Футболда бир-бирини тушуниб ўйнаш, шерикни ҳис қилиб ҳаракатланиш ўта муҳим. Бусиз миллионлар ўйинини тасаввур қилиш мураккаб. Ҳозирда суперклублар сафида шундай футболчилар борки, улар жуфтликда бажараётган ишларни баъзи жамоалар ўн битталашиб ҳам эплай олмайди (сал муболағаси билан). Улар киритаётган голлари ва қўлга киритаётган голли узатмалар сони бўйича бошқалардан яққол ажралиб турибди. Шундай экан, бугун “кучли бешлик“ чемпионатларининг кучли жуфтликлари ҳақида тўхталиб ўтмоқчимиз.
Муҳаммад Салoҳ & Садио Мане
АПЛда охирги турлардаги натижалари ҳисоби билан “Ливерпуль“ энг юқори чўққисига қайтиб бормоқда. Ҳимояда “қуруқ“ ўйинлар кўпайиб қолди, Трент ва Робертсон яна супер паслари билан ўзларини эслатиб туришибди, яримҳимоя ҳам ҳар галгидек балансни ушлаб турибди. Айниқса, ҳужумдаги тўртлик фантастик мавсум ўтказмоқда, бизнингча. Бу тўртликни ажратишданда қийинроқ иш йўқ. Бироқ шунга мажбурмиз. Зеро, улар орасидаги икки африкаликни алоҳида таъкидламаса бўлмайди. Манедаги ҳолатни ҳар мавсумдаги каби сермаҳсуллик дейишимиз мумкин. Бироқ Салoҳ ҳозир энг юқори тезликда кетмоқда. Мане ҳисобида 7 гол ва 1 ассист мавжуд бўлса, Салoҳда бу рақамлар 11 гол ва 8 ассистга тенг. Бу кетишда Клопп шогирдлари яна бир марта чемпион бўлиб кетадиган бўлса, футбол жамоатчилиги учун бу умуман ажабланарли ҳол бўлмайди. Бироқ ҳали ҳаммаси олдинда. Шунингдек, футболда олдиндан бир нима дейиш қийин. Ҳар қанча зўр мутахассис бўлсангизда, сизнинг айтганингиз доим тўғри чиқавермайди.
Карим Бензема & Винисиус Жуниор
Бу мавсум авваллари фақат танқидга учраган бу икки чарм тўп усталари учун аталгандек, гўё. Бенземанинг Роналду бор пайтларда қандай танқидларга учрагани ҳамманинг ёдида бўлса керак. Ҳатто уни “Реал Мадрид“ учун иснод деганлар ҳам топиларди. Лекин ҳозир у Роналдудан кўра яхшироқ ва сермаҳсулроқ даврини ўтказмоқда. Вини томон эса охирги пайтларда жуда аёвсиз бўлмасада, аммо танқидлар учраб турарди. Айниқса, унинг ақл билан футбол ўйнамаслиги алоҳида мавзуларга сабаб бўлганди. Шунга қарамай, икковлон ҳам танқидлардан тўғри хулоса чиқара олишди. Айни пайт Каримда 11та гол ва 7та ассист мавжуд. Винисиус эса 9 гол муаллифи ва 2 голга ҳаммуаллиф бўлиб турибди. Папа Карло бошчилигидаги жамоа Европадаги гегемонлигини қайтариш учун жиддий курашишга аҳд қилган кўринади. Ҳар ҳолда, йигитлар қайд этаётган кўрсаткичлар шундан дарак бермоқда.
Роберт Левандовски & Томас Мюллер
“Бавария“ ҳақида сўз кетганда, дарров кўз олдимизга супер машиналар келади. Тезликда, сифат бобида энг юқори ўринларда турувчи ҳақиқий немис машинаси. Таркибида ҳам инсонлар ҳаракатланишига шубҳа пайдо бўлаверади. Роберт Левандовски ва Томас Мюллер мана шундай фикрлашимизга асосий сабабчилардан саналади. Ҳеч нарса ўзгармагандек, бу йили ҳам ушбу шоввозлар ҳайратланарли статистика эгасига айланмоқда. Ваҳоланки, улардан бири 33 ёш, иккинчиси эса 32 баҳорни қарши олган. Бироқ улардаги рақамлар шунчаки фантастика. Жумладан, Роберт жорий мавсумда 14 гол ва 1 ассист муалли бўлиб турибди. Томас эса 4та гол уриб, шерикларига 10та ассист етказиб берган. Қойил қолмасдан илож йўқ, тўғрими? Ахир уларни бежизга “немис машинаси“ деб аташмайди. Ростан одам-подам эмас булар.
Килиан Мбаппе & Неймар
“Париж галактикоси“нинг икки мегаюлдузи нафақат ўз жамоасида, балки бутун Францияда энг яхши натижа қайд этиб турибди. Лионель Мессининг келиши ҳам ҳозирча бу жуфтликни "тахт"дан тушира олмади. Аммо “ўзга сайёралик“ дадил қадамлар билан олдинга қараб ҳаракатлана бошлади. Сўнгги ўйинда 3 голнинг ҳаммасига узатма амалга оширгани унинг яна формага қайтиб бораётганидан далолат. Шунга қарамай, ҳануз ПСЖда Мбаппе ва Неймардан самаралироқ кўрсаткич қайд этадиган футболчи топилганича йўқ. Қайд этиш жоиз, Мбаппе 7 гол уриб, 7 ассист қайд этган. Неймарда эса 3 гол ва 3 ассист бор. Қўшимчасига, Килианнинг Франция диёридаги эҳтимолий охирги мавсумида ҳам супер натижалар кўрсатаётгани таҳсинга сазовор. Ҳақиқий профессионаллиги учун унга ҳар қанча мақтов билдирилса, барибир камлик қилса керак.
Дуван Сапата & Марио Пашалич
Рўйхатимизда ном борасида энг қуйи ўринда турувчи тандемга етиб келдик, азизлар. Ростан ҳам бу йигитларнинг клуби ҳам, машҳурлиги ҳам юқоридагиларга тенглаша олмайди. “Реал Мадрид“, “Бавария“, “Ливерпуль“ ва ПСЖлар қаердаю, оддийгина “Аталанта“ қаерда, тўғрими? Бироқ хулоса чиқаришга шошилманг. Айнан мана шу футболчилар А Серияда клубларини олдинга тортишмоқда. Пашалич голли узатмалар бобида пешқадам бўлса, Сапата тўпурарлар рўйхатида 3 ўринда бормоқда. Қизиғи, бу жуфтлик “Аталанта“нинг деярли 70 фоиз голларида қатнашишган. Яъни Марио ва Дуван “кўк-қоралар“нинг энг муҳим ва ажратиб бўлмас қисмига айланиб улгурган. Эслатиб ўтамиз, колумбиялик ўз ҳисобига 9 гол ва 3 ассист ёздириб қўйган. Хорват эса 4 гол ва 5 голли узатмани ўзиники қилган.
Топ-5 чемпионатларда бундай сермаҳсуллик кўрсатаётган иккиликлар етарлича топилади. Бироқ ўқувчиларимизнинг сабр-тоқатини ўйлаган ҳолда, биз фақат энг яхшилари ҳақида ёзишга қарор қилдик. Нима деб ўйлайсиз, юқоридаги жуфтликларнинг қай бири якунда энг зўр натижа қайд этади? Сиз уларнинг қайсиларини ўз жамоангизда кўришни истаган бўлардингиз?
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
