Турнинг қизиқарли учрашувларидан бири Ғузор шаҳрида бўлиб ўтди. 2007 йилдан буён “Металлург” жамоасини мағлуб эта олмай келаётган Ғузорнинг “Шўртан” клуби бу сафар нохуш анъанага чек қўйиш мақсадида майдонга чиқди, Афсус, бу сафар ҳам ўз мақсадларига етиша олмади...
Учрашувга ҳар икки жамоа икки хил кайфиятда ташриф буюрганди. Ўз майдонида “Қизилқум” жамоасини 1:0 ҳисобида мағлуб этган Рустам Мирсодиқов шогирдлари Ғузорга кўтаринки кайфият билан ташри буюрган бўлса, Игорь Криушенко шогирдлари ЖАРда “Бунёдкор” жамоасига учралган мағлубиятдан сўнг, ўз айбларини ювиш учун майдонга чиқишганди.
“Отлар кечувда алмаштирилмайди” деганларидек, Рустам Мирсодиқов “Қизилқум” билан бўлган баҳсда ҳаракат қилган таркибни деярли алмаштирмаган бўлса, “Бунёдкор” билан бўлган баҳсда катта хатоларга йўл қўйган дарвозабон Александр Корнейчук заҳирада қолдирилди. Шунингдек, амалдаги чемпионларга қарши беллашувда асосий таркибдан жой олган Патрик Агбо “Металлург”га қарши ҳаттоки, заҳирада ўриндиғида ҳам кўриниш бермади. “Қизилқум” билан ташкил этилган ўртоқлик учрашувида жиддий жароҳат олиб, бир қатор ўйинларни ўтказиб юборган Раҳматилло Бердимуродов эса бошланғич таркибга киритилди.
Учрашув майдон эгаларининг ҳужумлари билан бошланди. Ўйиндан олдин, “Металлург” футболчилари “тўпни ол ва тепиб юбор” тактисида ўйнаши ҳеч кимга сир эмасди. 8-дақиқада худди шу “тактика” иш берди. Раҳматилло Бердимуродов жамоасининг ҳужумида иштирок этиб, кутилмаганда тўпни йўқотди. Натижада, Ҳикмат Ҳошимов тўпни олдинга тепиб юборди. Ҳамза Каримов ва Асрор Алиқулов қуршовида қолган Зоҳид Абдуллае эса тезлик билан рақиб жарима майдончасига кириб бораётган паллада, Ҳамза Каримов уни туртиб юборди. Натижада, учрашувни бошқариб бораётган Азиз Асимов ҳеч иккиланмай пенальти белгилади. Белгиланган 11 метрли жарима тўпини эса Шуҳрат Юлдашев аниқ амалга ошириб, ҳисобни очди.
Ўз уйларида, мухлислари кўз ўнгида ўз дарвозаларидан биринчи бўлиб тўп ўтказиб юборган “оқ бўрилар” рақию жарима майдончаси олдида кескин ҳужумларни уюштиришни бошлади. 11-дақиқада Афонин Таранга чиройли тарзда тўпни етказиб берди, лекин ҳимоячилар бир амаллаб тўпни майдон ташқарисига чиқариб юборишди.
27-дақиқада Ботир Қодирқулов Маъмур Икромов билан деярли бирга-бир вазиятга чиқиб борди, лекин Саидкомил Акбаров Қодирқуловни таъқиб қилиб келди ва бу сафар ҳам тўп майдон ташқарисига чиқариб юборилди.
28-дақиқада Ботир Қодирқулов “Металлург” дарвозаси томон кучли зарба берди, лекин Икромов унинг зарбасини бир амаллаб қайтариб қолди, қайтган тўп эса Таранга ккелиб тушди. Тараннинг бош билан йўллаган зарбасини Маъмур Икромов ётган ҳолда ҳам қайтариб қолди. Тан олиш керак, омад шу куни бекободлик футболчилар томонида бўлди. Акс ҳолда, биринчи бўлимнинг ўзидаёқ ҳисоб кўринишга келган бўларди...
