Англия футболида ажойиб тарихга эга бўлган “Манчестер Юнайтед” либосида майдонга тушиш бу катта бахт бўлса керак. Аммо ўша жамоанинг келажаги сифатида сизни кўришса, бундай босимни кўтариш анча оғир бўлса керак. “Қизил иблислар” сўзсиз дунё бўйича кўплаб мухлисларига эга ва ўша ишқибозлар сиздан жуда кўп нарса талаб қилса, менимча жуда ёқимли бўлса керак. Яқинда “манкунианликлар”нинг келажаги сифатида кўрилган Мейсон Гринвуд нималарга аралашиб қолганидан кўпчилик ҳабардор бўлса керак. Энди унинг келажаги нима бўлар экан? Шу сабабли stadion.uz яқин ўтган йиллар ичида “Манчестер Юнайтед”нинг келажаги дея аталган, аммо ўзига билдирилган ишончни оқлай олмаган ёки етарлича имконият берилмаганлиги туфайли йўқолиб қолган 5 та ёш футболчи ҳақида сўз олиб боради.
Диогу Дало 22 ёш.
Португалиялик қанот ҳимоячиси ёшлигидан анча иқтидорли футболчи ҳисобланади. У “Порту Б” жамоасида порлаган ва ўша клуб либосида умумий 23 ўйинда майдонга тушиб 2 бор рақиб дарвозасини ишғол этган. Шу тариқа 2017 йил “Порту”нинг асосий таркибида Далони кўра бошладик. Португалия примьерасида футболчи умумий 6 ўйинда майдонга тушди ва ярим йилдан кейин уни “Манчестер Юнайтед”да кўра бошладик. Илк мавсум Дало учун яхши ўтди. У 16 ўйинда майдонга тушиб 2 голли узатмани амалга оширди ва кўплаб футбол ишқибозлари МЮда яхшигина қанот ҳимоячиси етишиб чиқайтгани ҳақида гапира бошлади.
Кейинги мавсум Дало жарохатлар туфайли жамоада ўз ўрнини йўқотиб қўйди ва 4 учрашувда майдонга тушди. “Манчестер Юнайтед” жароҳатдан сўнг Далони жамоада олиб қолишдан наф кўрмади ва навбатдаги мавсумда уни “Милан”га ижарага бериб юборди ва португалиялик футболчи А Серия вакиллари таркибининг ажралмас бўлагига айлана олди ва жамоада 33 ўйин ўтказиб 2 голга ммуаллифлик қилди. Далонинг ажойиб ўйинини кўргач МЮ уни ортга қайтарди. Ушбу мавсум Дало “қизил иблислар” таркибида 12 ўйинда майдонга тушиб улгурди. Аммо “Милан”дагидек ўйин намойиш эта олмаяпти.
Брендон Уильямс 21 ёш.
Брендон МЮ тарбияланувчиси ҳисобланади. Унинг учун профессионал футбол 2019 йилдан бошланган. 2019-2020 йилги мавсумда Брендон “қизил иблислар” таркибида порлади ва 42 учрашувда майдонга тушди ва 1 гол ва 7 голли узатмага муаллифлик қилди. Албатта бу 19 ёшли футболчи учун вжойиб кўрсаткич.
Кейинги мавсум Уильямс учун унчалик яхши бўлмади. У 19 учрашув ўтказди ва 1 голли узатмани амалга оширди. Ўша мавсум Брендон ўйинида анча пасайиш кузатилди ва жамоа унинг захирада кўп ўтириб қолаётгани сабаб бошқа жамоага ижарага бериш ҳақида ўйлаб қолди. Жорий мавсумда инглиз “Норвич” клубида тўп тепмоқда. Чап қанот ҳимоячиси “канарейка”лар сафида ушбу мавсум 19 ўйин ўтказиб 1 голли узатма амалга оширди. У Премьер лига аутсайдерлари сафида ўзини эркин ҳис этмоқда. Балки МЮ уни қайтариш ҳақида ҳам ўйлаб кўрар.
