ФИФА президентининг Ўзбекистонга ташрифи давомида бугун матбуот анжумани бўлиб ўтди. Йозеф Блаттер ва ОФК президенти вазифасини бажарувчи Жанг Цзилонг матбуот анжуманига қадар пойтахтимиздаги Форумлар саройи ва қуриб битказилаётган “Бунёдкор” ва “Пахтакор” стадионини кўздан кечиришди.
Матбуот анжуманини ЎФФ президенти Мираброр Усмонов кириш сўзи билан очди.
— Хабарингиз бор, ФИФА президенти Блаттер ва ОФК президенти в.б. Жанг Цзилонг кеча юртимизга ташриф буюришди. Ушбу ташрифнинг маъноси катта. Уларнинг мақсади Ўзбекистонда футболнинг ривожланиши, футбол инфраструктурасида юз бераётган ўзгаришлар билан яқиндан танишиш. Айниқса, юртимизда футболни ривожлантириш бўйича давлатимиз раҳбари томонидан қабул қилинган бир неча қарорлар ва ҳукумат томондан футболнинг қўллаб-қувватланаётганидан хурсанд бўлишди. Қарорга кўра, юртимизда 9та стадион қуриляпти. Шулардан 7таси ушбу йилда тугатилса, қолган 2таси келаси фойдаланишга топширилади. Ушбу стадионларнинг барчаси халқаро талабларга жавоб берадиган ва уларда ҳар қандай халқаро мусобақа ўтказиш мумкинлигини эътироф этиш жоиз. Амалга оширилган ишлар учун меҳмонлар бугун Президентимиз билан учрашувда ўзларининг улкан минннатдорчиликларини билдиришмоқчи.
Шундан сўнг ФИФА президенти Йозеф Блаттерга сўз навбати берилди.
— Добрый день, Салом алайкум! Матбуот анжуманида мен билан бирга яна икки раҳбар иштирок этишмоқда. Матбуот анжумани очиқлик ва холислик тамойилларига кўра ўтказилади. Хабарингиз бўлса, ўтган йили ФИФА ижроқўми нохуш қарорга келганди. Унга кўра, 20 ёшгача бўлган аёллар ўртасидаги жаҳон чемпионати Ўзбекистондан олиб қўйилди. Ташрифимиздан асосий мақсад, ФИФА Ижроқўмининг мазкур қарорига изоҳ бериш ва келажакда Ўзбекистонда ФИФА тадбирларини ўтказиш масалалари бўйича суҳбатлашишдан иборат. Айтишим лозим, Ўзбекистонда футбол тараққиётидан ҳайратдаман. Олдинга ўтиб қарайдиган бўлсак, Ўзбекистон футбол федерацияси жуда ҳам ишончли ва кучли қўлларда экан. Бу йил ўзбек футболининг 100 йилиги нишонланади. Мираброр Усмоновнинг айтишича, Ўзбекистоннинг барча терма жамоалари ФИФАнинг турли ёшдаги ЖЧларига йўл олишни исташади ва бунинг устида ишлашмоқда. Айниқса, миллий терма жамоага катта омад тилайман ва уларни Бразилияда бўлиб ўтадиган ЖЧда кўришни истайман. Бундан ташқари бошқа терма жамоаларнинг ҳам нуфузли мусобақаларга йўл олишида уларга омад тилайман. Бугунги кунда янги анъаналар ва янги усулларда менинг юрагим Ўзбекистонда эканини айтиб ўтмоқчиман.
Энг аввало футбол ҳақида гапирганда, инфратузилмани тилга олиш лозим. Бугун бориб кўрган — “Бунёдкор” стадонида футболнинг 100 йиллиги нишонланар экан. Бундан ташқари, “Пахтакор” марказий стадионини томоша қилдик. Шунингдек, ЎФФ сунъий қопламали майдонида шуғулланаётган ёш футболчилар ва бу ердаги спорт иншоотларини кўздан кечирдим. Футбол инфратузилмаси келажакдаги мусобақалар учун тайёр. Лекин, шу билан бирга, халқаро мусобақаларни ўтказиш учун инфратузилмани янада ривожлантириш керак. Футбол инфратузилмасидан ташқари мен бугун яна 2та бинони бориб кўрдим. Бир сўз билан айтганда, Ўзбекистон ФИФА конгрессини қабул қилишга тайёр. Нафақат Конгресс, балки ФИФАнинг бошқа ёшдаги терма жамоалар ўртасидаги ЖЧни қабул қилишга ҳам тайёр. Лекин миллий терма жамоалар ўртасида ЖЧ 2022 йилгача ўз мезбонларига эга бўлиб улгурган. Демак, Ўзбекистонда миллий терма жамоалар доирасидаги имконият 2030 йилда бўлиши мумкин. Бу ерда йиғилганлар учун ва жаноб Усмоновда эса кутишга вақт йўқ. Ҳозирча эса борига қараб интиламиз.
— 20 ёшгача бўлган аёллар ўртасида ЖЧнинг Ўзбекистондан олиб қўйилишига изоҳ бериб ўтсангиз.
