Ҳозирги кунда футбол оламида энг оммавий мавзу – ''Ньюкасл''нинг араблар қўлига ўтгани бўлиб турибди. Шайхларнинг улкан миқдордаги пуллари АПЛ клубининг трансфер оламида янада фаол бўлишига сабаб бўлмоқда. Айни дамда, ''Қарғалар''нинг молиявий имконияти ҳар қандай футболчига ''қўл узатса етадиган'' даражада қудратли. Шу маълумотларни ҳисобга олган ҳолда, Stadion.uz ''Ньюкасл'' амалга ошириши мумкин бўлган трансферлар ҳақида сўз юритади.
Филиппе Коутиньо ("Барселона").
Бразилиялик иқтидорни ҳозирги "Барселона"да бахтли деб бўлмайди. Кўп учрашувларни жароҳатлари туфайли ўтказиб юбораётган Филл лазаретдан қайтгач, асосий таркибга жойлаша олмаяпти. "Кўк-анорранглилар" ҳужум чизиғидаги рақобатда у тобора йўқолиб бормоқда. Шундай экан, Коутиньо учун жамоасини ўзгартириши фойдадан холи бўлмайди, бизнингча. Маълумки, Филиппе "Ливерпул"даги, хусусан, АПЛдаги ёрқин ўйинлари туфайли мухлис-у мутахассислар назарига тушган. Ҳозир у ўша ўзи машҳур бўлган лигада ўйнаш имконига эга. Бу танловни унга саудияликлар қўлига ўтган "Ньюкасл" таклиф қилмоқда. Ҳар ҳолда, захирада ўзининг бор потенциалини кўкка совургандан кўра севимли лигасига қайтиб кучсизроқ жамоада етакчиликни қўлга олиши футболчи учун, ҳар томонлама, тўғри қарор бўлади.
Гарет Бейл ("Реал Мадрид").
Айни пайтда, Бейл ҳам Коутиньо билан деярли бир хил ҳолатда. Фарқи шундаки, у аллақачон ўз даражасини йўқотиб улгурди. Кетма-кет жароҳатлар уэлслик футболчига салбий таъсир ўтказмасдан қолмади. Ҳозирда унинг Мадриддаги "катта"лар билан муносабати ҳақида ҳам илиқ фикр билдира олмаймиз. Бейлнинг юқори маоши Переснинг асабини бузаётгани аниқ ва "Реал" президенти уни аллақачон сотувга қўйган. Таклифлар йўқлиги боис "Голф-мастер" ҳамон "қаймоқранглилар" таркибида. Бироқ "Ньюкасл" томондагилар учун пул энди муаммо эмас. Бейлга хоҳлаганидек маош ва етарли ўйин амалиёти берилса ва футболчи бундан тўғри фойдалана олса, икки тараф учун ҳам бу фойдали келишув бўларди.
Жесси Лингард ("Манчестер Юнайтед").
Ўтган мавсум "Вест Хем"даги ўйинлари билан кўпчиликни ҳайрон қолдира олган Жесси энди "Ньюкасл" қизиқишлари доирасида. Инглиз футболчиси бу мавсум "МЮ"да ҳам ёмон ўйнаётгани йўқ, аслида. Захирадан майдонга тушиб, жамоага ўзгача иштиёқ бера оляпти ("Янг Бойз"га қарши ўйин бундан мустасно). Унда салоҳият ва ёрқин келажак борлиги кўриниб турибди. Асосийси, Лингард ҳозир майдонда йўқолиб қолмаслиги лозим. "Юнайтед"да ҳали Санчо формага кириб улгурмади, Решфорд жароҳати билан овора, Кавани ҳам аввалгидек фаол эмас. Ваҳоланки, юқоридаги футболчилар ўз даражаларига қайта олса, Жессига "нон бермасликлари" аниқ. Шуларни ҳисобга олган ҳолда, истиқболли лойиҳанинг бир бўғини сифатида Лингардиньони "Сент Жеймс Парк"да кўриб қолсак ажабланмаймиз.
Алексис Санчеc ("Интер").
Бир пайтлар Гвардиоланинг "тики-така"чи "Барселона"сида мазмунли ҳаракат қилган Алексис ҳозир Миланнинг кўк-қора томонида захирада ўтирибди. Унинг ёши ўтиб бораётгани, ўзгарувчан ва прессингли футболга тўғри келмай қолганини инобатга оладиган бўлсак, "қарғалар" варианти Санчеcга тўғри келиши мумкин. "Ньюкасл" ҳужумида, асосан, техникаси кучли футболчилар ҳаракат қилишади. Аллан Сен-Максимен, Мигел Алмирон ва Раян Фрейзер шулар жумласидан. Шунингдек, Алексдаги ақлли ва ноодатий узатмалар ҳам "Ньюкасл"га кўп фойда келтириши мумкин.
Қўшимчасига, саудиялик шайхлар шорт-листидан Антони Марсьяль ("Манчестер Юнайтед"), Мауро Икарди ("ПСЖ"), Усмон Дембеле ("Барселона") ва Жеймс Тарковски ("Бёрнли") каби номдор футболчилар жой эгаллаган. Жамоанинг ҳозирги даражасидан (АПЛдаги 20 жамоа ичида 19-ўрин) келиб чиқиб, бу трансферлар иложсиздек кўриниши табиий. Бироқ пул нималарни ҳал қилмайди, дейсиз. Кўрамиз, якунда "Ҳаккалар" қайси футболчиларни сотиб олишни уддаларкин?!
Матнда хатолик топсангиз, ўша хатони белгилаб, бизга жўнатинг (Ctrl + Enter).
Пахтакор
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
