
Футболнинг норасмий таомилига кўра, жарима зарбаларини ўзига ишончи кўпроқ бўлган ўйинчи амалга оширади. Бу борада ҳозирча Португалия вакилига эътироз йўқ. Эҳтимол, Пьянични мавжуд ҳолат қониқтирмас, аммо у буни юзага чиқармаяпти. Миралем ўз услубини муносиб тарзда намойиш этмоқда. 2016 йилда «Ювентус» сафига ўтгунига қадар бирор марта чемпионликка эриша олмаганди.
«Чиройли футбол намойиш этадиган аҳил жамоаларни яхши кўраман. Сўнгги йилларда «Наполи» жуда мазмунли ўйин кўрсатмоқда. Лекин совринлар-у кубоклар, бахтиёр мухлислар қуршовидаги байрамлар «Ювентус»га насиб этди. Мавсум давомида рисоладагидек тўп сурсанг-у, якунда ҳеч нарсага эриша олмасанг, чарчоқ таъсиридан қутула олмайсан. Барча ҳаракатларинг беҳуда кетганига ачинасан. Самара бермаган савия силлани қуритиши табиий», - дейди Пьянич.
ЕЧЛ - сўнгги йилларда «Ювентус»га таслим бўлмаган ягона чўққи. Жамоа 4 йил ичида 2та финалга чиқди. Аммо совринни рақибига бериб қўйди. 2017 йилда Кардифф бевосита гувоҳ бўлган «Реал»га қарши баҳсда (1:4) Пьянич «Кекса синьора» сафида эди. Ўша ўйинда «дубл»га эришган Роналду энди у билан ёнма-ён тўп сурмоқда. Бу эса жамоа мухлисларига қўшимча умид бахш этди. «ЕЧЛ доимо «Ювентус» учун муҳим турнир бўлиб келган. Бу гал биз мусобақани охиригача муваффақиятли ўтказиш ниятидамиз. Лекин барчасини босқичма-босқич амалга оширмоқчимиз. Дастлабки марра - гуруҳ баҳсларини 1-ўринда якунлаш», - деди Миралем.
Албатта, воқеалар ривожи қандай кечиши номаълум. Лекин «Олд Траффорд»дан муҳим 3 очко олиб қайтган «Ювентус»нинг 100 фоизли натижа билан дадил одимлаётгани Пьяничнинг эътирофи шунчаки пуч орзу эмаслигини исботлаб турибди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
