Parijliklarning o‘yinida kamchiliklar juda ko‘p. Jamoa o‘zining deyarli har bir o‘yinida muammolarga duch kelmoqda. Ko‘plab bahslarda klub juda qiyinchilik bilan g‘alaba qozonmoqda. Klubda eng yaxshi futbolchilar yig‘ilgan bo‘lishiga qaramay parijliklar o‘yinida qandaydir mazmun yo‘qdek go‘yo.
Motivasiyasiz Messi
O‘tgan yili Messi “Barselona”dan ketish istagida payti jamoa uni qanday qilib ushlab qolgani hammaning yodida bo‘lsa kerak. Agar o‘sha payt Messiga to‘sqinlik qilmaganda, Messi katta ehtimol “Manchester Siti” klubiga yo‘l olar va yana o‘sha Ronaldu bilan bahslashar edi. “Barselona” ham bir mavsum davomida Messisiz o‘ynashga tayyorgarlik ko‘rar edi. Umuman olganda, o‘sha paytda Messi ketishiga bu darajada to‘sqinlik qilinmaganda “ko‘k-anorranglilar” uchun ham Messi uchun ham yaxshi bo‘lar edi.
“PSJ”dagi Messida motivasiya yo‘q. Shunchaki majburlikdan o‘ynayotganday ko‘rinmoqda. “Barselona”ga bo‘lgan mehrini parijliklarga bera olmagani aniq. Messi faqat chempionlar ligasida mazmunliroq o‘yin ko‘rsatmoqda. Liga 1dan esa hafsalasi pir bo‘lgan chog‘i. Negaki ikki musobaqada u ikki xil taassurot qoldirmoqda. Fransiya oliy divizionida deyarli maydonda ko‘rinmasa, qit’aning eng nufuzli musobaqasida jamoa yetakchisi sifatida ko‘zga tashlanmoqda. Agar Parij klubda ahvol shu darajada davom etsa, Messi jamoada ko‘p vaqt qolmasa kerak. Bu yerda unga yoqmayotgan narsalar ko‘proq. U o‘zini baxtli his qilishi uchun yoki “Barselona”da to‘p tepishi, yoki Gvardiola qo‘l ostida maydonga tushishi kerak, menimcha. Yoki “PSJ”ga Messini qo‘llab-quvvatlaydigan murabbiy kelishi kerak va uni jamoada yetakchi qilishi kerak. Ammo bunga “PSJ”ning tarkibidagilar rozi bo‘lmasa kerak. Chunki jamoada ko‘plab yulduzlar bor va ular Leoning e’tiroz va tanbehlariga ensasini qotirsa kerak. Hali Ramos jamoaga qaytgani yo‘q. U qaytgandan keyin jarayonni kuzatish kerak. Shundagina ma’lum bo‘ladi Messi qolish yoki ketishi.
Murabbiysiz jamoaning xolati
Bu g‘alati eshitilishi mumkin, lekin shunday. “PSJ”da murabbiy shunchaki nomiga mavjud. Parijliklarning o‘yinida Pochettinoning umuman uslubi yoki o‘yin taktikasi yo‘q. U hattoki ba’zi futbolchilarni almashtirishdan ham qo‘rqadi. Messini almashtirgani uchun qancha janjal bo‘lganini ko‘pchilik bilsa kerak. Argentinalik murabbiyga juda qiyin bo‘lmoqda. Umuman olganda murabbiysiz jamoa boshqacha o‘yin ko‘rsata olmaydi. “PSJ”da ham bu yaqqol ko‘zga tashlanmoqda. Qaysidir o‘yinda parijliklar g‘alaba qozongan bo‘lsa bu futbolchilarning klassi orqali amalga oshirilmoqda. “Nyukasl” ham bundan xulosa chiqarib jamoa tuzishda ehtiyotkor bo‘lsa kerak. Menimcha parijliklar safida ko‘plab futbolchilar Pochettinoni xurmat ham qilishmasa kerak. Bir paytlar Ser Aleks Fergyuson yulduzlarni qanday tarbiyalab qo‘yganini ko‘rganmiz. Bunday ishlar Pochettinoning qo‘lidan kelmaydi. Maurisioning Parijdagi safari yakunlanib qolgan desak mubolag‘a bo‘lmaydi. Jamoaga qattiqqo‘l va yulduzlarni boshqara oladigan boshqa murabbiy kerak. Bo‘lmasa “PSJ”ning o‘yini tobora cho‘kib boraveradi. Futbol tarixida bir-birini xushlamaydigan ikki futbolchini maydonda ajoyib juftlikka aylantirgan murabbiylarni ham ko‘rganmiz. Hozirgi “PSJ”ga aynan shunday murabbiy kerak.
