ПФЛ директори Диёр Имомхўжаев «Оқтепа» клубининг Про лигани эрта тарк этишига ўз муносабатини билдирди.
«Оқтепа»нинг нафақат бу йилги мавсумдан, балки ўтган мавсумлардан ҳам қарздорлиги мавжуд. Клуб хусусий эканлигидан келиб чиқиб, биз ҳар сафар уларга ён беришга ҳаракат қилдик. Регламент бўйича биз қишки трансфердаёқ «Оқтепа» футболчиларини рўйхатдан ўтказмаслигимиз керак эди. Аммо «Орол» ёки «Олимпик» деган клуб истисно тариқасида Про лигада иштирок этса-ю, биз бир неча йиллик «Оқтепа»га ёрдам бермасак, адолатдан бўлмайди деб, барча футболчи ва персоналларини рўйхатдан ўтказдик.
«Оқтепа» легионерини «Қизилқум», «Бунёдкор» кабиларга ижарага берган вақтида, ижара пулларини вақтида олиши учун қайғурдик. Клуб биздан рўйхатдан ўтказган, аммо бирор учрашувда майдонга туширмаган африкалик легионер учун тўловни олиб ташладик. «Оқтепа» клубининг таклифи билан Про лига клублари учун легионер футболчилар тўловини пандемия даврида 50 фоизгача камайтирдик.
Биз «Оқтепа» учрашувларини жонли эфирга олиб чиқиш учун УзРепорт техник гуруҳини Тўқимачиликдан тортиб, Жарнинг машғулот майдонигача олиб кирдик. Ўзингиз биласиз, бу стадионларда учрашувларни трансляция қилиш учун шароит жуда кам. Аммо биз қўлимиздан келган барча ишни амалга оширдик.
23 клуб орасида учрашувларни ташкил этиш билан боғлиқ энг кўп камчилик ҳам айнан «Оқтепа» клуби билан боғлиқ эканлигини биздаги барча комиссарлар яхши билади. Чунки бу ерда спорт директори, техник директор, маъмур, керак бўлса матбуот котиби-ю, оддий хизматчи вазифасини ҳам фақат бир киши — Владимир амалга оширади. Катта персонални ушлаб туриш эса табиийки катта чиқим талаб қилади.
Биз фақатгина янги бош мураббий — Элдор Сакаевни рўйхатдан ўтказмадик (Сакаев Янгиерда ишлади ва истеъфога чиқди. Мураббий Про лицензиясини бир неча йил ололмай юрди ва фақатгина ПФЛ аралашуви билан «Андижон» клуби ўша лицензия пулини ЎФАга тўлаб берганидан сўнг, мутахассис Про лицензиясига эга чиқди). «Оқтепа» янги персонал рўйхатдан ўтказилмаслиги борасида бир неча марта огоҳлантирилган. Йил бошида бош мураббий сифатида рўйхатдан ўтказилган Сергей Токов қаерда экани, нега клубдан кетгани борасида маълумот мавжуд эмас ва умуман бу ҳолат янгилик ҳам эмас. Чунки клуб 2020 йилни Александр Ежов билан бошлаган, йил ярмида уни «Хоразм»га ижара бериб, мавсумнинг қолган қисмини бош мураббийсиз ўтказган. Мураббийлик лицензияси мавжуд бўлмаган Алишер Шоғуломов мавсумни якунлаб қўйган. 2019 йилда ҳам шундай, Равшан Бозоров бош мураббий бўлиб рўйхатдан ўтган, аммо бирор учрашув қайдномасига киритилмаган, сабаби бизга маълум эмас. Қайдномаларда бўлган Ярослав Крушельницкий эса 2019 йилнинг 5 август куни тотализаторда иштирок этгани аниқланиб, 1 йилга футболдан четлаштирилганди. Мавсумни яна Алишер Шоғуломов якунлаб қўйди.
Шу жойида тўхташим тўғри бўлади. Чунки «Оқтепа» доим энг ёқтирган клубим бўлган, у ўзим истиқомат қиладиган маҳаллам жамоаси. «Чемпион» газетаси чоп этилаётган вақтлардаёқ Муҳрим (Аъзамхўжаев) билан «Оқтепа» ўйинларини муҳокама қилиб, ёш футболчиларга қўрқмай имкон беришини мақтардик. Клуб ҳомийси гапнинг дангалини айтадиган одам эканини сиз «Соккер клуб» орқали ҳам яхши биласиз. Биринчи лига дастурини олиб борган вақтларимдаёқ «Оқтепа» ҳақида етарлича маълумот беришга ҳаракат қилганман. Шундай экан, клубнинг мусобақадан чиқиб кетиши ачинарли. Бироқ талаб ҳамма учун бир хил — биз кетишни истаган клубни ялиниб олиб қоладиган ташкилот эмасмиз.
Албатта бизнинг шароитда футбол клубини молиялаштириш жуда қийин, бизнинг шароитда клублар фойда келтирмайди. Шуларни инобатга олиб, бир неча йиллик меҳнатлари учун «Оқтепа» раҳбариятига миннатдорчилик билдираман. Ва яна аниқ биламанки, инсонлар вақт ўтгани сайин ўзгаради. Вақт бизни ҳар қандай ҳаром ишлардан тийилишга ундаётган бўлса, бу албатта яхши. Буни «Оқтепа» стадионидан узоқ бўлмаган чойхона мисолида кўряпман. Бугун бу ерда талаблар қаттийроқ ва чиройлироқ. Балки унинг эгалари футболдаги айрим футболчи ёки мураббийлар ноинсофлигидан чарчаб, энди бошқа йўналишга ўтишни истаётгандир, балки болалар футболи орқали ўзини намоён қилишни истар. Футболни яхши кўрган одам, ундан узоқлашиб кета олмайди», - дея ёзади Имомхўжаев ўзининг телеграмдаги саҳифасида.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