Тахит Чонг 22 ёш
Фамилиясидан осиёликларни эслатадиган нидерландиялик 2016 йил “Фейнорд”дан “Манчестер Юнайтед” ёшлар жамоасига олиб келинган ва ундан мутахассислар ажойиб келажакни талаб қилган. Аммо Тахит уларнинг ишончини оқлай олмади ва шу сабаб ижарадан-ижарага ўтиб иқтидорини йўқотиб бормоқда. Умумий МЮ таркибида вингер 13 ўйин ўтказган ва умуман фойдали иш бажара олмаган.
Тахит “қизил иблислар” сафида ўзини кўрсата олмагач 3 жамоада ижара асосида тўп тепмоқда. Аввалига у “Вердер” кейин “Брюгге” сафида майдонга тушиб умумий 28 ўйинда 2 гол киритган. Албатта бу вингер учун яхши натижа эмас. Хозирда Чонг Чемпионшип вакили ҳисобланган “Бирмингем” шарафини ҳимоя қилмоқда. Менимча МЮ ундан воз кеадиган пайти етиб келди.
Эйнжел Гомес 21 ёш.
Яна бир МЮ тарбияланувчиси. 2017 йилда профессионал футболда пайдо бўлган футболчи илк икки мавсумида 27 дақиқагина майдонда ҳаракат қилган. Сабаби у пайтларда Эйнжел ҳали жуда ёш эди. Майдондаги ҳаракатлари ва жисмоний кўрсаткичлари билан Лео Мессини эслатувчи инглиз 2019-2020 йилги мавсумда ўзини кўрсата олди. Ўша мавсумда МЮ сафида у 13 ўйин ўтказиб 4 гол ва 2 ассистни ўз ҳисобига ёздириб қўйди. Аммо тушанарсиз қарор туфайли “манкунианликлар” вундеркиндни “Лилль”га арзимаган суммага сотиб юборди.
“Лилль” Гомесни ҳарид қилибоқ “Боавишта”га ижарага бериб юборди. Ёш иқтидор эгаси Португалия клубида 33 ўйин ўтказиб 6 гол ва шунча ассистни ўз ҳисобига ёздирди. Унинг ўйинидаги сифатни кўрган француз клуби кейинги мавсум уни ортга қайтарди ва уни асосий таркибда ўйната бошлади. Ёш инглиз кеча “Лилль” сафида фаолиятидаги энг катта совринни ютди. Негаки ундан Лео Месси либосини сўради. Менимча, бундай холат кўплаб ёш футболчилар учун орзу бўлса керак.
Мейсон Гринвуд 20 ёш.
МЮ академиясининг сўнгги йиллардаги энг иқтидорли тарбияланувчиси сўзсиз – Гринвуд. 20 ёшда дунёнинг энг кучли ва машхур клубларидан бири сафида у 120дан ортиқ ўйин ўтказган ва 35 голга муаллифлик қилган. Шу статистиканинг ўзиёқ унинг қай даражада иқтидорли эканлигини англатади. 19 ёшида терма жамоадан чақирув олиш ҳам кўпчиликка орзу бўлган бўлса керак.
У МЮ асосий жамоасида порлаган пайтлари мактаб ўқувчиси эди. Дарслардан сўнг машғулот ўтказиш учун жамоа таркибига бориб қўшилар эди. Менимча у пайтлар Мейсон ҳали беғубор болакай бўлган.
Афсуски ушбу йил бошида Мейсон зўравонликда айбланди ва бу унинг фаолиятига дахшатли таъсир ўтказди.
“Манчестер Юнайтед” аввалдан академиясидан ажойиб футболчилар етиштириб чиқарган. Аммо сўнгги йилларда улардан чиқаётган иқтидорлар ўзини кўрсатишга қийналишмоқда(Рэшфорддан ташқари). МЮ каттароқ соврин юта олиши учун балки академия фаолиятига жиддийроқ назар ташлаши керакдир?
Миржалол Пардабоев тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
