Мутахассислар томонидан замонавий АПЛда ҳимояланиш санъати йўқолиб бораётгани ҳақида кўп бор таъкидланмоқда. Шунга қарамай, аниқ айтишимиз мумкинки, ҳимоячиларнинг функционал вазифаси дунё футболида бироз ўзгарган. Эндиликда сўнгги тўртталик мудофаа вакиллари фақатгина дарвозани асрашга масъул эмаслар. Бугунги кунда ҳимоячилар, жамоаси учун тўпни сақлаб туриш, аниқ узатма бериш ҳамда қанотлардан голли вазият яратиш борасида ҳам фаол иштирокчига айланиб бормоқда. Бугун эътиборингизга АПЛдаги ана шундай ҳимоячиларнинг кучли ўнталигини ҳавола этмоқчимиз.
10. Конор Коaди – «Вулверхэмптон»
«Бўрилар» азалдан ҳимояни яхши ушлай олиши билан ном қозонган жамоалардан бири саналади. Айниқса, Конор Коaди клубга олиб келинганидан кейин бу иш янада самара билан бажарилмоқда. 28 ёшли мудофаачи Премьер-лигадаги энг ишончли футболчилардан бири саналади. Айнан унинг саъй-ҳаракатлари сабаб, «Вулвз» айни дамда АПЛнинг энг кам гол ўтказиб юборган жамоалари қаторида турибди (16та).
9. Рис Жеймс – «Челси»
«Челси»нинг Томас Тухель қўл-остидаги муваффақиятлари ортида қанот ҳимоясининг бажараётган салмоқли ишлари ҳам бор. Бу ўринда эса Рис Жеймсни алоҳида таъкидлаб ўтиш жоиз. Жеймс ҳимоядаги вазифасини тўлақонли адо этган ҳолда, ҳужумни фаол қўллаб-қувватлайди. Айнан Тухель, Жеймсни бу борада яхши вазифалантира олган, дейиш мумкин. У голлар уради, узатмалар беради ва керак бўлганда мудофаага юзланади. Замонавий футбол шуни талаб қилмоқда...
8. Антонио Рюдигер – «Челси»
Дунё футболининг айни вақтдаги энг кучли вакилларидан бири бўлмиш Рюдигер, ўз позициясида кучли ўйин кўрсатади. Айниқса, Тухель келганидан буён, сўнгги 12 ой ичида бу нарса яққол кўзга ташланди. Немис ҳимоячиси ўйинни яхши ўқиши, ҳаводаги устунлиги ҳамда ҳужумга яхши қўшила олиши билан ажралиб туради. Шу сабабдан унинг харидорлари жуда ҳам кўп.
7. Кайл Уокер – «Манчестер Сити»
Агарда сиз майдонда эркин ҳаракат қилишни истасангиз, ҳимояда Уокер каби «қўрғон»ингиз бўлиши керак. «Ман Сити» ҳамда Англия терма жамоаси ҳимоячиси ўз ҳудудини тўлақонли ҳимоя қила олиши ҳамда ўта тезкор ҳаракатлари билан донг таратган. АПЛда унга етадиган ҳаракат эгасини топиш мушкул иш. Шундай экан, Уокерни энг яхшилар қаторига қўшмаса бўлмайди.
6. Тиагу Силва – «Челси»
Силва 37 ёшда бўлиши мумкин. Аммо шунга нима қилибди?
Қарияликни тан олмайдиган қаҳрамонимиз ўйинларни ўқиш ва жамоасини бошқариш борасида исталган футболчига дарс бериб қўя олади. Тиагу жамоасининг ҳужумдаги яширин қуроли саналади. Стандарт вазият бўлди дегунча, уни жарима майдончаси ичида кўрасиз. Бу бекорга эмас, албатта. Унинг АПЛга келиши «Челси»га фойда келтирди. Жамоа ҳозирга қадар 18та гол ўтказган ва бу борада энг яхшилар қаторида турибди.
5. Жуан Канселу – «Манчестер Сити»
Канселу АПЛга 2019 йилда «Ювентус»дан ташриф буюради. Ўшанда кўпчилик бу харидга менсимай қараган эди. Бугунга келиб, португал Англиядаги учинчи мавсумини ўтказмоқда. Эндиликда 27 ёшли ҳимоячининг нималарга қодирлигини ҳамма яхши билади. Мудофаа ҳамда майдон марказида яхши ҳаракат қилувчи футболчи исталган пайтда жамоадошларини қулай тўплар билан таъминлай олади. Айнан шу сабаб ҳам Пеп Гвардиола уни яхши кўрса керак.
4. Эндрю Робертсон – «Ливерпуль»
Эндрю Робертсонни энг яхши ҳимоячилар орасида кўриш янгилик эмас. Шотландни нималарга қодир эканини ҳамма яхши билади. У мавсум давомида юқори даража кўрсатиб юбора олмаслиги мумкиндир. Аммо кези келганда шундай ўйин қиладики, бунда сиз жаҳон даражаси қандай бўлишини томоша қиласиз! Қанот ҳимоячиси доимо жамоасида ҳужум учун муҳим омил бўлган.
3. Трент Александер-Арнольд – «Ливерпуль»
Ҳа, Трент баъзан ҳимояга эътиборсизлик қилади. Бунга ўтган ойлар давомида ҳам гувоҳ бўлдик. Аммо у бу камчиликларини бир ёнга суриб, ўзини ҳужумда намоён эта олади. Ҳимоячининг жарима зарбаларида моҳир эканини ҳам таъкидлаш жоиз. Шу сабабдан Александер-Арнольд доимо яхшилар қаторида эътироф этилади.
2. Рубен Диаш – «Манчестер Сити»
Диашнинг «Манчестер Сити»га тегаётган фойдаси, қилаётган меҳнати баъзида эътибордан четда қолади. Негаки, у клуб учун анча қимматга тушган футболчи саналади. Ҳимоячи Гвардиола жамоаси учун мос номзод эди. Шунинг учун ҳам олиб келинди. Ростини айтганда, Рубен «Ман Сити» афсонаси Винсент Компани ўрнини боса олди. Шу сабабдан ҳозирда «шаҳарликлар»нинг марказий ҳимоясини ишончли қўлларда дея оламиз.
1. Виржил ван Дeйк – «Ливерпуль»
Қани, ўзинингиз айтинчи, АПЛнинг энг кучли ва яхши ҳимоячиси номига ван Дeйкдан маъқулроқ вариант келтира оласизми? Бизнингча келтира олмайсиз. Чунки бу адолатдан бўлмайди. Нидерландия терма жамоаси аъзоси ўзи қанташган ўйинларнинг ҳар бир эпизодида муҳим роль ўйнайди. Унинг «Ливерпуль»га таъсири жуда ҳам кучлидир. Буни биз ўтган мавсумнинг айнан мана шу паллаларида ҳис қилиб кўргандик. Ўшанда, биргина ван Дeйкнинг йўқлиги «Ливерпуль»нинг чемпионлик пойгасидан чиқиб кетишига сабаб бўлганди. Айни дамда баралла айтишимиз мумкинки, ушбу футболчи ҳақиқий клуб афсонасига айланиб улгурди.
инглиз тилидан Жалолиддин ИСМАТОВ таржимаси
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
