“Манчестер Юнайтед” мураббийи Оле Гуннар Сульшер кечаги (3:0) ўйин ҳақида фикр билдирар экан, ўйин қаҳрамони Антони Марсиал ҳақида тўхталиб ўтди.
“Антони имкониятлардан яхши фойдаланди, лекин унинг ҳамманинг эътиборидан четда қолаётган жиҳати – рақиб ҳимоясига прессинг уюштириши мақтовга лойиқ. Бу борада ҳам у жуда фойдали ҳаракат қилди”.
Очиғи, шу фикрни дастлаб ўқиганимда, Сульшер бу гапларни атайлаб, истеҳзо билан айтяпти ва шу жиҳатдан кўпроқ ҳаракат қилиш кераклигини Марсиалга билдириб қўймоқда, деб ўйладим. Чунки “МЮ” ўйинларини кузатсангиз франциялик ҳужумчи тўпсиз энг пассив ҳаракат қилаётганга ўхшайди, кўпинча, бор имкониятини ишга солмаётгани ҳақида фикрлар кўп бўлади.
Йўқ, аслида Сульшер ҳаммасини тўғри айтган, Антони айнан мана шу йўналишда ўсиб бораётгани факт экан. Масалан, 2017/18 мавсумида, Жозе Моуриньо қўл остида, у бир ўйинда ўртача 3.12 марта майдоннинг олдинги учдан бир қисмида прессинг амалга оширган. 2018/19, яъни Моуриньо ва Сульшер ишлаган мавсумда эса, бу кўрсаткич 3.94 гача кўтарилган.
Бу йили эса, Марсиал энг яхши мавсумини ўтказмоқда. Ҳали олдинда ўйинлар кутиб турибди, лекин у аллақачон “МЮ” даги АПЛ голлари (14) ва барча мусобақалардаги голлар (19) сони бўйича шахсий рекордини ўрнатди. Юқорида тилга олинган ўртача прессинг кўрсаткич эса 8.63 ни ташкил қиляпти. Албатта, бу билан Сульшер қўл остида француз ҳар жиҳатдан етук футболчига айланаётганини айтиш мумкин.
Дарвоқе, Антони Марсиал яна бир қора анъанага чек қўйди. 2013 йилги чемпионлик ўйинида Робин ван Персининг хет-тригидан буён, ўтган 7 йилда “МЮ” футболчилари АПЛ доирасида хет-трик амалга ошира олмаётган эдилар. Марсиалнинг уч голи ҳам унинг фаолиятидаги илк хет-трик бўлиш билан бирга, мана шу нохуш анъанани тугатди.
АПЛдан ташқари ўйинларда Фергюсон давридан бери уч бора хет-трик қайд этилган. 2014 йилда ЕЧЛ плей-оффда Робин ван Перси “Олимпиакос” дарвозасига, 2015 йилда Уэйн Руни “Брюгге” билан ЕЧЛ саралашида, ҳамда 2017 йилда Златан Иброҳимович Европа Лигаси доирасидаги “Сент-Этьен”га қарши учрашувда.
Қаҳрамон Асланов.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Динамо
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
