АПЛ: "Арсенал" - "МЮ"
"Манчестер Юнайтед"нинг дунё бўйлаб миллионлаб мухлислари бугунги классик баҳсда ғалабага умид қилмоқда. Ҳа, жамоанинг аҳволи анча оғир. Аммо яқиндагина Эрик тен Хагнинг олиб келингани эълон қилингач, мухлисларда қайтадан илҳом тўлқини пайдо бўлди.
"МЮ" АПЛдаги сўнгги 4 та ўйинидан 1 тасини ютган, холос. Ушбу ғалаба эса "Норвич"га қарши баҳсда қўлга киритилган эди. Сўнгги ўйиндан эса ҳамманинг хабари бор: "Ливерпуль" майдонида шармандали мағлубиятга учралди. Шу сабаб, бугун жамоадан фақат ғалаба қозониши талаб этилади.
"Арсенал" ўтган турда "Брайтон", "Кристал" Пэлас" ҳамда "Саутгемптон"га қарши кетма-кет мағлубиятлардан кейин "Челси" майдонида ғалабага эришди. 2-4 ҳисобидаги ғалаба, жамоага ЕЧЛ йўлланмаси учун қайтадан умид берди. "Челси" майдонида Сака ҳамда Смит-Роу яна катта майдонга чиқди. Агарда бугунги баҳсда ҳам тўпчиларнинг қўли баланд келса, у ҳолда, бу нарса "Тоттенхэм"га катта босим юклайди. Микель Артетанинг ёш жамоасида қандай режалар борлигини тез орада билиб оламиз.
А серия: "Интер" - "Рома"
"Нераззури"лар бу мавсумда ҳам А серия унвонини муносиб ҳимоя қилишга қаттиқ интилмоқда. Агарда бугун пойтахтликлар мағлуб этилса, у ҳолда "Интер" ўз ҳамшаҳар жамоаси, "Милан"дан ўтиб кетади ва жадвал етакчисига айланади. Ушбу жуфтликнинг сўнгги 10 та ўйинига эътибор берсангиз, "Интер"нинг мағлуб бўлмаганига гувоҳ бўласиз. Шунингдек, улар барча мусобақаларни қўшиб ҳисоблаганда 10 та ўйиндан бери мағлубиятсиз серия қайд этмоқда.
Жамо ҳужумчиси Лаутаро Мартинес Италия кубоги ярим финалида "Милан"га қарши дубл қайд этганди. У бу орқали сўнгги 2 та ўйинда жами 4 та голда бевосита иштирок этишга улгурди. Бугун эса аргентиналикнинг нигоҳи "Рома"га қаратилади.
АПЛ: "Брентфорд" - "Тоттенхэм"
"Тоттенхэм" айни дамда ЕЧЛ йўлланмасини тақдим этувчи 4 ўринни эгаллаб турганидан хабарингиз бор. Бугун улар "арилар" майдонига сафар қилади. "Брентфорд"нинг АПЛдаги илк мавсуми эса ёмон кечмаяпти. Тўғри, жамоа қишда, январь-февраль ойлари давомида инқирозга дуч келганди. Ўшанда улар 8 та баҳснинг 7 тасини бой берган. Аммо ҳозирги жамоанинг ҳолати анча яхши. Хусусан, Томас Франк шогирдлари сўнгги 5 та баҳснинг 4 тасини ғалаба билан якунлаган. Улар ичида "Челси"га қарши 4-1 ҳисобидаги меҳмондаги ғалаба ҳам мавжуд.
"Шпорлар"нинг бу борадаги кўрсаткичлари ундан ҳам яхшироқ. Антонио Конте сўнгги 11 та лига баҳсининг 8 тасини ғалаба билан тугатди. Бу давр мобайнида эса жами 28 та гол уришга эришилди. Аммо сўнгги турда "Брайтон"га учралган кичик ҳисобдаги мағлубият барчасини ўзгартирди. Айни дамда "Тоттенхэм" ҳамда "Арсенал" 32 та турдан кейин бир хил, 57 очкодан жамғариб, 4 ва 5 ўринларни банд этиб турибди. Шу жиҳатдан ушбу баҳс "шпорлар" учун жуда муҳим. "Арилар"га эса АПЛда қолиш масаласини ҳал қилиш учун ғалаба керак.
Бундеслига: "Бавария" - "Боруссия Дортмунд"
"Der Klassiker" доимо Бундеслиганинг энг муҳим ва мафункор ҳодисаларидан бири бўлиб келган. Айнан бугун "Бавария" ўзининг эски ва ашаддий рақибига қарши ғалаба қилиш орқали мамлакат чемпионлигини ҳал этиш имконига эга бўлади. Мюнхенликларни айни дамда иккинчи ўрин билан 9 очко ажратиб турибди ва бугунги эҳтимолий уч очко, жамоани математик жиҳатдан чемпионга айлантиради. Бу эса "Бавария"нинг кетма-кет 10 бор ушбу титулни олишига замин яратади. Хусусан, "Бавария" сўнгги бешта ўйинда "BVB"га қарши 3 та ва ундан кўп гол уриб келмоқда. Бугунги ўйин эса мавсумга ёки "Боруссия Дортмунд"нинг трагедик статистикасига мантиқий якун ясаши мумкин. Роберт Левандовскида эса собиқ жамоасига гол уриш учун жуда қулай имконият мавжуд. Айни дамда польшалик ҳужумчи 30 ўйинда 32 та голга муаллифлик қилиб турибди.
Лига 1: "ПСЖ" - "Ланс"
Бу ерда ҳам Бундеслигага ўхшаш ҳолат кузатилмоқда. Маурисио Почеттинонинг йигитлари бугун "Ланс" устидан ғалаба қозонса, у ҳолда чемпионликка расман эга чиқади. Шунга қарамай, Почеттинонинг клубдаги келажаги сўроқ остида қолган. Бунга асосий сабаб эса жамоанинг ЕЧЛдан жуда эрта чиқиб кетганидир. Бу воқеа раҳбарият ва мухлисларда кучли норозилик уйғотган эди. Клубнинг "тирик юлдуз"ларидан бири Килиан Мбаппе мавсум давомида 22 та гол ҳамда 14 та ассистга муаллифлик қилди. Бугун эса унда бу кўрсаткичларни ошириб олиш учун яхши имконият мавжуд бўлади. 23 ёшли футболчи жамоасини яна бир бор Франция чемпиони бўлишига ўз ҳиссасини қўшиши мумкин.
Хуллас, бугун – катта футбол байрами. Шундай экан, телевизор қаршисида маҳкамроқ жойлашишни унутманг. Зеро, бу кеча сизни асло зериктирмайди!
Жалолиддин ИСМАТОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
