23 ёшли Фран Бельтран якунланган мавсум машаққатли меҳнат, камтарлик ва истеъдод туфайли Эдуардо Коудет қўл остидаги «Сельта»нинг асосий футболчилари қаторига қўшилди.
Виго клуби ярим ҳимоячиси айниқса, Примеро финишга яқинлашган палла, яъни чемпионатнинг охирги турларида фаолликни оширди, ўйинларда алоҳида ажралиб турди. SPORT нашри журналисти Испания лигаси кашфиётларидан бири билан суҳбатда унинг айнан шу юксалиши ҳақида гаплашди.
- «Сельта» чемпионатда чакки кўринмади. Айтингчи, Эдуардо Коудет жамоада аввало, нималарни ўзгартирди?
- Ўзи «Чачо» (мураббийнинг лақаби) меҳнати муносиб қадрланмайдиган мутахассислар тоифасидан. Айтишим мумкинки, шу ёндашув туфайли клубимиз бир неча йил давомида анча қийналди. Дейлик, «Сельта»га ҳаттоки, қуйи лигага тушиб кетиш хавф солди, ўшанда сўнгги ўйингача қил устида тургандик. Мана, Коудет жамоага нақадар мос келишини амалда исботлади. У аввало, йигитларга ҳеч қачон бўшашмасликни ўргатди. Энди кўп нарсага эришишимиз мумкинлигини яхши биламиз.
- Келаси мавсум жамоа олдига еврокубокларга чиқиш мажбурий вазифа сифатида қўйиладими? Ҳар ҳолда, «Сельта»нинг 100 йиллиги нишонланади.
- Муҳими, жамоада иштиёқ масаласида муаммо йўқ. Ҳозир узоқ муддатга мўлжалланган режа бўйича барқарорликни топиш ҳаракатидамиз. Ўйлайманки, клуб тўғри йўлда. Еврокубоклар масаласига келсак, ошкора тан олиш керак, қаторасига икки мавсум жадвалнинг иккинчи қисмида курашган жамоанинг қўққисдан халқаро даражага кўтарилиши осон эмас. Бунақаси камдан-кам кузатилади.
- Мана, қойилмақом ўйинларингиз ортидан Коудет жамоасининг асосий «фигура»ларидан бирига айландингиз...
— Ҳар доим тинмай шуғулланадиган, қийинчиликларга қарамай, ортга чекинмайдиган йигитман. Жамоада жой топиш учун астойдил курашдим. Мабодо ўрнимни йўқотиб қўйсам, уни қайтариш йўлида янада кўпроқ тер тўкишим аниқ. Умид қиламанки, ўрнимни энди бермайман, чунки ўз устимда ишлашдан қочмайман. Зеро, нафақат футбол, балки ҳаётда ҳам мақсад сари фақат меҳнат қилиш керак.
- Яқинда «Сельта» билан шартномангиз муддатини 2026 йилгача узайтирдингиз. Келажагингизни қандай кўряпсизми?
- Футболда келажакни билиш имконсиз. Бугун бир клубдасиз, эртага бошқасида... Ҳа, шартномамни янгиладим, демак, яқин йилларда «Сельта» билан бирга бўламан. Ажраладиган кун келса, яхшиликча хайрлашаман, албатта. Бугунги ҳақиқат шуки, ҳозирча биргамиз ва ягона йўналиш бўйича олдинга интиламиз.
- Испания термасида аллақачон дебют қилдингиз. Миллий жамоадаги истиқболингиз ҳақида нима дея оласиз?
- Тушунарлики, мамлакатнинг бош жамоасида ўйнаш - орзу. Лекин 1та ўйин орзу ушалганини англатмайди. Демоқчиманки, анча кўпроғини хоҳлайман. Мени бошқа чақиришмайдими? Эҳтимол, лекин виждоним қийналмаслиги учун ҳамиша бор куч билан ишлайвераман.
- Испания U-21 термасида Педри ва Эрик Гарсия билан бирга ўйнагансиз. Ҳозирги «Барса» ўйини ёқяптими?
- Ҳар иккиси жуда иқтидорли. Педри ва Эрик ҳозир шундай савияда ўйнашаётган экан, демак, бу уларда ўзига хос жиҳатлар борлигидан далолат. Ҳақиқат битта - ҳар икки футболчи анча кучли. Шу жойда айтишим керак, «Сельта» ҳам ёшларни тарбиялаш ғоясига содиқдир.
- Тўп билан муомала қилишда ажралиб турибсиз. Бу борада кимни эътироф этасиз?
- Серхио Бускетсни. У ҳеч қачон тезкорлик ёки жисмоний куч масаласида биринчи бўлган эмас, лекин тўпни яхши назорат қилиши туфайли ҳамиша энг яхши ярим ҳимоячилар қаторида. Чунки ҳудуд ва вақтни қойилмақом тарзда бошқаради.
- Ижтимоий тармоқларда унаштирилганингизни эълон қилдингиз. Тўй яқинми?
- Ҳа, албатта. Вақти келди. Маросимни ёз ойларига мўлжаллаяпмиз. Барчаси гўзал бўлиши ва ҳамма завқ олишидан умидворман.
М.ПЎЛАТОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