32-дақиқада Александр Мерзляковнинг чап қанотдан ошириб берган тўпини Ботир Қодирқулов боши билан дарвоза томон йўллади, аммо салгина ноаниқ кетди.
34-дақиқада Вячеслав Пономарёв тўпни ўнг қанотдан рақиб жарима майдончасига ошириб бермоқчи эди, лекин тўп кутилмаганда дарвоза томон кетиб қолди, буни ҳам Маъмур Икромов катта қийинчилик билан эгаллаб олиб, жамоасиги муқаррар голдан қутқариб қолди.
Тан олиш керак, худди иккинчи бўлим сингари биринчи бўлим ҳам “Шўртан” жамоасининг катта устунлигида ўтди. Тўпни назорат қилишда ҳам, хавфли вазиятларни содир этишда ҳам, стандарт вазиятларни амалга оширишда ҳам “оқ бўрилар” рақибларидан бир калла устун эканликларини исботладилар, лекин буни ҳисобда акс эттира олишгани йўқ!
Иккинчи бўлим ҳам “Шўртан” устунлигида ўтди. Марказий ярим ҳимоячи Таина Соро ўрнига Виталий Рушницкий майдонга чиқди. Натижада, Рушницкий-Таран-Мамазулумовлар тандеми ҳужумда ҳаракат қила бошлади. Бу эса “Металлург” ҳимоячиларига ва дарвозабонига катта ташвиш туғдирди.
Кетма-кет уюштирилган ҳужумларнинг бири пенальти билан якунланди. Дониёр Одиловдан тўпни олиб қўйиб, рақиб жарима майдончасига ёриб кирган Игорь Таран Файзулла Аҳмедов томонидан қўполликка дуч келди. Натижада, Азиз Асимов бу сафар “Металлург” жамоаси дарвозаси томон пенальти белгилади. “Шўртан” жамоасининг штатли пенальтичиси Мўйдин Мамазулумов Маъмур Икромовга ҳеч қандай имконият қолдирмади.
Ҳисобни тенглаштириб олганларидан сўнг, Игорь Криушенко шогирдлари энди ҳисобда олдинга чиқиб олиш учун ҳужумга ташланишди. Қолаверса, ҳужумкор ярим ҳимоячи Аббос Амонов ҳам майдонга чиқиб “Шўртан” ҳужумларида фаол иштирок этаётганди. Лекин, рақиб футболчиси унга қўпол муносбатда бўлганлиги сабабли, Аббос Амонов жароҳат олиб майдонни тарк этди. Атиги 8 дақиқа майдонда тўп сурган Аббос бир вазиятда сал бўлмаса жамоасини олдинга олиб чиқарди. Икки футболчини ортда қолдирган ҳолда, жарима майдончаси остонасида рақиб дарвозасига кучли зарба йўллади. Унинг зарбасини Маъмур Икромов нигоҳлари билан кузатиб қолди, лекин тўп салгина ноаниқ кетди.
Амонов майдонни жароҳат олиб тарк этганидан сўнг, унинг ўрнига Виктор Клишин туширилди. Клишин майдонга тушганидан сўнг, Таран сал орқароқда ўйнади. Ҳужумда эса Мамазулумов-Клишин-Рушницкий тандеми ҳосил бўлди. Бутун жамоа бошлаётган ҳужумни гоҳида якунига етказиб қўядиган ҳужумчи топилмаган бўлса, гоҳида “Металлург” ҳимоячилар ва дарвозабони аниқ ҳаракат қилиб, ҳужумларни қайтариб туришди.
