"Манчестер Юнайтед" устози Оле-Гунар Сульшер яқин вақтдаги жамоаси ҳолати ва мағлубиятлари сабаб яна мухлислар ва журналистлар танқиди ёмғири остида қолди. Бу мавсумда Жейдон Санчо, Рафаель Варан ҳамда Криштиану Роналдуларнинг олиб келиниши, жамоага кўп йиллик танаффусдан кейин яна чемпионлик тақдим этиши тахмин қилинган эди. Аммо ҳаммаси кўнгилдагидай кетмаяпти. Таркиб иқтидорли ўйинчилари билан қўшилиб ҳам мағлуб бўлишда давом этмоқда. Футболчилар кайфиятида эса муваффақиясизлик сари кетиш кучайиб бормоқда. Сўнгги, "Лестер"га қарши мағлубият билан "қизил иблислар" кетма-кет учинчи ўйинда ғалаба қозона олмади ва бу билан чемпионлик учун пойгада муҳим позициясини бой берди. Сульшер мавсум бошланишидан илгари, июль ойида клуб билан янги битим тузган эди. Унга раҳбарият ва мухлислар ишониб турганди. Аммо мухлисларга яхши ўйин ва ғалабалар зарур. Акс ҳолда, уларнинг қўлловини йўқотиш ҳеч гап эмас.
Агарда клуб Сульшерни алмаштиришни лозим топса, бошқарувдаги ўзгариш бутунлай янги давр бошланганини англатмаслиги керак. Сўнгги уч йил давомида норвегиялик қўлида жамоа анча ўсди. Олдинги зиддиятли давр ортда қолдирилди. Буни тан олиш керак. Жамоада мураббийлар алмаштириш давом этиши мақсадга эришишни қийинлаштиради, холос. Девид Мойесдан Луи ван Галга, ван Галдан Жозе Моуриньога, Моуриньодан эса Сульшерга. Мана шундай алмашинишлар давомида умумий миқёсда муҳим вақт ва ҳодисалар бой берилади. Аммо клубга ғалабалар ва совринлар зарур. Уни олиб бера оладиган инсон келмагунича эса буни давом эттириш мумкин. Қуйида Сульшер ўрни учун бутун дунёда янгараётган вариантларга тўхталиб ўтамиз.
Юлиан Нагельсманн
Жорий иш жойи: "Бавария" бош мураббийи, 2026 йилгача
Ҳозирда 34 ёшда бўлишига қарамай, Нагельсманн Европада энг истиқболли менежер сифатида кўрилган. У "Лейпзиг"дан апрель ойида Мюнхен шаҳрига олиб келинганди. Юлианнинг бошқарув услуби ва футболчиларнинг ўсиш даражаси "МЮ" учун мос келиши мумкин. Шунингдек, унинг шахсияти ва феъл-атвори ҳам клубга мос келади. Аммо "Бавария" Нагельсманнга ишонади ва уни ҳозирча қўйиб юбориш ниятида эмас.
Антонио Конте
Жорий иш жойи: мавжуд эмас.
Конте 2010 йилларнинг бошида "Ювентус"ни тўққиз йиллик танаффусдан кейин яна Италия футболи шохсупасига кўтарганди. У ўтган мавсумда худди "Челси"даги сингари "Интер"ни ҳам чемпион қилди. Италияликнинг "Олд Траффорд"га кела олмаслигига катта омил сабаб бўлади. У ҳам бўлса, жамоа футболчиларининг Конте тизимига мос келмаслигидир. Ишонаверинг, бу нарса у учун катта муаммо.
Гарет Саутгейт
Жорий иш жойи: Англия терма жамоаси устози, 2022 йилгача
Саутгейт Англияни 2018 йилги Жаҳон чемпионатида ярим финалга, Евро-2020да эса финалга олиб чиқиб, халқаро майдонда обрў қозонган. Бошқарув ва тактик мураббийлиги билан "МЮ" учун мос варинатдек туюлар. Аммо ягона муаммо шундаки, Гаретнинг клуб билан ишлаши бундан ўн йил олдин "Мидлсбро" жамоасидагина бўган. У бу борада катта тажрибага ҳам эга эмас – атиги уч йил.
Зинедин Зидан
Жорий иш жойи: мавжуд эмас
"Олд Траффорд"да қайта қуриладиган жамоа ўйнамаяпти. Клуб таркибида ҳаммаси жойида. Уни яхши йўналтириш керак, холос. Бу учун Зидан яхши танлов бўлиши мумкин. Унинг Рафа Бенитездан қабул қилиб олган жамоаси уч йил кетма-кет ЕЧЛни олгани ҳам бежиз эмасди. Зидан "Реал"даги каби яхши шаклланган жамоа билан бемалол ишлай олади. Ундаги футболчилар билан ҳам. Хусусан, унинг келиши Роналду, Варан ва Погба учун катта мотивация бериши мумкин. Зиданни ишсизлиги рост, аммо яқин орада Франция терма жамоасига жалб қилиниши билан боғлиқ гаплар юрибди.
Бренден Рожерс
Жорий иш жойи: "Лестер Сити" клуби, 2025 йилгача
Рожерснинг "Ливерпуль"даги ўтмиши омадли эмасдир. Аммо бемалол айтиш мумкинки, у сўнгги 10 йилдаги АПЛнинг энг яхши мураббийларидан бири. 48 ёшли мутахассис ўз услубияти билан мухлисларга ёқади. Унинг ёшлар билан ишлаши ва янги номлар кашф этишни билиши, эътиборгa молик жиҳатдир. Рожерснинг футбол фалсафаси "Олд Траффорд"ни яна "орзулар театри"га айлантирса, не ажаб?
инглиз тилидан Жалолиддин ИСМАТОВ таржимаси
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
