Спорт федерациялари фаолияти қайта кўриб чиқилади
Нурафшон шаҳрида Тошкент вилоятида жисмоний тарбия ва спортни ривожлантириш масалалари, соҳадаги камчиликларни бартараф этиш чораларига бағишланган мулоқот ташкил этилди.
Вилоят ҳокими Ғуломжон Ибрагимов иштирок этган учрашувда спорт соҳаси жамоатчилиги, ҳудудда фаолият кўрсатаётган барча спорт федерацияларининг раҳбарлари иштирок этди.
Бу ҳақда ЎзАга Тошкент вилояти ҳокимлиги ахборот хизматидан маълум қилинди. Хабарда қайд этилишича, учрашувда ҳоким вилоятда фаолият кўрсатаётган спорт функционерлари ва мураббийларнинг муаммоларини тинглади. Ҳар бир федерациянинг моддий-техник имконияти, эришган натижалари, келгуси режалари муҳокама қилинди.
Бугун Тошкент вилояти спорт жамоатчилигини қандай муаммолар қийнаяпти? Учрашувда шу ва соҳага дахлдор бошқа саволлар ўртага ташланди. Очиғини айтганда, вазият кўнгилдагидек эмас. Аксарият федерациялар ночор бир вазиятда, ўз ички имкониятларидан келиб чиқиб базўр жон сақлаб келмоқда. Масалан, вилоят енгил атлетика федерациясининг машғулотлар ўтказадиган алоҳида майдони йўқ. Бадиий гимнастика федерацияси жойи йўқлигидан бошқа бир ташкилот ҳудудида, оғзаки келишувга кўра ижара ҳақи бермаслик шарти билан (чунки бунга маблағи йўқ) фаолият кўрсатиб келяпти. Қачондир бириктирилган ҳомийлар бугун турли важларни рўкач қилиб, ўзини олиб қочяпти.
Оғир атлетика федерацияси Чиноздаги болалар ва ўсмирлар спорт мактаби директори томонидан бошқарилади. Алоҳида жойи йўқ. Умуман, кўплаб федерацияларга раҳбарлик қилиш ҳудудларда фаолият олиб бораётган болалар ва ўсмирлар спорт мактаблари директорларининг чекига тушяпти. Уларнинг қарийб барчаси ойликсиз, азбаройи спортга бўлган муҳаббати, иштиёқи туфайли федерация ишларини имкон қадар ташкил этиб келяпти. Баъзи спорт федерацияларининг раҳбари сайланмаган.
Хабарда соҳадаги ана шу каби муаммолар қайд этилиб, йиллар давомида тўпланиб қолган масалалар, вазиятни ўнглаш, жисмоний тарбия ва спортга раҳбарлик қилиш ишларини тизимли равишда йўлга қўйиш масалалари кенг муҳокама қилингани айтилади.
Вилоят ҳокими ҳар бир спорт федерациясининг йиллик молиявий сарф-харажатлари учун маблағ ажратиш бўйича аниқ чоралар кўришини маълум қилди.
– Бу йил вилоят бюджети ҳисобидан ёки ҳомийлар жалб этиш йўли билан ёрдам берармиз. – дейди вилоят ҳокими Ғуломжон Ибрагимов. – Аммо барча спорт федерациялари келгуси йилда яна ҳомийга кўз тикиб турадиган бўлса, у ҳолда ишимизда нимадир хатолик борлигини англатади. Спорт жамиятлари учун яратилган молиявий имкониятлар, солиқ имтиёзларидан унумли фойдаланиш керак. Қўшимча маблағ ишлаб топиш йўлларини биргаликда ўйлайлик. Вилоят маъмуриятидан қандай ёрдам керак бўлса, биз тайёрмиз. Федерациялар қошида тадбиркорлик билан шуғулланаман десангиз, лозим бўлса, бир сўм эвазига сизга бино, ер ажратамиз. Бу қуруқ гап эмас, аниқ таклиф.
Шунингдек, спорт федерацияларининг географик жойлашувига ҳам эътибор қаратилиб, улар асосан, шаҳарлар ҳудудларида жойлашгани оммавий спортни ривожлантиришга тўсқинлик қилиши таъкидланди. Яқин йилларда вилоят спорт жамоатчилиги Нурафшон шаҳрига тўлалигича кўчириб келинади. Барча федерациялар вилоятнинг маъмурий марказида фаолият кўрсатади. Аммо унгча бўлган оралиқ вақт ҳам катта давр. Олдинда эса олимпиада ўйинларига муносиб тайёргарлик кўриш, аҳоли ўртасида жисмоний тарбияни кенг оммалаштириш вазифаси турибди.
Йиғилиш давомида вилоят ҳокими масъулларга барча спорт федерацияларининг паспортини яратиш, республикада мавжуд, бироқ, вилоятда йўқ бўлган бошқа спорт федерациялари ишини ҳам ташкил этиш бўйича топшириқ берди. Қайд этиш жоиз, айни пайтда вилоятда авто-мотоспорт, синхрон сузиш, регби, чим устида хоккей, қишки спорт турлари каби йўналишларда федерациялар фаолият олиб бормаяпти.
Мулоқотда келгусида ҳудудда спортни ривожлантиришнинг бош ғояси қандай бўлиши кераклиги ҳақида тўхталиб ўтилди. Унга кўра, спорт жамоатчилиги йирик мусобақаларни мўлжал қилибгина ишламаслиги керак. Бош мақсад – иложи борича кўпроқ аҳолини спортга жалб этиш бўлиши лозим. Масала шундай қўйилган тақдирдагина ҳудудда чемпионлар, спорт усталарининг чинакам мактаби яратилади.
Манба: UZA
Киритилди: 19:42, 01.04.2019. Ўқилди: 1520 марта. Фикрлар: 1 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бўлимга тегишли қизиқарли хабарлар
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
