"Арсенал" мухлислари, энг катта душман саналган "Тоттенхэм"нинг трансфер бозоридаги кескин ҳаракатларини кўриб, хавотирга туша бошлаган эди. Бироқ, уларнинг севимли жамоаси ҳам бўш келишни истамади ва ҳеч ким кутмаган бир пайтда "Порту"дан ёш ярим ҳимоячи, Фабиу Виейрани харид қилди. Португалия ёшлар терма жамоаси аъзоси тез орада "Арсенал" футболчиси сифатида расман таништирилади. Ушбу янгилик кўпчиликда бир қанча саволларни ҳосил қилгани ҳам бор гап. Негаки, айни дамда "Арсенал"нинг ишончли чизиғи ярим ҳимоя саналади. Яна у ерга янги футболчи сотиб олиш эса, бироз ғалати ҳолат. Хўш, "Арсенал" ёки Микель Артета Виейрани жамоага қандай мошлатирмоқчи?
22 ёшли ярим ҳимоячининг майдондаги роли "Порту"да аниқ эди: у ҳужумчиларни голли пасслар билан таъминлаши керак бўлган. Аммо "Арсенал"да бу ишни қойилмақом қилиб уддалай оладиган ўйинчилар етарлича. Шу сабабдан Фабиу, "Арсенал"да захирага михланиши мумкин. У ҳолда, раҳбарият жамоа учун муҳим бўлган 35 миллион еврони ўйламай сарфлаган бўлиб қолади. Аслида эса ундай эмас. Ўтган мавсум давомида ҳужумда қўшимча куч етишмаслиги Микель Артетани қийнаб келди. Айнан мана шу нуқтайи назардан ҳам бугун "Арсенал" қўшимча ижодкор футболчига муҳтож бўлиб турганди. Фабиу Виейра эса ана шу ўйинчидир. Ўтган мавсумда Португалия чемпионатида 14 та голли пассга муаллифлик қилган португал тез орада АПЛ юлдузига айланиши мумкин.
Фабиу Виейрани майдондаги позицияга жойлаштиришда озгина муаммолар вужудга келиши мумкин. Чунки Виейра Эдегор билан деярли бир хил ўринда ўйнайди. Микель Артета эса бу борада озгина ўйлаб кўриши керак. Бунда энг катта эҳтимолий сценарий бу, Виейрани марказга кўчиришдир. Чунки Эдегор ўнг қанотда сермаҳсуллик намойиш этиб келмоқда. Европа лигаси мусобақаси ҳам борлигини инобатга олсак, ротациялар кўпаяди ва мураббийда янги футболчиларни ҳар хил нуқталарда синаб кўриш имкони пайдо бўлади. Қолаверса, Преьмер лигада янги мавсумдан бошлаб бештагача футболчи алмаштиришга рухсат этилмоқда. Бу ҳам таркибни идеаллаштиришда қўл келади.
Виейрадан, шунингдек, ўнг қанот вингери сифатида ҳам фойдаланиш мумкин. Қачонки Букайо Сакада муаммо бўлса, эндиликда Микель Артета Фабиуни ишга солиши мумкин бўлади. Бу ҳам "Арсенал"нинг фойдасига хизмат қилади. Умуман олганда, 22 ёшли ярим ҳимоячи "Порту"да ҳам Португалия термасида ҳам ўзининг мослашувчан ва кўпфункцияли эканини намойиш этиб улгурган. У осонлик билан ҳар икки қанотга ёки марказга мослаша олади. Шунинг учун ҳам жамоа мухлислари бу хариддан фақат хурсанд бўлишлари керак. Микель Артета эса "Арсенал"ни ёшартиришни давом эттиради. Унинг эндиги нишони ҳужумчи сотиб олишдир. Жамоага марказда ҳаракат қиладиган страйкер зарур.
Бу борада "Манчестер Сити" вакили Габриэль Жезус ёки "Лидс" ҳужумчиси Рафинья энг катта нишон сифатида эътироф этилган. Кўрамиз, "Арсенал" ёзни яна қандай трансферлар билан якунлар экан...
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