Parij jamoasining eng katta muammosi
Agar jamoada Donnarumma bo‘lmaganida katta ehtimol “Manchester Siti” ustidan qozonilgan g‘alaba ham, yoki kechagi “Lill”dan tortib olingan uch ochko xam bo‘lmas edi. Parijliklar safida juda ko‘p yulduzlar bor va ular sovrin yutaverib o‘rganib qolishgan. Ular o‘z jamoasining yetakchisi bo‘lgan. Lekin, o‘sha futbolchilar qahramonlikka o‘rganib qolgan va qora mehnatga o‘z kuchini sarflashni istashmaydi. Misol, bitta Ronaldu “Manchester Yunayted” o‘yinida pressingda yaxshi ishlamagani uchun jamoa kuchsizlanib qolgandek ko‘rinmoqda. “PSJ”da pressingda va himoyada yordam berishni istamaydigan kamida 3ta futbolchi bor. To‘g‘ri “Manchester Siti” bilan o‘yinda hamma pressingda ishladi. Hatto Leo jonli devor ostida yotib olishni o‘ziga or deb bilmadi. U boshqa o‘yin edi. Aynan, o‘sha boshqa o‘yinda jamoa mehnati evaziga g‘alaba qozondi. Lekin hozirgidek o‘zboshimchalik davom etsa, buning oqibatida jamoa himoyasi ancha qiynlib qoladi. O‘sha pozisiyada kamchiliklar borligi ham yaqqol ko‘zga tashlanib qoladi. Chempionlar ligasi guruh bosqichi “Manchester Siti”ga qarshi ikkinchi o‘yinda “PSJ” Liga 1dagi kabi o‘yin ko‘rsatsa, hisob qanday ko‘rinish olishini tahmin ham qilib bo‘lmaydi. Agar shunday holat kuzatiladigan bo‘lsa, ishoning Gvardiola shogirdlari parijliklarni yanchib tashlaydi.
Zidan jamoaning yagona xaloskori(mi?)
OAVda Zidan “PSJ” murabbiyi bo‘lishi mumkinligi haqida ko‘plab xabarlar tarqalmoqda. Xo‘sh u parijliklar uchun nima bera oladi? Zidan qo‘l ostida “PSJ” nimalar yuta oladi? Menimcha, Zidan jamoa uchun juda foydali mutaxassis. Demak, birinchi muammo sifatida yulduzlarni tilga oladigan bo‘lsak, Zidan ulardan ham mashxurroq va uni xurmat qilmaslik mumkin emas. Fransiyalik mutaxassis “Real” tarkibida ko‘plab yulduzlar bilan ishlagan va bu ishni juda yaxshi uddalay oladi. Uning ustiga Zidanning kelishi Mbappeni jamoada olib qolinishiga sabab bo‘lishi mumkin. Zidan ko‘proq mehnat qiladigan futbolchilarga tayanadi. Yaqqol misol sifatida “Real”da Karim Benzema o‘zining mehnatlari evaziga asosiy tarkib o‘yinchisi bo‘lib qolavergan. Demak, kimningdir jamoa asosiy tarkibida o‘ynash istagi bo‘lsa ko‘proq pressingda ishlab mehnat qilishi kerak. Balki shunda rostmana “PSJ”ni ko‘rarmiz. Balki shunda Messi Neymar Mbappe triosi faqat nom jihatidan emas, balki maydonda ham daxshatli bo‘la olar. Buyog‘i esa vaqt hukmiga xavola. Kutamiz Parijda jiddiy o‘zgarishlar bo‘lishi aniq.
Mirjalol Pardaboyev tayyorladi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
