«Олд Траффорд»да мезбон жамоа либосида ёрқин ўйин кўрсатиш ҳар бир футболчига ҳам насиб қилавермайди.
«Манчестер Юнайтед» Премьер лигада чемпионликсиз ўтган саккиз мавсумга қарамай, мамлакатда ҳам, чет элда ҳам энг машҳур ва ҳурматга сазовор бўлган клублардан бири бўлиб қолиши бежиз эмас. Эҳтимол, сайёрадаги барча футболчиларнинг 95 фоизи бу ерда ўйнашни орзу қилар. Шу сабабли ҳам асосий таркибдаги футболчилар аксарияти ер юзинининг турли нуқталаридан жамоага келиб қўшилган.
Ушбу фикр, айниқса, Алекс Фергюсондан кейинги даврга мос келади. Турли менежерлар «қизил иблислар»ни юқори ўринларга қайтаришга уринишган, бунинг учун бир қатор ўйинчиларни жалб қилинган, аммо уларнинг ҳаммаси ҳам ўзларининг энг яхши томонларини кўрсата олмаган.
Бугун биз «Олд Траффорд»да фаолияти юришмаган, аммо «Манчестер Юнайтед»ни тарк этганидан кейин яна муваффақият қозонган баъзи юлдуз футболчиларни эслаб ўтамиз.
Диего ФОРЛАН
Уругвайлик ҳужумчи Диего Форлан «Манчестер Юнайтед»га 2002 йилнинг январида «Индепендьенте» жамоасидан деярли 10 миллион фунт эвазига ўтган эди. «Қизил иблислар»нинг скаутларига футболчининг Аргентина чемпионатидаги ўйинлари маъқул келган ва Алекс Фергюсоннинг фалсафасига мос футболчи бўлиб кўринган. Бироқ Форлан «Манчестер Юнайтед»нинг асосий таркибида доимий равишда ўйнай олмади. Асосан захирадан майдонга туширилди. Табиийки, ундан талаб қилинган ўйинни намойиш қилолмади.
Орадан икки ярим йил ўтгач, унга «Вильярреал»дан таклиф тушди ва «қизил иблислар» бошлиқлари ўйлаб ўтирмай уни қўйиб юборишди. Кейинчалик «МЮ» «катталари» бу ишларидан афсус қилган бўлишлари ҳам эҳтимолдан йироқ эмас. «Сариқ сувости кемаси»да унга асосий таркибдан жой беришди, шундан сўнг у Испаниянинг бошқа бир клуби «Атлетико»га кўчиб ўтиб, 2010 йилда Европа лигасида зафар қучди.
Ҳозир Форлан 42 ёшда. У футболчилик фаолиятини 2019 йил августида тугатиб, ўзи туғилиб ўсган жойнинг маҳаллий «Атенас» клубида бош мураббийлик қилмоқда.
Радамель ФАЛЬКАО
Колумбиялик ҳужумчи Радамель Фалькао 2014 йил кузида қитъанинг энг яхши тўпурарларидан бири сифатида «Манчестер Юнайтед»га ўтган эди. «Қизил иблислар» уни «Монако»дан сотиб олиш шарти билан ижарага олишди. Аммо, Манчестерда муваффақиятли карьера қуриш учун Фалькаога доимий жароҳатлар ва жисмоний ҳолати йўл қўймади.
Натижада, У «Олд Траффорд»да бор-йўғи ўн ойни ўтказди ва шу вақт ичида барча турнирларда 29 учрашувда майдонга тушиб, 4 та гол ва 5 та голли узатма билан чегараланди. Бу аниқки, Радамелдан кутилган натижа эмасди. Шунинг учун 2015 йилнинг ёзида у биринчи бўлиб «Монако»га қайтиб келди ва тез орада «Челси»га ижарага берилди, аммо у ерда ҳам муваффақиятсизликка учради.
Ҳозирда 35 ёшли Фалькао Туркиянинг «Галатасарой» жамоасида ўйнамоқда, унинг клуб билан шартномаси кейинги йилнинг ёзига қадар мўлжалланган. Туркия Суперлигасининг охирги мавсумида 17 учрашувда Радамель 9 гол уришга эришди. Истанбулдагиларнинг бу натижадан кўнгли тўқ. Аммо, умуман олганда, уни кичик жароҳатлар ҳанузгача безовта қилиб келмоқда.
Мемфис ДEПАЙ
Нидерландиялик ҳужумчи Мемфис Депай ватандоши Луи ван Галнинг хоҳиши билан жамоага таклиф қилинганди. Депайни сотиб олиш Англия клубига 31 миллион фунт стерлингга тушган. Мемфис «Олд Траффорд»да атиги бир ярим йилни ўтказди.
