Жорий йилнинг 27 октябрдан 2 ноябрга қадар юртимиз майдонларида U-23 Осиё кубоги саралаш босқичи «D» гуруҳидан ўрин олган ўйинлар бўлиб ўтади. Шу муносабат билан «Stadion.uz» нашри 2018 йилги Хитой майдонларида бўлган U-23 чемпионатида олтин медалларнинг қўлга киритган Ўзбекистон терма жамоасини ёдга олади. Ушбу мусобақада тўп тепган қаҳрамонларимиз ҳозир қаерда, ҳозир шу ҳақида бироз фикр юритамиз.
2018 йилда 23 ёшгача бўлган футболчилар ўртасидаги 3-Осиё чемпионати Хитой Халқ Республикасидаги 4та стадионда ўтказилди. Жами 16та терма жамоа қатнашган мусобақа 9 январдан 27 январгача бўлиб ўтди.
Чемпионатнинг «А» гуруҳидан жой олган вакилларимизга мезбон Хитой, Қатар ва Уммон терма жамоалари рақиблик қилишди. Дастлабки турда қатарлик тенгдошларига 0:1 ҳисобида имкониятни бой берган олимпиячиларимиз 2 ва 3-турда Хитой ва Уммон U-23 жамоасини худди шу ҳисобда мағлуб этиб, 2-ўрин билан плей-офф масаласини ҳал қилди.
Чорак финалда терма жамоамизга мусобақа фаворити деб кўрсатилган Япония олимпиячилари рақиблик қилишди. Ушбу баҳсда ўз ўйинини ҳар томонлама намойиш этган Равшан Ҳайдаров шогирдлари «самурайлар юрти» вакиллари устидан 4:0 ҳисобида устун келишди.
Ярим финалда Ўзбекистон терма жамоасининг турли ёшлардаги энг асосий рақиби ҳисобланган Корея терма жамоаси ёшларига қарши майдонга тушган вакилларимиз 4:1 ҳисобидаги ғалабани тантана қилишди. Асосий вақтда 1:1 ҳисобида якунланган беллашувнинг қўшимча дақиқаларида Ҳайдаров шогирдлари нақ 3та гол уриб, финал йўлланмасига эга чиқишди.
Финалда бизга Вьетнам олимпиячилари рақиблик қиладиган бўлди. Ўша «қорли финал» дея мухлислар ёдида қолган учрашувда жамоамиз иродали ғалабани қўлга киритишди. Асосий дақиқалари 1:1 ҳисобида якунланган ўйиннинг, иккинчи экстра-тайми сўнгги дақиқаларида киритилган Сидоровнинг голи Ўзбекистонга U-23ёшгача бўлган Осиё Кубоги олтин медалларини тақдим этди.
Умуман олганда, ушбу мусобақа ўзбек футболчи тарихида ўчмас из қолдирган. Бунинг учун мураббийлар штаби, футболчилар ва ушбу мусобақада қатнашган кўплаб мутахассислар ва мухлисларнинг меҳнати катта.
Ҳозир эса ушбу мусобақанинг асосий қаҳрамонлари ҳақида сўзлашамиз.
Дарвозабон
Ботирали Эргашев (5та ўйин)
Қатарга қарши 1-турдаги учрашувда майдонга тушмаган Ботирали, қолган баҳсларнинг барчасида асосий таркибда майдонга тушган. Умуман олганда, Осиё чемпионатида 5та ўйин ўтказган кипер ўз дарвозасидан иккита тўп ўтказиб юборган. Яримфиналда Кореа U-23 терма жамоаси вакили Хванг Хюн-Соо ва финалда Нгуен Кванг Эргашев қўриқлаётган дарвозани аниқ нишонга олган. Шундан кейин «Пахтакор», «Навбаҳор», «Динамо», «Қўқон-1912» жамоаларида тўп тепган. Ҳозирги кунда маҳоратли посбон Олмалиқнинг АГМК клуби шарафини ҳимоя қилади. Лекин, Эргашев олмалиқликлар асосий таркиб дарвозабони ҳисобланмайди. Суперлиганинг 2021 йилги мавсумида Ботирали бор-йўғи 7 баҳсда майдонга тушган.
