Ёзги трансферлар ойнасида "Барселона" клуби яхши ҳаридлар билан бир қаторда бир қатор катта номларни ҳам йўқотди. Лионель Месси ортидан Антуан Гризманн ҳам "кўк-анорранглилар"ни тарк этди. Ўз юлдузларидан айрилиб қолган Каталония клубини қандай қисмат кутмоқда? Бартамеу ўрнига келган Лапорта ҳам ғалати қарорлар чиқариб, клуб муҳитини бузмоқдами? Месси кетгач бу каби фикрлар кўпайиб қолди. Гриззи кетгач эса яна шу каби гаплар қулоққа чалинди. Менимча, Антуаннининг кетишига Лапортанинг дахли йўқ. Ҳамма айб французнинг ўзида.
Гризманннинг кетиши нима сабаб бўлди?
Мессини кетиши сабабларини анча яхши тушундик. Ҳа, бу воқеа футболга қизиққан ҳар бир шаҳс учун аён бўлиб улгурди. Унда на Лапортанинг ва на Мессининг айби бор. Ўзгартириб бўлмас айрим нарсалар бор, ахир. Хўп, Гризманн нега жамоани тарк этди? Мен айта оламанки Антуан ўз ўйини билан ҳеч қанақасига "Барселона"ни кучайтира олмади. У кетишида айбор фақат ва фақат унинг ўзи. 120 миллион евролик трансфер ўзини ҳеч қанақасига оқламади.
Антуан "Барселона"га нима бера олди?
2019-2020 йилда Антуан 48 та учрашув ўтказиб, ўз ҳисобига 15 та гол ва 4 та ассист ёздириб қўйди. Бундай олиб қараса, у қадар ёмон натижа эмас. Бироқ у асосий таркиб футболчиси ва "Барса" у учун 120 миллион евро сарфлаган. Бу факторлар ундан яна ҳам сермаҳсул ўйин талаб этар эди. 2020-2021 йилги мавсус эса 51 ўйин ўтказган Антуан ўз ҳисобига 20 та гол ва 13 та ассист ёздириб қўйди. Ҳа, ўзгариш бор. Ўсиш бор. Бироқ бу ўзгариш унинг жамоадаги ўрнига айтарли таъсир ўтказа олмади. У ҳамон "омадсиз трансфер". Икки йил "кўк-анорранглилар" сафида муваффақитсиз ўйинларидан сўнг у яна ўша юлдузли онлари ўтган "Атлетико"га қуруқ қўл ва шувут юз билан қайтмоқда.
Икки томонлама хато қарор
Антуан 120 миллион евро эвазига ҳарид қилинди. "Тушунмадим, "Барселона" ақлдан оздими", - деган эдим мен бу трансфер амалга оширилган пайтда. У Каталония клубининг футболига умуман мос футболчи эмас эди. Унда дриблинг деярли йўқ. Бундан ташқари у Суарес, Лева, Бенземалар каби соф тўққизлик ҳужумчи ҳам эмас. "Атлетико"нинг ҳимоявий ўйини таъсирида етилган Антуаннинг қанотларда, ҳужум марказида, яримҳимояда ва керак бўлса ҳимояда ўйнашдан оз-моз хабари бор эди. Умуман олганда у "матрасчилар" сафида майдон бўйлаб эркин ҳаракат қилувчи лидер эди. Гриззи гоҳ ассистент, гоҳ ҳужумни якунловчи ва баъзан ҳужумни бошлаб берувчи футболчи ролида ҳаракатланар эди. "Барселона"да ҳамма ўз ишини жуда яхши бажаради ва ҳар бир футболчининг клубда аниқ бир вазифаси мавжуд. Сен ҳужумчимисан, унда гол уришинг керак. Вингер бўлсанг, қанотлардан ёриб кириб, ҳужумчини гол билан таъминлашинг ёки ўзинг гол уришинг лозим. Тўққизлик ҳужумчилар майдонда одатда камнамо бўлишади. Уларга тўп етиб келган пайтда, ҳаёли фақат дарвозада бўлиши керак. Антуан шу вазифани бажарганда у бу ерда ўйнаб кета олар эди. Аммо у ўзини қаерда ўйнаши борасида бир қарорга кела олмади. Қўпол қилиб айтганда ҳеч нарсани қойиллата олмади. Футболчининг ўз позициясини хадеб ўзгартиравериши яхши эмас. Буни мисолини айнан Гризманнда кўришимиз мумкин.
Бу ҳам ёрдам бермади
Месси кетди, энди Гризманн яхши ўйнаб кетади. Бироқ бу ҳам ёрдам бермади. У Ла Лиганинг илк 3-турида гол ҳам ассист ҳам ўз ҳисобига ёздириб қўя олмади. Бундан ташқари, у майдонда деярли кўринмай, пасларда хато қилиб, тинмай тўпни олдириб қўяверди. Нима ҳам деймиз, ўша-ўша Гризманн. Таққослайдиган бўлсак, Коутиньо ва Дембеле каби футболчилар ундан ҳам қиммат суммага "кўк-анорранглилар" сафига келиб қўшилган. Лекин уларнинг муаммоаси - кўпроқ жароҳат. Дембеле ҳам Филиппе ҳам кучли техника соҳиблари ва яхши формада бўлган пайти улар кўп ишга қодир. Бироқ Антуан қандай форммада бўлса ҳам, кутилгандек ўйин кўрсата олмади.
Бу фикрлар албатта, ўзимнинг шаҳсий фикрим. Ҳар ким унинг омадсизлигини турлича талқин қилиши мумкин. Ўйлайманки, менинг вариантим анча ҳақиқатга яқин. Агар, Гриззининг ашаддий мухлислари буни ўқиб, мени ҳақорат қилишса ҳам ҳафа бўлмайман. Чунки, ҳақиқат шунақа аччиқ бўлади. Балки, у "Атлетико"да яна ўз ўйинини топиб кетар. Ахир, бу клубда унинг омадсизликлари "Барселона"даги каби фожиа ҳисобланмайди. Муваффақиятлари эса осмонларга кўтарилади. Хуллас, ҳар ким ўз хаддини ва қадрини билгани мақул. У ерда Гризманни қадрлашади, хатто ҳозир ҳам.
Худайқулов КАРИМ мақоласи
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
