АПЛнинг амалдаги чемпиони «Манчестер Сити» ўйин бобида ҳар қанча қудратли ва мукаммал кўринмасин, жорий мавсум «тож»ни «Ливерпул»га топширади, шекилли. Чунончи, Хосеп Гвардиола яратган механизм гоҳ-гоҳида панд бермоқда ва «шаҳарликлар» қимматли очколардан қуруқ қолишяпти. Йўқ, қуйидаги мақола «Сити»нинг омадсиз ўйинлари эмас, балки чўнтакларидан гўёки, пул «оқиб» турувчи шайхлар таклифини қабул қилмаган етук юлдузлар ҳақида. Очиғи, моддий манфаат олдида бош эгмаган бу футболчилар ҳурматга сазоворлар. Иккинчи томондан эса, эҳтимол, улар рад этишмаганида, Гвардиола «Сити»си чиндан ҳам, идеал жамоага айланармиди?
1. Лионель МЕССИ
Масала баҳоси: 330 млн. евро
Криштиану Роналду аргентиналик рақиби Испания Примеросидан бош-қа лигада ўйнамаганини ўзгача оҳангда эслатиб туради. Аслида Лео бундай имкониятга эга бўлганди. Хосеп Гвардиола «Сити» ва Месси ҳақидаги саволларга ҳамиша бир хил жавоб беради: «Йўқ, ундан ҳеч қачон жамоамга ўтишини сўрамаганман, раҳбарият олдига ҳам Лионелни сотиб олиш шартини қўймайман». «Манчестер Сити» президенти Халдун ал Муборак эса, бир сафар очиқроқ гапирганди. Унга кўра, «шаҳарликлар» айнан Гвардиола воситачилигида аргентиналик даҳочага ўша вақт «Барселона»да олаётганидан бирданига икки баравар кўп маош таклиф этишган, аммо у маълум муддат ўйлаб кўргач, Англияга кўчиб ўтишдан бош тортган.
2. Виржиль ван ДЕЙК
Масала баҳоси: 84 млн. евро
«Саутгемптон» ва «Ливерпуль» вакиллари голландиялик ҳимоячи трансфери бўйича келишувга эришишгач, «Сити» шунчаки, ҳафсаласизликка тушгандир. «Шаҳарликлар» раҳбариятининг ван Дейк ҳақидаги ўзаро суҳбатлари ҳаттоки, клуб ҳаётини ёритган «Ҳаммаси ёки ҳеч нарса» номли ҳужжатли фильмга ҳам тушган. Ҳа, Гвардиола яна бир бақувват марказий ҳимоячига эҳтиёж сезган, аммо «Сити» хўжайини нарх (75 млн. фунт)ни эшитгач, ҳайратини яширолмаган: «Нима, ҳазиллашяпсизларми?» «Қизиллар» эса буни ҳазилга йўйишмади ва голландияликни футбол тарихидаги энг қимматбаҳо ҳимоячига айлантиришди. «Аччиқ чайнаш» зое кетмади - ўтган мавсум «Сити»ни ЧЛдан четга сурган «Ливерпуль» энди уни АПЛ тахтидан туширмоқчи, албатта, ҳимояда метиндек турган ван Дейк ёрдами билан.
3. Дани АЛВЕШ
Масала баҳоси: 0, эркин агент
Ўнг қанотга муносиб ижрочи қидирган Гвардиола биринчи навбатда, эски танишига эътибор қаратди. Бироқ бразилиялик футболчи собиқ мураббийига дарҳол рад жавоби берди. Дани кейинчалик «ПСЖ»га рўйхушлик билдирди, «шаҳарликлар» эса Кайл Уокер ва Данилони сотиб олишди. Қизиқ, Алвеш Парижни нега Манчестердан устун кўрган? Маълум бўлишича, бразилияликнинг ёш турмуш ўртоғи (албатта, модель) модалар пойтахтини танлаган экан. Ҳар ҳолда, Алвеш ўз баёнотида Гвардиоладан узр сўраш баробарида «оилавий қарор» туфайли «Манчестер Сити»да ўйнолмаслигини ошкора тан олганди.
4. Эден АЗАР
Масала баҳоси: 170 млн евро.
«Манчестер Сити» тепасидаги шайхлар бельгиялик хавбек учун ҳам мисли кўрилмаган даражада кўп пул сарфлашга тайёр туришганди. Аммо Азарнинг ўзи бир неча интервьюларида «Реал» либосини кийишга иштиёқи баландлигини шаъма қилди. «Шаҳарликлар» шунинг таъсиридами, АПЛ юлдузларидан бирининг фамилиясини элит рўйхатларидан ўчиришди. Қаранг, «Челси» яқинда «Манчестер Сити»ни мағлубиятга учратгач, ярим ҳимоячи дарҳол тилига эрк берди: «Гвардиола ихтиёрида ажойиб жамоа бор, фақат унга Азар етишмаяпти». Нима, бу «шаҳарликлар» Эдендан тезда умид узишгани учун киноями?