Ҳимоячилар
Рустамжон Ашурматов (6та ўйин, 1 гол)
Ҳозирги кунда Кореянинг «Кангвон» клуби шарафини ҳимоя қилаётган Рустамжон Хитойдаги мусобақада асосий таркиб футболчимиз бўлган. Мусобақадаги барча 6 учрашувда майдонга тушган ҳимоячи 1 голни ўз ҳисобига ёзиб қўйган. Унинг айнан финалда Вьетнам дарвозасига киритган тўпи ўйиндаги ҳисобни очувчи гол ҳисобланган. Миллий терма жамоамизнинг ҳам асосий таркиб футболчиси ҳисобланадиган Ашурматов ўша пайтда Тошкентнинг «Бунёдкор» клуби шарафини ҳимоя қилган. 2019 йилда эса у «Гвангю» клубига ўтди. Жорий йил бошида Кореянинг бошқа жамоаси «Кангвон» жамоаси сафига қўшилди. Жанубий Корея К-лигасининг жорий мавсумида Ашурматов 18та ўйинда майдонга тушиб, 1 гол муаллифига айланган.
Достонбек Турсунов (5 ўйин, 1 гол)
Гуруҳ босқичи 3-туридаги Уммон ёшлари билан бўлган учрашувдаги ягона гол муаллифи Достонбек Турсунов учун ҳам анча муваффақиятли бўлган. Мусобақада 5та учрашувда майдонга тушган ҳимоячи ўз ҳисобига 1та гол ёздириб қўйишга эришган. Турсунов Ўзбекистон чемпионатида «Қўқон-1912», «Металлург» ва «Нефтчи» каби жамоаларда тўп тепган. 2019 йилда у фарғоналиклар сафини тарк этиб, легионер сифатида Япониянинг иккинчи лигаси вакили «Реанфо Ямагучи» таркибига бориб қўшилган. J-2 лигасида 17 баҳсда майдонга тушган футболчимиз, 2020 йилда Жанубия Кореянинг иккинчи дивизионивакили «Пусан ай Парк» сафига қўшилди. Ҳозирги кунда Хитой Суперлигасининг «Чунцин Атлетик» жамоаси асосий таркиб футболчиси ҳисобланади.
Акромжон Комилов (4 ўйин, 1 гол).
Ярим финалда Жанубий Корея дарвозасига ўзига ҳос гол киритган Акромжон мусобақанинг энг яхши футболчиларидан бири бўлган. Ҳимоячимиз мусобақада 4 учрашув ўтказиб бир гол муаллифига айланган. Унинг ягона голи ҳам ўзига ҳослиги билан мусобақадаги эсда қоларли вазиятлардан бири бўлиб ёдда қолган. «Бунёдкор» клуби тарбияланувчиси ҳисобланган ҳимоячимиз 2019 йилда Тошкентнинг бошқа бир жамоаси «Пахтакор» сафига қўшилган. «Шерлар» сафида икки мавсум ўтказган Комилов 24 учрашувда 2та гол уришга муваффақ бўлган. Суперлигамизнинг 2021йилги мавсум бошида эса Олмалиқнинг АГМК клубига қўшилди ва «кончилар»нинг асосий таркиб футболчисига айланди.
