Ёзувчилар, шоирлар, рассомлар ва киноижодкорларни илҳомлантирган мафтункор Пакета ороли кўп ва хўп таърифланган. Пакета - Ер шаридаги энг сокин ва тинч жойлардан бири. Бироқ бу оролда ҳордиқ чиқариш учун узоқ йўл босишса тўғри келади. 70 ёшли Мирао икки набирасини Рио-де-Жанейрога етказиб қўядиган қайиққа улгуриш учун тонг отмасидан уйғонарди. Матеус Рионинг бир бурчагидаги футзал машғулотларига, Лукас эса бошқа томондаги футбол мактабига қатнарди ва учовлон йўл-йўлакай бир нечта автобусга чиқишар, кейин ярим тунда охирги қайиқда ортга қайтишарди. Хуллас, улар тунги соат 1дан кейин уйга киришарди, эртаси куни яна шу йўналиш... Мирао бобо ҳозир ҳаёт бўлганида, ўша машаққатлар эвазига келган натижа билан чинакамига ғурурланарди. Чунки у вақтида Пакета оролининг 3500 аҳолисига ғурур билан Лукас кун келиб, профессионал футболда бўй кўрсатишини айтганди ва ўша гапи аллақачон ўз тасдиғини топиб улгурди. Лукас Пакета баданида Мирао бобо шарафига чизилган татуировка ҳам бор - «М» ҳарфини қамраб олган юлдуз шакли. «Лион» етакчиси энди Бразилия миллий жамоасига ўз футболкасига олтинчи юлдузни тушириш йўлида ёрдам бериш ҳаракатида. Эътиборли томони, «пентакампеонлар» 12 ноябрь куни айнан Лукаснинг ягона голи эвазига Колумбия термасини енгиш асносида 2022 йилги жаҳон чемпионати йўлланмасини нақд қилишди. Лига 1 (Франция чемпионати)да тобора ёрқин тўп сураётган футболчи яқинда ФИФА расмий сайти учун махсус интервью бериб, жонажон ороли табиатини алоҳида таърифлади. Шунинг баробарида испаниялик Хави ва Андрес Иньеста ўйинларини кузатиб, кўп нарса ўргангани, Тите орзу қилган ҳужумкор ярим ҳимоячига айланишга ҳаракат қилаётгани ва Неймар билан бирга ўйнаш қандайлиги ҳақида гапириб берди.
- Пакета оролидаги ҳаётингиз ҳақида нималарни айтиб бера оласиз?
- Одамлар мени доим Тарзанга ўхшатишарди. Чунки на оёғимда пойафзал ва на устимда кийим бўларди. Оролда об-ҳаво ҳамиша қулай, қуёшли. Пакета - таътил учун ажойиб жой. Шундай осуда ва гўзал оролда улғайганим - бахтим. Пакета оролига ҳамиша қадрдон уйимдек қарайман. Болалигим чиндан ҳам, ўзгача ўтган - дўстларим билан ўйин-кулгудан сира бўшамасдик, эҳ, такрорланмас дамлар... Хуллас, гап фақат фамилиямда эмас, Пакета юрагим билан ҳам бевосита боғлиқ.
- «Фламенго» машғулотларига қандай қўшилгансиз?
- Деярли кун бўйи уйда бўлмасдик. Мен кечгача Гавеада, акам эса тушдан кейин Нинхода шуғулланарди. Бобом бизни олиб бора оладиган ягона инсон эди. Шундай қилиб, эрталаб соат 9да уйдан чиқиб, қайиққа ўтирардик. Аввалига акамнинг машғулотларини томоша қилардик. Кейин улар менга ҳамроҳ бўлиб, футбол мактабига боришарди. Ортга эса ярим тунда, охирги қайиқда қайтардик. Дарҳақиқат, машаққатли йўл, лекин орзуга эришиш иштиёқи баланд эди. Бобомни ҳақиқий тоғдек эслайман. У бизни профессионал даражада кўриш мақсадида барча қийинчиликларни босиб ўтди. Афсуски, унга камолотимизни кўриш насиб этмади. Муҳими, бобом бизни мақсад сари йўналтира олди. Агар тирик бўлганида, ҳозирги ҳолатимиздан чинакамига фахрланарди, менимча.
- Айни пайт бўйингиз 180 сантиметрга етибди, ваҳоланки, 15 ёшда бу кўрсаткич атиги 153 сантиметрга тенг бўлган экан. Нисбатан паст бўй туфайли футболчи сифатида муваффақият қозонолмаслигингиздан хавфсирамаганмисиз?
- Очиғи, айнан бўй масаласида анча азоб чекканман - жуда оғир синов. Ҳаттоки, ўйинлар давомида бўйим пастлигидан қандайдир босимни ҳис қилардим. Йўқ, аслида ҳеч ким бу борада менга жиддий гапирмаган, шунчаки, ўзим ноқулайлик сезардим, негадир тушкун ҳолатга тушардим. Эсимда, кўпинча уйга қайтишда йиғлаб олардим. Энг муҳими, бобом, онам ва отамнинг далдалари билан орзуга ишонишда давом этдим. Ҳамиша қалбим тубидан садо чиқарди: «Кун келиб албатта, муваффақиятга эришасан». Чунончи, ҳар доим ишга фидойилик билан ёндашардим, мақсад йўлида таслим бўлмаслигимни яхши билардим. Ҳа, жуда оғир йўлни босиб ўтишимга тўғри келди, асосийси, ҳаммасига чидадим ва натижа ёмон бўлмади.