— Ҳали таъкидлаб ўтдим, биз бўлиб ўтган ишлар ҳақида эмас, бундан кейинги режаларни муҳокама қилиш учун келдик. Шундай бўлсада, ахборот сифатида айтиб ўтишим мумкин. Бундай қарор учун барча масъулиятни ФИФА ўз зиммасига олади. Бунда ЎФФнинг айби йўқ. Ўзи аввалданоқ ФИФА бу борада ишни нотўғри йўлга қўйганди. Аслида аёллар ўртасида мусобақа Вьетнамда бўлиши керак эди. Ўзбекистонга буни беришдан аввал диққатлироқ бўлишимиз лозим эди. Мен бугун расман ФИФА президенти сифатида барча ўзбекистонликлардан расман узр сўрайман. Мен фақатгина узр сўраб кетмоқчи эмасман. Келажакдаги ҳамкорлик ҳақида ҳам аниқ қарорларга келамиз. Беайб Парвардигор.
— Ўзбекистоннинг ФИФА U17 ва U20 жаҳон чемпионатларини қабул қилишдаги имкониятлари ҳақида нима дея оласиз?
— Савол учун раҳмат. Ҳали айтиб ўтганимдек, келажакда Ўзбекистоннинг ўсмирлар ва ёшлар ўртасидаги мусобақаларни ўтказиш имконияти бор. ФИФАнинг мусобақалар тақвимига қарайдиган бўлсак, 2015 йилги ёшлар ўртасида ЖЧ Осиё қитъасида ўтказилиши кўзда тутилган. Жаҳон чемпионатини қабул қилишни истаган давлат ўзига хос чора-тадбирларни амалга ошириши лозим. Шунга қарамай, аниқ айтишим мумкин, ФИФАнинг 2015 йили ўтказиладиган 20 ёшгача бўлган ёшлар ўртасидаги ЖЧни қабул қилиш учун Ўзбекистонда яхши имконият бор. Бу ФИФАнинг нуфузи бўйича иккинчи мусобақаси ҳисобланади. У ОАВнинг энг катта қизиқишига сабаб бўладиган муҳим турнирлардан бири. Унда 24та жамоа иштирок этади, демак, 52та ўйин ўтказилади. Бунинг учун эса 6та стадион керак бўлади.
— Ушбу йилда ўзбек футболи ўзининг 100 йиллик тўйини нишонлайди. ФИФА ушбу тўйга тўёна билан келадими?
— 100 йиллик тантаналар пайтида албатта Ўзбекистонга келамиз. Албатта, қуруқ келмаймиз. Қандай совға билан ташриф буюришимиз эса тадбирнинг қайси санада ўтказилишига боғлиқ. Лекин қуруқ келмаймиз. Шуни аниқ айтишим мумкин.
— Ўзбекистон ампутантлар терма жамоаси сўнгги 2та Жаҳон чемпионатининг ғолиби ҳисобланади. Аммо бу терма жамоалар ўртасида ЖЧни ўтказишда айрим муаммолар бор. Бу борада ишлар яхшиланадими?
— ФИФА тақвими шунчалик тиғиз ва мусобақаларга бойки, тақвимга ундан ҳам кўра нуфузлироқ мусобақани қўйиш учун бўш сананинг ўзи йўқ. Бир йилда 365 кун вақт бор. Бу йил 366 кундан иборат бўлади. Аммо ортиқча 1 кун етарли эмас. Биз бу нарсани алоҳида кўриб чиқамиз.
Бугун ЎФФ ўтказган презентацияда ўзимиз учун бир янгиликни олдик. Болалар футболининг тараққиётига кичик футбол майдонларини қуриш орқали ҳам эриши мумкинлигини ЎФФ исботлади. Бу йўналишда Ўзбекистондан ўрнак олсак арзийди. Сўзим якунида айтмоқчиман. Футбол аввало — тартиб, ҳалол ўйин, таслим бўлмаслик (ҳам руҳан, ҳам жисмонан), ёлғиз эмас, жамоавий. Ҳеч ким ёлғиз қолмаслиги керак. Ғалаба қозонишни ўрганиш осон, мағлубиятга учрашни ҳам ўрганиш керак. Футбол ҳаёт мактаби. Футбол умид берувчи жиҳат. Чунки мағлубиятга учрасангиз, кейинги ўйингача ғалаба қозониш умидида яшайсиз. Мавсум давомида 26та ўйин ўтказилча (анжуманлар залидаги Олий лига ўйинлари жадвалига ишора қилиб) ва мавсум давомида 26 марта умид қиласиз. Футбол — бу ҳиссиётлар. Футбол халқларни барлаштиради. Футбол ўйин. Ундан ва ҳаётдан лаззат олинг.
Матбуот анжумани якунида Блаттер ФИФА Ижроқўми номидан ФИФА делегациясининг Ўзбекистонга ташрифи ҳақида битик ёзилган вимпелни ЎФФ президенти Мираброр Усмоновга совға қилди.
Олимхўжа БЎРОНОВ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