Аббосхон Отахонов (5 ўйин)
Мусобақада унчалик кўзга ташланмаган, лекин ўзига ҳос ўйин услуби билан рақиблар ҳужумини тўхтатган яна бир ҳимоячимиз Аббосхон Отхонов Осиё чемпионатида 5 учрашувда майдонга тушган. Ўша пайтларда маҳоратли ҳимоячи Наманганнинг «Навбаҳор» жамоаси футболчиси бўлган. 2019 йилда эса Аббосхон Бекободнинг «Металлург» клубига ўтган ва мазкур жамоа сафида икки мавсум давомида 50та учрашувда майдонга туши, 2 гол муаллифига айланган. Жорий мавсум аввалида эса Отахонов Тошкент вилоятининг бошқа бир жамоаси АГМК сафига кўчиб ўтди. Олмалиқликларнинг сафида 15 учрашувда майдонга тушган ҳимоячи, ўз ҳисобига 1 голни ёздириб қўйган.
Яримҳимоячилар
Азизжон Ғаниев (6 ўйин, 1 гол)
Ярим финалда Жанубий Корея дарвозасига супергол урган Азизжон мусобақанинг энг ёрқин ўйин кўрсатган футболчиларидан деб эътироқ этилган. Осиё чемпионатининг барча учрашувларида майдонга тушган Ғаниев 1 голни ўз ҳисобига ёздириб қўйган. Финал йўлланмаси учун кечган курашда кореяликларга қарши баҳсда Азиз ажойиб гол урган. Майдон марказидан тепилган тўп рақиб дарвозаси тўққизлигидан жой олган. Ғаниев Қаршининг «Насаф» жамоаси тарбияланувчиси ҳисобланади. «Аждарлар» сафида 3 мавсум ўйнаган футболчи Суперлигамизнинг 28 учрашувида майлонга тушиб, 7 гол ва 2та голли узатма муаллифига айланган. 2020 йил бошида эса иқтидорли футболчимиз Дубайнингг «Ал-Аҳли» жамоасига ўтди ва ҳозиргача БАА клуби шарафини ҳимоя қилиб келмоқда.
Одилжон Ҳамробеков (6 ўйин)
2018 йилги U-23 Осиё чемпионатида 6 баҳсда майдонга тушган Одилжон, чемпионат якунига кўра, мусобақанинг «энг яхши футболчиси» дея эътироф этилган. Таянч яримҳимочиси позициясида тўп тепадиган футболчимиз рақибларнинг кўплаб ҳужумини тўхтатиб, жамоамих етакчиларидан бири бўлган. «Насаф» жамоаси таркибида Суперлига баҳсларида майдонда кўриниш берган футболчи, 2019 йилда Тошкентнинг «Пахтакор» жамоасига ўтди. Жорий йилнинг бошида эса БААнинг «Ал-Аҳли» клубида ярим мавсум тўп тепди ва ёзда яна «шерлар» сафига қайтиб келди. Умуман олганда, яримҳимоячи иккиярим мавсумда Тошкент клуби сафида 50 учрашувда майдонга тушган.
Достонбек Ҳамдамов (6 ўйин, 1 гол)
Термамизнинг турли ёш тоифаларидаги жамоаларида тўп тепган Достонбек Хитойдаги чемпионатда ҳам асосий таркиб футболчимиз эди. Чемпионатнинг барча ўйинларида қатнашган иқтидорли футболчимиз чорак финалда Япония дарвозасига ажойиб гол уришга эришган. Миллий терма жамоамиз таркибида ҳам кўплаб голлар урган Ҳамдамов «Бунёдкор» тарбияланувчиси ҳисобланади. Достонбек мусобақа пайтида Россиянинг «Анжи» клуби футболчиси ҳисобланган. Кейинчалик, «Пахтакор», БААнинг «Ан-Наср» ва «Хатта» каби клублари шарафини ҳимоя қилди. Ҳозирги кунда эса 25 ёшли футболчимиз «Пахтакор» аъзоси ҳисобланади.
