Суперлиганинг янги мавсуми старти «Бухоро» учун омадсиз келмоқда. Жамоа ҳозирча турнир жадвалининг сўнгги ўринларида бормоқда. Яқинда клуб матбуот хизмати «Бухоро» бош директори Жамшид Ботиров билан суҳбат уюштирди. Қуйида мазкур интервью билан танишишингиз мумкин.
- Жамшид Меҳмонович, клуб раҳбари этиб тайинланишингиз қандай амалга ошди?
- Авваламбор, барчани кириб келаётган Наврўз байрами билан табриклайман. Футбол клуби раҳбарлигига келишимга вилоят ҳокимлигидаги футболга масъул инсонларнинг таклифи сабаб бўлди. Улар вилоятимиз бош жамоасини тубдан янгилаш, маҳаллий ёшларга кўпроқ имконият бериш кераклиги, мени ёшлар билан ишлаш ҳадисини олган мутахассис сифатида билишларини айтиб, ушбу лавозимга айнан мени тавсия қилишди. Албатта, вилоят футболига бефарқ эмаслигим, қолаверса, клуб тизимидаги «Бухоро» футбол мактаби раҳбари ва мураббийи сифатида бир қанча тарбияланувчиларимизни вилоятимиз бош жамоаси, ўринбосарлар таркибига етказиб берганлигимиз инобатга олинди. Жамоа таркибини деярли тўлиқ биламан. Бундан ташқари, раҳбарлар ташаббуси билан «Бухоро»ни яқин келажакда тўлиқ ўзимизнинг ёш тарбияланувчиларимиз ҳисобига шакллантириш режаси менга маъқул келганлиги сабаб ушбу лавозимда ишлашга розилик бердим.
- Ўз вақтида футболчи ва мураббий сифатида фаолият олиб боргансиз. Шу ҳақда ҳам гапирсангиз.
- Албатта, катта футболдаги қадамларимни Ўзбекистон 1-лигасида иштирок этган Бухоронинг «Локомотив» ва «Ситора» жамоаларида бошлаганман. Мураббийлик фаолиятимни эса мамлакатимизнинг машҳур, биринчилардан бўлиб ташкил этилган «Машъал» клубига қарашли футбол академиясида бошлаганман. 2011 йили Бухоро вилояти ҳокимининг таклифига биноан, «Бухоро» клубига қарашли футбол мактабига раҳбар этиб тайинланганман.
- «Бухоро» жамоаси олдига раҳбарият томонидан қандай вазифа қўйилган?
- «Бухоро» - Ўзбекистонда ўз номи ва обрўсига эга клуб. Албатта, ҳозир таркибимиз 70 фоизга янгиланганлигини инобатга олган ҳолда, зиммамизга Суперлигада муносиб қатнашиш, шунингдек, келажакда мамлакат чемпионатида рақобатбардош жамоа шакллантириш вазифаси юклатилган. Айни пайтдаги молиявий имкониятимизни инобатга олган ҳолда, таркибимизга 4 нафар легионер, мамлакатимизнинг турли жамоаларида фаолият юритган 8 нафар ўзбекистонлик футболчилар жалб этилди. Бундан ташқари, ихтиёримизда 14 нафар маҳаллий ёшлар бор. U-18 ва U-21 жамоаларимизда Бухоро футбол мактаби тарбияланувчилари тўп суришмоқда.
- «Бухоро»ни олдинда нималар кутмоқда? Режа ва мақсадлар хусусида маълумот берсангиз.
- Келажакда жамоа таркибида тўлиқ бухоролик ёшлар иштирокини таъминлаш ва турли ёшдаги термаларимизга маҳаллий иқтидорли ёшларни етказиб беришни мақсад қилганмиз.
- Футбол биринчи навбатда мухлислар учун ўйналади. Жамоа ишқибозларига нима деган бўлардингиз?
- Албатта, футболни мухлисларсиз тасаввур қилиш қийин. Шундай экан, биз ўз ишқибозларимизни қадрлаймиз, ҳурмат қиламиз. Ҳозир уларни салбий натижаларимиз билан бироз ранжитиб қўймоқдамиз. Қолаверса, мухлисларимизга бироз ноқулайликлар келтириб чиқаряпмиз, сабаби, жамоанинг уй учрашувлари ўтказиладиган марказий стадионда таъмирлаш ишлари олиб борилаётганлиги сабабли, айрим уй учрашувларини Муборакдаги Баҳром Вафоев номидаги аренада ўтказишга мажбурмиз. Буни «Бухоро» учун уй учрашувлари деб бўлмайди, нейтрал майдонда ўйнаганимиз сабабли, ўзимизни сафарда ўйнаётгандек ҳис қиламиз. Мавжуд ноқулайликлар ва салбий натижалар учун мухлислардан узр сўрайман. Умид қиламизки, яқин вақтлар ичида вазиятни ижобий томонга ўзгартирамиз. Ишқибозларимизга бошқа шаҳарда ўтадиган ўйинларга бориб-келишлари учун имкон даражасида шароит яратиб берамиз. Албатта, биз мухлисларнинг қўллаб-қувватлашларига муҳтожмиз. Чунки, кўриб турганингиздек, қуръа бизга кетма-кет сафар ўйинлари ва кучли рақибларни рўпара қилмоқда. Ушбу учрашувларда максимал натижаларга эришишга ҳаракат қиламиз ва мухлисларимизни хушнуд этамиз, деган умиддаман.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