Унинг «Юнайтед»даги кўрсаткичлари шунчаки ёмон эмас, балки фожиали бўлган. У 33 учрашувда атиги 2 та гол киритган, бу унинг аввалги мавсумдаги натижаси билан солиштирганда даҳшатли кўриниш бўлиб қоларди. ПСВда ўтказган мавсумида Нидерландия чемпионатидаги натижаси эса — 30 ўйинда 22 гол. Оқибатда, трансфер ўзини оқламаган, деб топилиб, 2017 йилнинг январида Депай «Лион»га 14,5 миллион фунт эвазига қўйиб юборилди.
Францияда Депай яна бутун шон-шуҳратини тиклаб олди, гарчи нидерландиялик дебют мавсумининг бир қисмини мослашишга сарфланган бўлса ҳам. Кейинчалик ҳужумчи рақиблар дарвозасини голлар билан тўлдириб ташлади. 178 учрашувда 76 гол ва 55 голли узатмани амалга оширди. Бу Депайга «Барселона» эътиборини жалб қилиш учун етарли бўлди.
Мемфис шу йилнинг ёзида эркин агент сигатида «Барселона» билан шартнома имзолади. Қизиғи шундаки, футболчини ҳамюрти Рональд Куман клубга таклиф қилган. Ушбу ҳикоянинг қандай тугашини кўриш анча қизиқ бўлади.
Анхель ДИ МАРИЯ
Анхел Ди Мария «Манчестер Юнайтед»га 2014 йил ёзида дунё футболи юлдузларидан бири сифатида кўчиб ўтди. Ушбу ҳолат унинг трансфер нархида ҳам ўз аксини топди. «Юнайтед» Девид Бекхэм ёки Криштиану Роналду даражасидаги ўйинчини олишга умид қилиб «Реал»га 67,5 миллион фунт тўлади.
Бироқ, Ди Мария «Олд Траффорд»да юқорида номи қайд этилган қаҳрамонлар сингари ўйнай олмади. У жамоада фақат бир мавсумни ўтказди, «қизил иблислар»сафида 32 учрашувда 4 гол ва 12 голли узатмани амалга оширди. Бу мухлисларга ҳам, клуб раҳбариятига ҳам етарли эмасдек туюлди. Ди Мариянинг ўзи ҳам Англияга мослаша олмади. Натижада, 2015 йилнинг ёзида «Манчестер Юнайтед» Анхелни "ПСЖ"га 57 миллион фунт стерлинг эвазига сотиб юборди.
Ажабланарлиси шундаки, Францияда Ди Мария тезда жамоанинг етакчиларидан бирига айланиб, яхши кўрсаткичларни намойиш қилди. Энди аргентиналик футболчи "ПСЖ" билан шартнома имзолашда давом этмоқда. У жамоа билан 16 та унвонни қўлга киритган ва жами 264 учрашувда 88 гол ва 110 голли узатмани ўз ҳисобига ёзиб қўйган. Шунчаки, ажойиб!
Ромелу ЛУКАКУ
Бельгиялик таран ҳужумчи — Ромелу Лукаку анча вақт «Манчестер Юнайтед»нинг диққат марказида бўлиб келган, аммо «қизил иблислар» уни ўз сафларига қўшиб олишни уддалашмаган. Ва ниҳоят, 2017 йилнинг ёзида Лукаку «Эвертон»дан 76 миллион фунт стерлингга сотиб олинган. Бельгиялик футболчи инглиз футболи тахтига қайтмоқчи бўлган Жозе Моуриньонинг янги жамоаси асосий тўпурарига айланиши керак эди.
Афсуски, Лукакунинг, шунингдек, бутун «Манчестер Юнайтед»нинг умидлари тез орада барбод бўлди. Икки мавсум давомида ҳужумчи кутилганидан анча кам гол урди. Бир мавсум аввал «Эвертон» таркибида Ромелу 25 гол урган бўлса, «Юнайтед» билан икки мавсумда 28 бор рақиблар дарвозасини ишғол қилган. Шу тариқа, 2019 йилнинг ёзида Моуриньонинг ўрнига «қизил иблислар» мураббийи бўлган Сульшер уни «Интер»га сотиш бўйича келишувга қарши эмас эди.
Италияда Ромелу аввалги ишончини тиклади ва кетма-кет икки мавсум давомида чемпионатда камида йигирма гол уриб, «нерадзурри»нинг асосий футболчисига айланди. Узоқ вақт кутилган мамалакат чемпионлигида ҳам энг катта ҳисса қўшган футболчи. Ҳозир Лукаку 28 ёшда ва унинг трансфер бозоридаги нархи 100 миллион фунтга яқинлашган. Жамоа молиявий қийин ҳолатга қарамасдан уни сотиб юбориш фикридан йироқ.
Хулоса
«Манчестер Юнайтед» шундай катта клубки, юқоридаги каби юлдузларнинг карьерасини «синдириб» ташлаган. Уларнинг қаторини яна давом эттириш мумкин эди. Лекин сизу бизга танишлари ва ҳозирда фаолиятини давом эттираётганлари ҳақидагина тўхталиб ўтдик.
Руслан Максимов тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
