Ижтимоий тармоқларда «Арсенал» яримҳимоячиси Томас Парти Лондондаги тунги клублардан бирида кўнгилхушлик қилаётган видеоси пайдо бўлди. Ушбу видео шимолий ирландиялик модель, Виктория Ковалшнякнинг инстаграм профилида, душанба, тунги соат 3 да жойланган.
Видеода юлдузнинг ўзи ва кўплаб ниқобсиз ҳамроҳлари иштирокида рақс тушаётгани ҳамда шампан ичкилигидан истеъмол қилиши акс эттирилган. Энг қизиғи, 27 ёшли ганалик футболчи, бу ишни жамоаси йигирма беш йил ичида илк марта еврокубокларсиз қолганидан бир неча соат ўтиб содир этган.
Англияда тунги клублар фаолияти юзасидан ҳали ҳам чекловлар амал қилмоқда. Агарда кимдир 15 кишидан ортиқ одам тўпланишига сабаб бўлса, 800 фунт жаримага тортилади. Бордию, кеча ташкилотчилари 30 дан ортиқ одамни бир жойга йиғгудек бўлса, иштирокчилардан 10 минг фунтдан жарима ундирилади.
Чекловлар амал қилаётган бир пайтда, Томас Партининг қоидабузарлиги кўплаб танқидларга сабаб бўлди. «Арсенал» раҳбарияти ушбу масала жиддий кўриб чиқилиши ҳақида баёнот берди.
Лондон клуби мухлисларидан бири The Sun'га берган интервьюсида: "Биз чорак аср ичида илк марта евромайдонда тўп суришдан қуруқ қоляпмиз. Агар Томаснинг ўрнида бўлганимда ундан кўра уйда қолиб, кейинги йили яхшироқ ўйнаш кераклиги ҳақида бош қотирган бўлардим", деб афсус билан фикр билдирди.
Эслатиб ўтамиз, Томас Парти ўтган йили, Мадриднинг «Атлетико» клубидан 45 миллион фунт-стерлинг эвазига харид қилинган эди.
Матнда хатолик топсангиз, ўша хатони белгилаб, бизга жўнатинг (Ctrl + Enter).