Жавоҳир Сидиқов (6 ўйин, 1 гол)
Чорак финалдаги Японияга қарши ўйиндаги ҳисобни очувчи гол, айнан Жавоҳирга тегишли эди. Мусобақадаги барча учрашувларда қатнашган Сидиқов ўша мавсум «Қўқон-1912» жамоаси футболчиси эди. Умуман олганда, «Пахтакор» тарбияланувчиси ҳисобланган футболчи ўша мусобақадан кейин, яна «шерлар» сафига қайтади. «Пахтакор»да яна икки мавсум ўйнаган футболчимиз, жорий йилнинг бошида, Тошкентнинг бошқа жамоаси «Локомотив» сафига кўчиб ўтди. Суперлиганинг 2021 йилги мавсумда 16 учрашувда қатнашган Жавоҳир 2 гол муаллифига айланган.
Ҳужумчилар
Забиҳилло Ўринбоев (6 ўйин, 1 гол)
Мазкур мусобақада жамоамизни майдонга сардор сифатида олиб чиққан Забиҳилло чемпионатнинг барча учрашувларида тўлиқ майдонда ҳаракат қилган. Ярим финалдаги Жанубий Кореяга қарши беллашувдаги ҳисобни очувчи гол айнан Ўринбоев ҳисобига ёзилган. Забиҳилло «Бунёдкор» мактаби битирувчиси ҳисобланади. Мусобақа пайтида, «Металлург» шарафини ҳимоя қиларди. Қолаверса, бир мавсум давомида АГМКда ҳам тўп тепган. 2020 йилда эса Наманганнинг «Навбаҳор» клуби сафига ўтиб, ҳозиргача мазкур жамоа сафида тўп тепиб келмоқда. Жорий мавсум ҳужумчи «лочинлар» сафида 19 учрашувда майдонга тушиб, 1 гол муаллифига айланган.
Жасур Яхшибоев (5 ўйин, 3 гол)
Жасур Хитойдаги ёшлар ўртасидаги Осиё чемпионатида терма жамоамиз тўпурари ҳисобланарди. Мусобақада 5 ўйинда майдонга тушган Яхшибоев 3 гол муаллифига айланган. Ҳужумчимиз Япониялик тенгқурлари дарвозасига иккита гол урган бўлса, ярим финалда Жанубий Корея посбонини бир марта ранжитган. «Пахтакор» сафида асосий таркиб футболчиси бўла олмаган Яхшибоев АГМКга ижарага бериб юборилади. Кейинчалик эса Беларуссиянинг «Энергетик-БГУ» сафида ярим мавсум, чемпионатнинг қолган ярмини эса «Шахтёр Солигорск» сафида ижарада ўтказди. Ҳужумчимиз беларус чемпионатида жами 27 учрашув ўтказиб, 16 гол муаллфига айланди. 2021 йилнинг январ ойида «Пахтакор» Жасурни Польшанинг «Легия» клубига сотиб юборди. Бироқ, Польша Премьер-лигасида ўз ўрнини топа олмади ва «Легия» уни Молдованинг «Шериф» клубига ижарага бериб юборди. Тирасполь клуби сафида 6та ўйин ўтказиган Жасур 2 гол муаллифига айланди. Айниқса, футболчимизнинг УЕФА Чемпионлар лигаси гуруҳ босқичидаги Мадриддаги «Сантьяго Беранбеу» стадионида кечган «Реал»га қарши баҳсдаги голи анча шов-шувларга сабаб бўлди.
Шунингдек, ўша мусобақа финалида ғалаба голини урган Андрей Сидоров («Қўқон-1912»), гуруҳ босқичида Хитойни мағлуб этган гол муаллифи Ҳожиакбар Алижонов («Пахтакор»), икки ўйинда майдонга тушган Исломжон Қобилов («Локомотив»), олти учрашувда майдонга тушиб, бирор ҳаракатлари билан ажралиб турмаган Бобир Абдиҳолиқов («Энергетик-БГУ») учта баҳсда заҳирадан майдонга қўшилган Ойбек Рустамов («Қўқон-1912») каби футболчилар ҳам U-23 жамоамизнинг муҳим футболчилари ҳисобланишган.
Жамшиджон Маҳмудов тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
