Парижликларнинг ўйинида камчиликлар жуда кўп. Жамоа ўзининг деярли ҳар бир ўйинида муаммоларга дуч келмоқда. Кўплаб баҳсларда клуб жуда қийинчилик билан ғалаба қозонмоқда. Клубда энг яхши футболчилар йиғилган бўлишига қарамай парижликлар ўйинида қандайдир мазмун йўқдек гўё.
Мотивациясиз Месси
Ўтган йили Месси “Барселона”дан кетиш истагида пайти жамоа уни қандай қилиб ушлаб қолгани ҳамманинг ёдида бўлса керак. Агар ўша пайт Мессига тўсқинлик қилмаганда, Месси катта эҳтимол “Манчестер Сити” клубига йўл олар ва яна ўша Роналду билан баҳслашар эди. “Барселона” ҳам бир мавсум давомида Мессисиз ўйнашга тайёргарлик кўрар эди. Умуман олганда, ўша пайтда Месси кетишига бу даражада тўсқинлик қилинмаганда “кўк-анорранглилар” учун ҳам Месси учун ҳам яхши бўлар эди.
“ПСЖ”даги Мессида мотивация йўқ. Шунчаки мажбурликдан ўйнаётгандай кўринмоқда. “Барселона”га бўлган меҳрини парижликларга бера олмагани аниқ. Месси фақат чемпионлар лигасида мазмунлироқ ўйин кўрсатмоқда. Лига 1дан эса ҳафсаласи пир бўлган чоғи. Негаки икки мусобақада у икки хил таассурот қолдирмоқда. Франция олий дивизионида деярли майдонда кўринмаса, қитъанинг энг нуфузли мусобақасида жамоа етакчиси сифатида кўзга ташланмоқда. Агар Париж клубда аҳвол шу даражада давом этса, Месси жамоада кўп вақт қолмаса керак. Бу ерда унга ёқмаётган нарсалар кўпроқ. У ўзини бахтли ҳис қилиши учун ёки “Барселона”да тўп тепиши, ёки Гвардиола қўл остида майдонга тушиши керак, менимча. Ёки “ПСЖ”га Мессини қўллаб-қувватлайдиган мураббий келиши керак ва уни жамоада етакчи қилиши керак. Аммо бунга “ПСЖ”нинг таркибидагилар рози бўлмаса керак. Чунки жамоада кўплаб юлдузлар бор ва улар Леонинг эътироз ва танбеҳларига энсасини қотирса керак. Ҳали Рамос жамоага қайтгани йўқ. У қайтгандан кейин жараённи кузатиш керак. Шундагина маълум бўлади Месси қолиш ёки кетиши.
Мураббийсиз жамоанинг холати
Бу ғалати эшитилиши мумкин, лекин шундай. “ПСЖ”да мураббий шунчаки номига мавжуд. Парижликларнинг ўйинида Почеттинонинг умуман услуби ёки ўйин тактикаси йўқ. У ҳаттоки баъзи футболчиларни алмаштиришдан ҳам қўрқади. Мессини алмаштиргани учун қанча жанжал бўлганини кўпчилик билса керак. Аргентиналик мураббийга жуда қийин бўлмоқда. Умуман олганда мураббийсиз жамоа бошқача ўйин кўрсата олмайди. “ПСЖ”да ҳам бу яққол кўзга ташланмоқда. Қайсидир ўйинда парижликлар ғалаба қозонган бўлса бу футболчиларнинг класси орқали амалга оширилмоқда. “Ньюкасл” ҳам бундан хулоса чиқариб жамоа тузишда эҳтиёткор бўлса керак. Менимча парижликлар сафида кўплаб футболчилар Почеттинони хурмат ҳам қилишмаса керак. Бир пайтлар Сер Алекс Фергюсон юлдузларни қандай тарбиялаб қўйганини кўрганмиз. Бундай ишлар Почеттинонинг қўлидан келмайди. Маурисионинг Париждаги сафари якунланиб қолган десак муболаға бўлмайди. Жамоага қаттиққўл ва юлдузларни бошқара оладиган бошқа мураббий керак. Бўлмаса “ПСЖ”нинг ўйини тобора чўкиб бораверади. Футбол тарихида бир-бирини хушламайдиган икки футболчини майдонда ажойиб жуфтликка айлантирган мураббийларни ҳам кўрганмиз. Ҳозирги “ПСЖ”га айнан шундай мураббий керак.