Биринчи бўлимда пенальти ишлаган Зоҳид Абдуллаев иккинчи бўлимда ўз ўрнини Шаҳзод Нурматовга бўшатиб берди. Айнан Нурматовнинг майдонга тушиши “Металлург” футболчиларини ҳисобда олдинга чиқиб олишларини таъминлади. Жарима тўпи “Металлург” жамоаси дарвозаси томон белгиланган чоғда жаримани Раҳматилло Бердимуродов амалга оширди ва унинг йўллаган тўпи тўппа-тўғри Маъмур Икромовнинг қўлига бориб тушди. Тўпни эгаллаб олиши биланоқ зудлик билан олдинда турган Руслан Вагаповга етказиб берди. Вагапов эса тўпни ўнг қанотда эгаллаб олиб, тезлик билан олдинга ташланаётган Шаҳзод Нурматовга етказиб берди. Пономарёв эса Нурматовни таъқиб қила олмади ва Шаҳзод йиқилаётган паллада тўпга зарба бериб, Михаил Наумовни доғда қолдирди.
Ҳисобда олдинга чиқиб олган меҳмонлар тактикани ўзгартиришди – 8-1-1!!! Ҳужумлар кетидан ҳужумлар уюштираверган майдон эгалари ўз мақсадларига етиша олмади ва 2007 йилдан бери мағлуб эта олмай келаётган “Металлург” футболчиларига бу сафар ҳам мағлуб бўлишди. Агар Игорь Криушенко шогирдлари ушбу учрашувни ғалаба билан якунлаганларида, турнир жадвалида якка пешқадамга айланиб олишарди...
Шу ўринда учрашувни бошқариб борган ҳакамлар ҳақида икки оғиз тўҳталиб ўтмасликни иложи йўқ. Учрашувни бошқариб борган Азиз Асимов шу куни ўзининг Олий лига баҳсларидаги дебютини ўтказди. Тан олиб айтиш керак, шу куни Асимов ўзини худди бир неча йиллардан бери Олий лигада ишлаётган ҳакамдек тутди. Барча вазиятларга реал баҳо бериб борди. Футболчиларга қандай муомила қилишни ҳам жойига қўйди, қисқа қилиб айтганда, Азиз Асимов ўз ишини аъло даражада бажарди. Мамлакатимизда мана шундай ҳакамлар кўп бўлса, бундан албатта футболимиз ютади! Шу ўринда Олий лигадаги дебют ўйинини ўтказган Азиз Асимовнинг кейинги ишларига омад ва зафарлар тилаб қоламиз!
Одилбек ТОЛИПОВ
«Шўртан» (Ғузор) – «Металлург» (Бекобод) 1:2 (0:1)
Голлар: М. Мамазулунов (55, пенальти) – Ш. Юлдашев (7, пенальти), Ш. Нурматов (68).
“Шўртан”: М. Наумов, А. Алиқулов, Т. Соро (В. Рушницкий), И. Таран, М. Мамазулумов, В. Афонин, В. Пономарёв, А. Мерзляков, Ҳ. Каримов, Р. Бердимуродов, Б. Қодирқулов (А. Амонов, В. Клишин).
“Металлург”: М. Икромов, О. Исабоев, С. Акбаров, Ҳ. Ҳошимов, Д. Каримов, Д. Одилов (И. Қурбонов), Ш. Юлдашев, Ф. Аҳмедов, Д. Каримкулов, З. Абдуллаев (Ш. Нурматов), Р. Вагапов.
Огоҳлантиришлар: В. Понамарёв (78) – Ф. Аҳмедов (20), Д. Одилов (33), М. Икромов (87).
Энг яхши ўйинчилар: И. Таран – М. Икромов.
Назоратчи: Р. Мўминов (Тошкент).
14.04.2012 й. 4-тур. Ғузор. 5782 томошабин.
Ҳакамлар: А. Асимов (Тошкент), Р. Шояхметов (Тошкент), О. Дачев (Тошкент), А. Эргашев (Тошкент).
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Шуҳрат Шокиржонов
Шерзод Ражабов
Қаҳрамон Асланов