5. ЖОРЖИНЬО
Масала баҳоси: 50 млн. евро
Фернандиньо май ойида 34 ёшга тўлади. Давид Сильва ҳам навқирон эмас (33 ёш), уни жароҳатлар қийнай бошлади. Ҳар иккиси бошида марказ эмас, ҳужумга яқин нуқтада ўйнарди, худди Бернарду Сильва ва Кевин де Брюйне каби. Қисқаси, Гвардиола узатмалар ва комбинацион футбол билимдони қидиргани аниқ, демакки, Жоржиньога ҳам қизиққан. Бироқ трансфернинг амалга ошмаганига маълум маънода мураббийнинг ўзи айбдор. Тўғрироғи, Хосеп италиялик Маурицио Саррини Англияда ишлашга чорлади, «Челси» эса мураббий учун товон пули тўлашга рози бўлди, фақат Жоржиньони ҳам қўйиб юборишни сўради. Бразилиялик итальяннинг АПЛдаги дебюти шуни кўрсатдики, у «Сити»ни кучайтириши мумкин эди. Тўғри, Жоржиньо онаси - дони Мария Тереза маслаҳатини инобатга олиб, «Челси»ни танлаганини ҳам айтиш ўринли.
6. ФРЕД
Масала баҳоси: 50 млн. евро
«Шаҳарликлар» Украина чемпионати вакилларига юқори баҳо беришади. Улар Яя Туре ва Фернандиньо трансферидан хулоса чиқариб, ўрта чизиқда Донецк клубининг яна бир аъзосини кўрмоқчи бўлишди. Бироқ Фред Манчестернинг «қизил» томонини танлаб, Гвардиолани роса ранжитди. Эҳтимолки, «МЮ» футболчига кўпроқ таклиф қилгандир... Факт шуки, бразилиялик футболчи «қизил иблислар» сафига қўшилди, аммо ҳозирча ўз иқтидорини тўлиқ намо-йиш этганича йўқ.
7. Алексис САНЧЕС
Масала баҳоси: 39 млн. евро
Кўпчиликкка маълум январь воқеаси. «Арсенал» чилилик тўпурарни сотишга чоғланганида, «Сити» бирданига даъвогарлар қаторига қўшилди. Аммо Санчес охир-оқибат, таклифни рад этгач, Гвардиола алам устида тезда бошқа қанот ҳужумчиси топди - Риёд Маҳрез. Ваҳоланки, «Сити» раҳбарияти чилиликнинг шахсий шартнома бўйича талабини қабул қилиб, унга ҳафтасига 250 минг фунт миқдорида маош беришга кўнганди. Бироқ орага «МЮ» суқулиб киргач, ҳаммаси ўзгарди. «Қизил иблислар» футболчиларининг Алексисни яхши кутиб олишмагани сабаби эса тайин - клубда унга нега 500 минг фунт (ҳафтасига) тўлашга рози бўлишганини ҳеч ким тушунмади.
8. Поль ПОГБА
Масала баҳоси: 100 млн. евро
2016 йил ёзида «Ювентус»нинг ўша вақтдаги директори Беппе Маротта клуб офисига Манчестердан таклиф келганини тасдиқлади, у «Юнайтед» эмас, «Сити»дан эди. Хуллас, Гвардиола раҳбариятга мурожаат қилиб, Погбани зудлик билан сотиб олишни сўраган экан. Эҳтимолки, Поль каталониялик мутахассис қўл остида ўйнашга қарши чиқмагандир, аммо унинг агенти - Мино Райола учун трансфер суммаси муҳим эди. Якуний хулоса шуки, «МЮ» бу масалада ҳам Гвардиола мақсадини бузди...
9. Марк-Андре тер ШТЕГЕН
Масала баҳоси: 25 млн. евро
Аслида «Манчестер Сити» кўплаб номдор дарвозабонлар хизматига қизиққан, чунки Жо Харт ишончни оқлай олмаганди. Умуман, «шаҳарликлар» вақтида Жанлуижи Буффонни ҳам чақиришган, фақат буюк кипер ўша пайт «Ювентус»дан кўнгил узолмаган. Марк-Андрега келсак, унинг «Боруссия» М. жамоасида узоқ вақт қолмаслиги олдиндан маълум эди. Ана шу ҳолатда «Барселона»нинг немис киперига атиги 12 млн. евро тўлагани ғалати. Гвардиола эса иқтидорли дарвозабонни ўз томонига оғдиролмагач, Клаудио Бравони чорлади, фақат бундан ҳеч қандай наф чиқмади.
10. Френки де ЙОНГ
Масала баҳоси: 80 млн. евро.
Энг охирги мисол. Ҳаммаси оддий голландиялик иқтидорнинг отаси «Барселона»га мойиллик билдирди. Яъни у ўғлини кўк-анорранг тусли футболкада кўришни хоҳлади. Френкининг ўзи ҳам болалигидан айнан «Барса»га мухлислик қилишини кўп бора айтганди. Зеро, Голландияда бу жамоага нисбатан бошқача меҳр шаклланган - Йохан Кройфф таъсирида, албатта. Лекин айтишларича, Томас Тухель бошида уни «ПСЖ»да ўйнашга кўндирган эмиш, фақат якун бошқача бўлди. Демакки, «Манчестер Сити»да имконият у қадар катта эмасди.
Қизиқ, агар шу футболчилар «Сити»га рад жавоби беришмаганида ёки клуб уларни сотиб олишда харажат чекловига дуч келмаганида, Хосеп Гвардиола таркиби қандай кўриниш оларди? Мана, эҳтимолий вариантлардан бири:
Марк-Андре тер Штеген - Дани Алвеш, Жон Стоунз, Виржиль ван Дейк, Бенжамин Менди - Поль Погба, Жоржиньо, Кевин де Брюйне - Лионель Месси, Серхио Агуэро, Эден Азар.
Шундай тақдирда қуйидаги футболчиларга эҳтиёж сезилмасди, балки: Раҳим Стерлинг, Риёд Маҳрез, Эмерик Ляпорт, Кайл Уокер.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