Париж жамоасининг энг катта муаммоси
Агар жамоада Доннарумма бўлмаганида катта эҳтимол “Манчестер Сити” устидан қозонилган ғалаба ҳам, ёки кечаги “Лилль”дан тортиб олинган уч очко хам бўлмас эди. Парижликлар сафида жуда кўп юлдузлар бор ва улар соврин ютавериб ўрганиб қолишган. Улар ўз жамоасининг етакчиси бўлган. Лекин, ўша футболчилар қаҳрамонликка ўрганиб қолган ва қора меҳнатга ўз кучини сарфлашни исташмайди. Мисол, битта Роналду “Манчестер Юнайтед” ўйинида прессингда яхши ишламагани учун жамоа кучсизланиб қолгандек кўринмоқда. “ПСЖ”да прессингда ва ҳимояда ёрдам беришни истамайдиган камида 3та футболчи бор. Тўғри “Манчестер Сити” билан ўйинда ҳамма прессингда ишлади. Ҳатто Лео жонли девор остида ётиб олишни ўзига ор деб билмади. У бошқа ўйин эди. Айнан, ўша бошқа ўйинда жамоа меҳнати эвазига ғалаба қозонди. Лекин ҳозиргидек ўзбошимчалик давом этса, бунинг оқибатида жамоа ҳимояси анча қийнлиб қолади. Ўша позицияда камчиликлар борлиги ҳам яққол кўзга ташланиб қолади. Чемпионлар лигаси гуруҳ босқичи “Манчестер Сити”га қарши иккинчи ўйинда “ПСЖ” Лига 1даги каби ўйин кўрсатса, ҳисоб қандай кўриниш олишини таҳмин ҳам қилиб бўлмайди. Агар шундай ҳолат кузатиладиган бўлса, ишонинг Гвардиола шогирдлари парижликларни янчиб ташлайди.
Зидан жамоанинг ягона халоскори(ми?)
ОАВда Зидан “ПСЖ” мураббийи бўлиши мумкинлиги ҳақида кўплаб хабарлар тарқалмоқда. Хўш у парижликлар учун нима бера олади? Зидан қўл остида “ПСЖ” нималар юта олади? Менимча, Зидан жамоа учун жуда фойдали мутахассис. Демак, биринчи муаммо сифатида юлдузларни тилга оладиган бўлсак, Зидан улардан ҳам машхурроқ ва уни хурмат қилмаслик мумкин эмас. Франциялик мутахассис “Реал” таркибида кўплаб юлдузлар билан ишлаган ва бу ишни жуда яхши уддалай олади. Унинг устига Зиданнинг келиши Мбаппени жамоада олиб қолинишига сабаб бўлиши мумкин. Зидан кўпроқ меҳнат қиладиган футболчиларга таянади. Яққол мисол сифатида “Реал”да Карим Бензема ўзининг меҳнатлари эвазига асосий таркиб ўйинчиси бўлиб қолаверган. Демак, кимнингдир жамоа асосий таркибида ўйнаш истаги бўлса кўпроқ прессингда ишлаб меҳнат қилиши керак. Балки шунда ростмана “ПСЖ”ни кўрармиз. Балки шунда Месси Неймар Мбаппе триоси фақат ном жиҳатидан эмас, балки майдонда ҳам дахшатли бўла олар. Буёғи эса вақт ҳукмига хавола. Кутамиз Парижда жиддий ўзгаришлар бўлиши аниқ.
Миржалол Пардабоев тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ўзбекистон
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
