Қандайдир икки кун мобайнида шунча ўзгаришлар бўлиб кетдики, бундан бошинг айланиб кетиши ҳеч гап эмас. Ҳаммадан ҳам терма жамоамизнинг жаҳон чемпионати 4-саралаш босқичи доирасидаги биринчи ўйинини интизорлик билан кутган эдик. Ўзбекистон терма жамоаси “Жар” стадионида эронлик футболчиларни қабул қилишди. Якун биз кутганчалик бўлмади. Вакилларимиз охирги секундларда ютқазиб қўйишди.
Бош жамоамизнинг тайёргарликлари бизнинг кўз ўнгимизда “Жар” стадионида ўтди. Шу боисдан ҳам тайёргарлик борасидаги ўз фикрларимни айта оламан.
Терма жамоа узоқ муддатдан сўнг йиғилди. Бироқ тўлиқ таркиб учрашувга 2-3 кун қолганида жамланди. Бундай вазиятларда мураббийлар қийин синовни бошдан кечиришади. Барчани бир маромга келтириш осон иш эмас. Кимдадур чемпионат ўйинлари эндигина якунланган бўлса (масалан Россия ва БААда), бошқалар (“Бунёдкор” аъзолари) Узоқ Шарқдаги оғир учрашувдан сўнг терма жамоа лагерига етиб келишган эди. Шу боисдан ҳам Вадим Абрамов ва унинг ёрдамчилари учун футболчилар ҳолатини бир маромга келтириши енгил бўлгани йўқ.
Шунингдек, дисквалификация туфайли Эронга қарши майдонга туша олмайдиган беш нафар футболчининг йўқлиги ҳам ўз таъсирини кўрсатмасдан қолмасди. Қолаверса, жароҳатланган ўйинчилар ҳам бор эди. Майдонга оптимал таркиб туша олмайдиган бундан вазиятдан мураббийлар чиқиб кетиш йўлларини қидиришди.
Очиқ ва ишонч билан айта оламан – футболчиларга эътироз билдириш ўринсиз. Барча ўйинчилар ғалабани ўзимиз томонга оғдириш учун бор кучларини ишга солишди. Ҳавфли вазиятлар яратиш борасида бизникилар Эрондан анчайин устунликка эга бўлишди. Виктор Карпенко, Александр Гейнрих, Одил Аҳмедов ва бошқа ўйинчилар содир этган вазиятларни бир эсланг. Қаердадур дарвозабоннинг маҳорати қўл келган бўлса, бошқа ҳолатларда омад биздан юз ўгирди. Агарда япониялик ҳакамлар Одил Аҳмедовнинг тоза голини инобатга олишганида эди... ғалабани нишонлаётган бўлардик.
Афсуски, бу сафар ҳам ҳакамлар билан боғлиқ муаммога йўлиқдик. Ҳа, Япониядан келган ҳакамлар биз ўйлаганчалик маҳоратга эга эмас эканлар. Лекин улар голни атайин ҳисоблашмади деган фикрдан йироқман. Шунчаки, Юичи Нишимура ҳам, унинг қанотдаги ёрдамчиси Тору Сагара ҳам ўша онда тўп чизиқни кесиб ўтганини пайқамай қолишди. Бу вазиятда УЕФА қўллаётганидек дарвозалар ортидаги ҳакамлар етишмади. Ахир биз қандайдир ўртоқлик учрашувини эмас, балки жаҳон чемпионати саралаш учрашувини ўтказяпмиз-ку!
Сўнгги сонияларда гол қўйиб юборган вазиятда бизни тоза ҳимоячи қутқариши мумкин эди. Лекин ўшанда дарвозабон олдида асли ярим ҳимоячи бўлган Азизбек Ҳайдаров қолганди. Нима дейиш мумкин: бу – футбол! Ҳали бутун учрашув сценарийсини олдиндан қоғозга тушиб берадиган ёзувчи туғилгани йўқ. Айнан шундай жиҳатлари билан футбол миллионлар ўйинига айланиб улгурган. Кутилмаган вазиятларга бой бўлгани учун ҳам уни мухлислар севишади. Бугун қайғудамиз. Ўйлайманки, эртага муваффақиятни тантана қилаётган бўламиз.
Терма жамоамизнинг бугунги ҳолати яхши эмас. Бироқ вазиятни ўнглаш учун имконият етарли. Осиё Чемпионлар лигасининг гуруҳ босқичини “Бунёдкор” қандай бошлаганини бир эсланг. Ўз майдонимизда австралияликларга ютқазиб қўйган бўлсак-да, кейинчалик нафақат гуруҳдан кейинги босқичга чиқишни, балки чорак финал йўлланмасини ҳам қўлга кирдик. Чемпионлар лигасининг гуруҳ босқичида бизнинг захирамизда бешта ўйин бор эди холос. Терма жамоамизни эса яна етти ўйин кутиб турибди. Шундай экан тушкунликка тушишни кераги йўқ. Мамлакатимизда маҳоратли ва иқтидорли футболчилар талайгина. Энди улар янги бош мураббий қўл остида жаҳон чемпионатига чиқиш учун курашишади.
Терма жамоанинг янги бош мураббийи – Миржалол Қосимов! Биз у билан бир жамоадамиз. Шу боисдан ҳам Миржалол учун жудаям хурсандман. www.goal.com интернет-портали Миржалол Қўшоқовични май ойида Осиёнинг энг яхши мураббийи деб топди. Унинг кетидан эса Миржалолни терма жамоага бош мураббий этиб тайинлашди. Буларнинг барчаси “Бунёдкор” футбол клуби мураббийлар штабида олиб борилаётган тўғри ишларнинг самарасидир. Шахсан ўзим ва бутун жамоамиз номидан Миржалол Қосимовга терма жамоамизда улкан муваффақиятлар тилайман. Мамлакатимиздаги ҳар бир мутахассис бош жамоада ишлашни орзу қилади. Ҳа, энди мураббийга ва уни шогирдларига осон бўлмайди. Биз клубда Миржалол Қўшоқович билан унинг ишлаш тартибини келишиб оламиз. Терма жамоа манфаатлари учун унга қўлимиздан келган барча ёрдамларни кўрсатишга тайёрмиз. Ўйлайманки, ҳамжиҳатликда барча ишни тўғри олиб бора оламиз. Ҳалқаро майдонда мамлакатимиз шарафини ҳимоя қилаётган “Бунёдкор”нинг мақсад ва вазифалари аввалгидек қолади.
Яна бир хабар билан жамоамиз мухлислари эътиборини тортмоқчиман. 4 июнь куни “Бунёдкор” ҳужумчиси Камолиддин Мурзоев оила қурди. 2012 йил юртимизда “Мустаҳкам оила йили” деб эълон қилинган. Шундай экан, Мурзоевга мустаҳкам оила муборак деб қоламан. Ёшларга ўзимнинг барча эзгу тилакларимни билдириб ўтмоқчиман.
Ҳаёт шунақа: унда барчага жой бор – муаммолар, ютуқлар, қувончлар... Хурсандчилик кунларимиз кўп бўлсин деб қоламан.
Бахромжон ДАВЛАТОВ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
