Москванинг «Локомотив» клуби ҳимоячиси, айни пайтда «Крилья Советов» сафида ижара асосида тўп сураётган Виталий Денисов «Советский спорт» нашрига интервью берди. Суҳбат давомида, табиийки, унинг Осиё Кубогига арафасидаги Ўзбекистон терма жамоаси таркибига жалб этилмагани ҳақида ҳам сўз борди.
– Бир вақтлар «Валенсия»ни ЕЧЛ финалига олиб чиққан, ЖЧ-2018га эса Миср термаси билан келган таниқли аргентиналик Эктор Купер билан танишишга улгурдингизми?
– Мен жамоанинг битта йиғинида ва бир ўйинида қатнашдим, аммо кейин жароҳат олдим. Навбатдаги муҳим йиғинга эса Купер мени чақирмади. Ҳозир терма жамоа Туркияда шуғулланяпти. Мен у ерда эмасман. Аммо соғлиғим билан муаммо йўқ, аллақачон тикланиб бўлганман.
– Эҳтимол, Купер РПЛни у қадар ҳам синчиклаб кузатиб бормаётгандир?
– Яхшиси унинг ўзидан сўраш керак. Купердан чақирув олмаган футболчи ягона мен эмасман. Корея чемпионатидаги Санжар Турсунов, «Оренбург»да доимий равишда ўйнаб келаётган Вадим Афонин ҳам жамоа сафида эмас. Уларни ҳатто кенгайтирилган таркибга ҳам киритишмади.
– Осиё Кубогини Миллатлар лигасининг Россия термаси иштирок этган «B» дивизиони даражасига тенглаштирса бўладими?
– Мен Миллатлар лигаси билан эмас, Евро билан параллель ўтказган бўлардим. Осиё термалари таркибида Европадагидек юлдузлар кўп эмаслиги тушунарли, аммо етакчи жамоаларнинг савияси анча юқори. Англия, Франция, Германия чемпионатларида тўп сурувчи рақиб футболчиларга қарши ўйнашимизга тўғри келарди.
– Ўзбекистон терма жамоасининг Осиё Кубогидаги энг юқори натижаси 2011 йилда эгалланган 4-ўрин бўлиб қоляпти. Яқин келажакда медаллар учун кураша олиши қанчалик ҳақиқатга яқин?
– Ҳозир Купер қайсидир босқичда янги жамоани қуряпти. Ўз услубини ўйинчиларга сингдириш учун унга вақт керак. Бир лаҳзада муваффақият қозонишни кутиш ноўрин. Улардан ҳеч ким буни талаб қилаётгани ҳам йўқ.
Суҳбатнинг қуйида келтирилаётган биринчи қисмида Денисовнинг клуб футболидаги фаолияти ҳақида сўз кетган. Эслатиб ўтамиз, Виталий ўтган мавсум «Локомотив» сафида Россия чемпиони бўлган, ёзда эса бир йиллик ижара шартномаси асосида «Крилья Советов» таркибига ўтган эди. У РПЛнинг ортда қолган 17та туридан 6тасида майдонга тушди.
– Нега «Локо» билан йиғинда қатнашиб, «Крилья»га ижара асосида йўл олдингиз?
– Ёшим 31га бориб қолди. Менинг ёшимдагилар захирада кутиб ўтириши қийин, доимий ўйин амалиётига эга бўлишни исташади. Лекин жароҳат олгач, афсуски, асосий таркибдаги муқим ўрнимни йўқотдим. Шу омил Самарага келишимда асосий ролни ўйнади.
Шунга урғу бермоқчиманки, мен «Локо»ни ҳеч қандай келишмовчиликсиз тарк этдим. Агентим телефон қилиб, Тихонов мени жамоада кўришни истаётгани ҳақида айтди. Бу вариант мени дарҳол қаноатлантирди. Клублар ҳам тезда келишиб олишди.
– Сизни Тихонов чақирган эди, ҳозир эса Божович қўл остида ўйнаяпсиз.
– Божович «Локомотив»га бош мураббий бўлиб келганида яқиндан танишганмиз. Шунинг учун ҳам мураббий алмашишини хотиржам қабул қилдим. Майдонга тушишда давом этяпманми, демак, Божович менга ишонмоқда.
– «Крилья» сизни мавсум ижарага олган. Шундан сўнг Москвага қайтишни истармидингиз?
– Бу ерда фақат истакнинг ўзи камлик қилади. «Локомотив» томонидан қизиқиш бўлиши керак. Буни бош мураббий ҳал қилади. Ҳозир «Крилья»га максимал даражада фойдам тегиши ҳақида ўйлаяпман.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
