Ўзбекистон терма жамоаси Саудия Арабистонига қарши жаҳон чемпионати саралаш учрашуви олдидан Қирғизистон термаси билан ўртоқлик учрашувини ўтказди. Табиийки, бу рақиб кўплаб саволларни юзага келтирди. Ўйини Саудия Арабистониники билан умуман ўхшамайдиган жамоа билан ўйнаш мантиқсизликдек кўринди. Аммо...
ЎЗИГА ХОС СИНОВ
Вадим Абрамов, аслида, Қирғизистонга қарши умуман бошқача ўйин кўрсатишни ният қилган, деб ўйлаб қолдим. Аммо унинг талаби бажарилмай, ўйин телеэкран орқали намойиш этиладиган бўлганидан кейин позициясини ўзгартирган. Аслида, Абрамов қирғизларга қарши ўйинда ўзи ўйлаган тактикаларни синовдан ўтказишни ният қилганди, аммо якунда бу беллашув шунчаки иккинчи таркибни синовдан ўтказиш учун ўтказилган баҳс вазифасини бажарди.
Қирғизлар билан ўйиннинг фойдали томони, бугун Абрамов захирадаги футболчилардан ким қандай даражада эканлигини аниқлаб олди. Таассуфки, асосий таркибда туширилган футболчиларнинг 70 фоизи ўзини оқламади. Бундан кўриниб турибдики, ҳали захирадан майдонга тушиб, ўйинни кучайтира оладиган футболчилардан иборат таркибни ҳам шакллантириб олиш керак.
Қувонарлиси, яхшими, ёмонми, Абрамов терма жамоага янги қон олиб киряпти. Кўплаб футболчиларга имконият бериляпти. Терма жамоа ўзини кўрсатиш учун рақобат майдонига ҳам айланди ҳатто. Бу эса фойдадан холи эмас
ҲЕЧ ҚАНДАЙ ТАКТИКА ЙЎҚ
Бугунги ўйинда мен ҳеч қандай тактика кўрмадим. Ваҳоланки, Вадим Абрамов арабларга қарши тактика ўйлаб қўйганини айтган ва ушбу тактикани Қирғизистонга қарши ўйинда синаб кўрмоқчи эканлигини таъкидлади. Лекин маълум бўлдики, Абрамов ушбу тактикасини ўйинга сингдирмаган. Қолаверса, “Ҳеч қандай янгилик йўқлиги ҳам бир янгилик”, деганларидек, бугунги ўйинда ҳеч бир тактикани қўлламаслик ҳам бир тактика бўлди.
МАҲОРАТ СЎЗИНИ АЙТДИ
Ўйиннинг иккинчи бўлимида майдонга туширилган асосий таркиб футболчилари ўз сўзини айтишди. Шу ўринда Вадим Абрамов ва мухлисларнинг фикри бир жойдан чиққани, аниқроғи, мухлисларга яққол билинган нарсани мураббий ҳам кўргани бизни қувонтирди. Ваҳоланки, бу жиҳат олдинги мураббийлар даврида муаммо эди.
КЕРАКСИЗ ЖИҲАТИ
Қирғизистонга қарши ўйин бемаврид ташкиллаштирилган меҳмондорчиликдек туйилди менга. Чунки Абрамов ва МТЖ учун ушбу баҳс Саудия Арабистонига қарши ўйинга тайёргарлик вазифасини тўлиқ ўтамагани маълум. Унинг ўрнига эса услуби арабларникига ўхшаш бирор-бир терма жамоа билан ўртоқлик ўйини ўтказиб, Саудия Арабистонига қарши ўйинда танланадиган таркиб ва тактикани тайёрлаб олиш лозим эди.
Нима бўлганда ҳам, Қирғизистонга қарши ўйин фойдадан холи бўлмади. Абрамов энди захирадан кимларни туширишни, қайси футболчилар ўз устида кўпроқ ишлаши кераклигини билади.
Фикримиз сўнггида шуни алоҳида таъкидлашни истардикки, бугунги ўйин ҳақиқий МТЖнинг ўйини эмас. Шунинг учун танқид қилишда бироз шошилманг. Абрамов шогирдларининг асл кучи бу эмас. Агар ўйин бошиданоқ асосий таркиб майдонга ташланганида ҳисоб ва ўйин умуман бошқача бўларди. Аммо ўйини Саудиянинг ўйинига мутлақо ўхшамайдиган жамоага қарши аҳамиятсиз ўйинда Саудияга қарши баҳсда майдонга тушиши кутилаётган футболчиларни майдонга тушириш тўғри бўлмасди.
Абрамовга ишонишда давом этинг, у ниманидир эплай оладиганга ўхшаяпти. Ишқилиб, шундай бўлсин.
Низомжон ИСЛОМОВ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Хоразм
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
