Жорий йилнинг қишки харидлар бозори ҳам ўзига хос кечди. Унда турли хил трансферлар амалга оширилди. Шулардан бири "Ювентус"нинг Душан Влаховични сотиб олиши эди. Сербия терма жамоаси аъзоси Туриндаги фаолиятини омадли бошлади. Хусусан, у А сериядаги дебют ўйинида "Верона" дарвозасини ишғол этди. Шунингдек, Италия кубоги баҳсида "Сассуоло"га ғалабага голини кирита олди. Влаховичнинг туринликлар сафида расмий голи бизни 13 дақиқа куттирди, холос. Ҳа, Душан "Ювентус" учун анча қимматга тушган. Унинг трансфер қиймати 63 миллион фунтни ташкил этди. 21 ёшли ҳужумчи бу билан қишки трансферлар ойнасидаги энг қиммат харидга айланди. Бундан олдинги рекорд "Арсенал"га тегишли эди (Обамеянг, 56 миллион фунт). Қишки трансферлар ойнасида амалга оширилган энг қиммат харидлар рўйхати қуйидагича:
Душан Влахович (63м)
Пьер-Эмерик Обамеянг (56м)
Диего Коста (50м)
Фернандо Торрес (50м)
Энди Керролл (35м)
Седрик Бакамбу (35м)
Жексон Мартинес (31м)
Кшиштоф Пёнтек (31м)
Тарих бизга қишда сотиб олинган футболчилар, хусусан ҳужумчиларнинг доимо омадли ҳаракат қилмаганини кўрсатади. Аввало, юқоридаги рўйхатда номлари қайд этилган футболчиларнинг омадсизларини айтиб ўтамиз.
Январь омадсизлари
Торрес "Челси" сафига қишки мавсумда келган эди. У жамоада 172 та ўйин ўтказган ва 42 та гол урган. Испаннинг ўртача гол статистикаси битта ўйинда 0,26 тани ташкил этади. Шунингдек, у "Челси" билан учта титулни қўлга киритган. Аммо кўпчилик фикрича, Торрес ўзига сарфланган маблағ ва умидларни оқлай олмади.
Энди Керроллнинг "Ньюкасл"дан "Ливерпуль"га кўчиши ўта муваффақиятсиз трансфер сифатида қаралади. Керролл учун ўшанда мерсисайдликлар 35 миллион фунт сарфлаган. Керролл "Ливерпуль"даги фаолияти давомида жами 11 марта гол уришга эришади. Бу дегани унинг ҳар бир голи "Ливерпуль"га 3,2 миллион фунтдан тушган. Ҳужумчи "Энфилд"ни тарк этиб, "Вест Хэм", "Ньюкасл" ҳамда "Ридинг" каби клубларда ўйнайди. Айни дамда эса инглиз футболчиси "Вест Бром" шарафини ҳимоя қилмоқда.
Жексон Мартинеснинг Осиё юриши ўзига хос кечади. Негаки, у кимсан, "Атлетико"дан сотиб олинади. "Гуанчжоу" сафига 2016 йилда олиб келинган колумбиялик футболчининг нархи 31 миллионни ташкил этар эди. Шунча пул сарфланганига қарамай, Мартинес Хитойда атиги 16 та ўйин ўтказиб, 4 та гол урган, холос. Ҳужумчининг сўнгги манзили Португалиянинг "Портимоненси" клуби бўлганди. Айни дамда Мартинес футболчиликни якунлаган.
Диего Костанинг 2018 йилда 50 миллион фунт эвазига "Атлетико"га ўтиши ҳаммани ҳайрон қолдирганди. Ҳужумчи бутун фаолияти давомида ҳимоячилар учун ҳақиқий қўрқинч бўлиб келди. Аммо унинг Испаниядаги саргузашти омадли кечмади. Жами 83 та баҳсда майдонга туширилган испан жангчиси, атиги 19 та гол уришни уддалай олган. Шунга қарамай, Костада 2018 йилда ютилган Испания суперкубоги ҳамда 2021 йилги чемпионлик титуллари мавжуд. У шунингдек, яқиндагина "Атлетико Минейро" билан бирга Бразилия чемпионига айланди. Умумий олиб қараганда эса, Коста қишки трансферларнинг омадсизидир.
Январнинг омадлилари
Седрик Бакамбу бир муддат Африканинг энг қиммат футболчиси бўлиб туради. Конго Демократик Республикасидан чиққан қаҳрамонимиз "Вильярреал"дан Хитойнинг "Бейцзинг Гоань" клубига йўл олади. Унинг бу кўчиши жуда ҳам омадли келган. Чунки унинг тўрт йиллик Хитойдаги фаолияти 57 та гол билан эсланадиган бўлди (87 та ўйинда). 30 ёшли футболчи айни дамда "Марсель" сафида ҳаракат қилмоқда.
Яқиндагина Лондон шаҳридан жўнаб кетган собиқ жамоа сардори Обамеянг дунёдаги энг омадли январь харидларидан бир саналади. У "Арсенал" сафида жами 163 та ўйинда 92 та гол уришни уддалай олган. Бу дегани ҳар бир ўйинда 0,56 та голдир. Албатта, габонлик футболчи Шимолий Лондонда фақат яхши хотиралар билан эсланади.
Кшиштоф Пёнтек эндигина 26 ёшда. Шунга қарамай, польшалик футболчи "Женоа", "Милан", "Фиорентина" ҳамда "Герта" клублари шарафини ҳимоя қилишга улгурган. Унинг қисқа вақтлик "Сан-Сиро"даги даври 41 та учрашув ва 16 та гол билан ёдимизда қолган. Пёнтек "Милан" сафида ҳар бир ўйинда ўртача 0,39 та гол урган. Айни дамда "Фиорентина"да ҳаракат қилаётган ҳужумчи, клубининг сўнгги иккита баҳсида ҳам гол уришга эришди. Унинг номини "Наполи"га қарши ҳамда "Аталанта" билан баҳсда таблода кўриш мумкин эди. Албатта, Пёнтекка бу борада Влаховичнинг жамоадан кетгани жуда ҳам қўл келган бўлса, ажаб эмас.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
