Ушбу ҳафта бир неча сабабларга кўра, Европада катта футбол байрамига айланади. Бизни олдинда бир-биридан қизиқ бўлган футбол оқшомлари кутмоқда. Қуйида эътиборингизга ҳафтанинг энг муҳим воқеалари жамланмасини ҳавола этамиз.
ЕЧЛ. «Манчестер Сити» - «Реал»
«Реал Мадрид» барча мусобақалардаги сўнгги учта сафар ўйинида учтадан гол уриб келмоқда. Улар «Стемфорд Бриж»дан ҳам катта ғалаба билан қайтган эди. Шундай экан, Анчелотти шогирдлари қандай қилиб рақибни доғда қолдириш мумкинлигини яхши билади. Шунингдек, жамоа ҳужумида Карим Бенземадек катта гол қуроли мавжуд. 34 ёшли қаҳрамонимиз фаолиятидаги энг яхши мавсумлардан бирини ўтказмоқда ва «Олтин тўп» учун асосий даъвогар вакил саналади.
Пеп Гвардиоланинг ўта тартибланган жамоаси эса ЕЧЛдаги сўнгги 4 та баҳсда гол ўтказиб юбормай ғалаба қозонган. Аммо ҳужумида Бензема ва Винисиус каби номлар бор «Реал»га қарши бу осон кечмаслиги аниқ албатта. «Манчестер Сити» чорак финалда «Атлетико»ни Симеоненинг услубида тор-мор келтирган эди. Энди эса уларга Испаниядаги энг кучли рақиб рўбаро келади. Шундай экан, бугун тунга попкорн ва ичимликларни тайёрлаб қўяверинг...
ЕЧЛ. «Ливерпуль» - «Вильярреал»
Клопп жамоаси ўзи қатнашаётган барча мусобақаларда юришини давом эттирмоқда. Уларнинг мерсисайд дербисидаги «Эвертон» устидан ғалабаси, АПЛ чемпионлиги учун курашини янада алангаланишини таъминлади. Энди эса «Ливерпуль» ҳафта ўртасида, ярим финал баҳсининг илк босқичида «Вильярреал»ни ўз майдонида қабул қилади. «Сариқ сувости кемаси» ярим финалга қадар «Ювентус» ҳамда «Бавария»ни доғда қолдирганди. Шундай экан, уларни менсимаслик – катта кулфат келтириши мумкин. Бироқ «Энфилд»даги тун кўп нарсани англатади. Мухлислар жамоасини қандай қўллашини яхши биламиз. Бу тунда рақиб томон мураббийи Унаи Эмери ҳам катта синовдан ўтиб олиши керак.
АПЛ. «МЮ» - «Челси»
«Қизил иблислар»нинг жорий мавсумни энг омадсизи сифатида қаралмоқда. Хусусан, сўнгги ўйиндаги «Арсенал»га мағлубият, кучли тўртталик учун қолган зарра умидни ҳам йўққа чиқарди. «Челси» эса кетма-кет учта уй ўйинидаги мағлубиятдан кейин «Вест Хэм» тўсиғидан аммалаб уч очко билан ўтиб олди (1-0). Шу сабаб бу тўқнашув ниманидир ҳал қилиб бермаслиги мумкин. Аммо ҳар икки томонга очколар жуда ҳам зарур бўлиб турибди. Икки гигант тўқнашуви эса доимо қизиқ бўлган.
ЕЛ. «Вест Хэм» - «Айнтрахт Франкфурт»
Дэвид Мойеснинг «болғачилар»и ҳали-ҳамон Еврокубокларда собитқадамлик билан давом этмоқда. Шу билан бир пайтда эса жамоа АПЛда 7 ўринга тушиб кетди ва ҳимояда катта муаммолари мавжуд. Хусусан, Крейг Доусон «Челси»га қарши ӯйинда қизил карточка олганди. Аммо у ярим финалнинг биринчи баҳсида жамоасига ёрдам бера олади. Бироқ, Доусон таркибдаги ягона марказий ҳимоячи бўлиб турибди. Шундай экан, Лондон клубига яна бир «немис машинаси»ни бузиш осон кечмайди. «Айнтрахт» эса чорак финалда «Барселона»ни турнир билан хайрлашишга мажбур қилган.
Ла-лига: «Севилья» - «Кадис»
«Кадис» мухлислари ўз жамоалари билан фахрланса арзийди. Чунки клуб сўнгги ўйинлардаги муваффақияти орқали элитада қолиш имкониятларини ошириб олди. Жануби-ғарбий испанияликлар айни дамда хавфли зонадан ташқарида ва 1 очко уларни ажратиб турибди, холос. Мавсум якунланишига эса 5 та тур қолди. «Кадис» сўнгги турларда «Барселона»ни ҳамда ЕЧЛ ярим финалчиси бўлган «Вильярреал»ни «ухлатган» эди. Шу сабаб, жамоа «Севилья» майдонига оптимистик руҳда боради. «Рамон Санчес-Писхуан» стадиони эса ҳеч қайси рақиб учун осон жой бўлмаган. Айниқса, унинг эгалари Еврокубоклар учун курашаётган бир пайтда...
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