- Титенинг ЖЧ-2018 учун тузган дастлабки рўйхатига киргандингиз. Жаҳон чемпионатига шунчалик яқинлашиб, якунда унда қатнашмаслик алам уйғотмадими?
- Йўқ. Тўғрисини айтиш керак, Бразилияда 30талик рўйхатга киришнинг ўзи - катта шараф. Бу ҳам бир ғалаба, чунки анча ёш эдим. Аниқроқ айтсак, эндигина «Фламенго» таркибига ўрнашгандим. Шунинг учун назарга тушганимни муваффақият сифатида қабул қилганман.
- Бразилия термасига мундиал чиптасини тортиқ этган гол муаллифига айланиш қандай экан?
- «Селесао» либосида гол уриш ҳар доим ўзгача эҳтирос уйғотади. Колумбия термаси дарвозасига урилган гол эса - мен учун «селесао» таркибидаги энг ҳаяжонли лаҳза. Умид қиламанки, бу либосда ҳали кўп ишларни бажараман.
- Энди жаҳон чемпионатида ўйнашни тасаввур қиляпсизми?
- Бу энг катта орзум, албатта. Болалигимдан мундиал ўйинларини қизиқиш билан кузатаман. Ўйлайманки, ҳар бир футболчи жаҳон чемпионатида ўйнаш орзуси билан яшайди, жумладан, мен ҳам шундайман. Бу орзуни келаси йили чиройли тарзда рўёбга чиқаришдан умидворман.
- Танқидчилар орада маълум муддат Бразилия футболида вазият яратадиган ва гол ура оладиган ярим ҳимоячи йўқлигини айтишдан чарчашмади. Кейин Пакета саҳнага чиқди. Хўш, футболчи сифатидаги тараққиётингизни айнан нима билан боғлайсиз?
- Тушунарлики, ҳозирги даражага етиш учун кўп тер тўкдим. Ҳар бир жойда нимадир ўргандим ва бу ўйинни ривожланишимда роса қўл келди. Менимча, энди ёрқин футболчилар қаторидаман. «Лион» клуби ва Бразилия терма жамоасидаги йигитлар туфайли ўйинни янада яхшироқ тушуняпман. Ўйлайманки, ҳозир юқори спорт формасидаман. «Барселона»нинг ўша машҳур даврида Андрес Иньеста ва Хави каби ижрочилар ўйинларини кўп кузатардим, улардан анча-мунча жиҳатларни ўзлаштирдим. Ўша жамоа жуда ақлли эди. Ҳамиша ўйинга айнан Иньеста ва Хавидек киришишга ҳаракат қиламан, бироқ ҳали уларнинг даражаларига яқинлашмаганим ҳам аниқ. Муҳими, имкон қадар ўргандим, ўрганяпман. Хусусан, майдонда қарор қабул қилишда хотиржамликни сақлаб қолиш масаласида.
- Неймар билан бирга ўйнашни қандай тавсифлайсиз?
- Неймар - чин кумир. Унинг ўйинидан, инсонийлигидан ҳамиша қойил қолганман. Ней билан ўйнаш ҳаммага ҳам насиб қилавермайди ва келажакда фарзандларимга бу ҳақда тўлқинланиб гапириб беришим тайин. Хуллас, Неймар билан бирга ўйнаб, «селесао»га ёрдам бериш - олам-олам завқ, катта шараф. Ишонаманки, ҳамкорлигимиз узоқ давом этади ва ҳали бразилиялик мухлисларни қувончли дамлар билан кўп сийлаймиз.
- «Селесао»ни ҳисобга олмаганда, дунёнинг бугунги кундаги энг яхши терма жамоаси қайси?
- Франция термаси ажойиб таркибга эга. Французлар - бўлажак жаҳон чемпионатининг бош фаворитлари қаторидалар, шубҳасиз. Дарҳақиқат, ўта кучли жамоа. Бошқа терма жамоаларда ҳам ажойиб футболчилар бор, аммо айнан Франция термасига «селесао»нинг асосий рақиби, энг катта синов сифатида қараяпман. Агар мундиалда французлар билан учрашсак, ажойиб ўйин бўлади.
- Ҳозирги кунда дунёнинг энг кучли футболчиси ким, сизнингча?
- Левандовски. Унинг голларига қаранг...
ПАКЕТА - ЛИГА 1 ЛАУРЕАТИ
Лукас Пакета Франция чемпионатининг октябрь ойидаги энг яхши футболчиси сифатида эътироф этилди. «Лион»нинг 24 ёшли ярим ҳимоячиси махсус сўровда 49 фоиз овоз жамғариб, «Ренн» ҳужумчиси Гаэтан Ляборд (39 фоиз) ва «Ницца» вакили Анди Делор (15 фоиз)ни ортда қолдирди. Пакета ўтган ой Лига 1нинг 4та ўйинида 2та голга ассистентлик қилганини қўшимча қилиш ўринли.
М.ПЎЛАТОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
