Сўнгги кунларда, 1979 йилда суратга олинган “Риккардо Финсининг детектив агентлиги” филмидан олинган қисқа лавҳа Италия ижтимоий тармоқларида кенг тарқалди. Эпизодларнинг бирида филм қаҳрамони Ренато Поззетто : “ Мен Монцаданман, биз А серияга ҳеч қачон йўлланма ололмаймиз” дейди. Бу маҳаллий аҳолининг истеҳзоли иборасига айланди. “Монца” мухлислари ҳатто қўшиқларнинг бирида уни шундай жумлалар билан такрорлашади: “Биз А серияга чиқа олмасакда, таслим бўлмаймиз ва бу “Монца”га хосдир. Сиз ҳам она шаҳрингиз жамоасига мухлислик қилинг”. Жорий йил май ойида “Риккардо Финсининг тамғаси” олиб ташланди. “Монца”лик ишқибозлар қўшиқни қайта яратишлари зарур. Милан чеккасидаги 110 йиллик тарихга эга жамоа илк бор Италия олий лигасига йўлланмани қўлга киритди.
“Милан” билан алоқалар
Шубҳасиз, 2018 йилда C серияда ўйнаётган жамоани “Милан”нинг собиқ эгаси Силвио Берлускони, аниқроғи унга тегишли Фининвест компанияси сотиб олмаганида эди, “Монца” ҳозир ҳам қуйи дивизионда ўйнаётган бўларди. У клубга узоқ йиллик ҳамкори, буюк “қизил-қора” жамоанинг яна бир муҳим инсони Адриано Галлиани билан бирга келган. Ўшанда La Gazzeta dello Sport нашри маълумотларига кўра, шартнома тахминан 3 миллион еврони ташкил қилган.
Миландаги каби Берлускони Галлианига асосан оператив бошқарувни юклади. Умуман олганда, бу танлов “Монца”га мос тушди, чунки Берлусконининг вилласи Бриането аренадан уч километр масофада жойлашган эди. Яна бир муҳим жиҳати Галлиани айнан шу шаҳарда туғилган, у матбуот анжуманларининг бирида қуйидаги илиқ фикрларни билдириб ўтади: “ Европада катта ўйинлар ортда қолганди, бир куни менга C серияда ишлашга нима дейсиз деб савол беришди, мен “Монца”да зўр хоҳиш ва иштиёқ билан ишлай оламан. Шунчаки, Милан 31 йил мени ижарага олганди!”
Соқол ва татуировкага тақиқ
Янги хўжайинлар келгандан бир ой ўтиб, “Монца” янги бош мураббий топди. У “Милан”нинг собиқ ярим ҳимоячиси Кристиан Брокки эди. Бир неча ойдан сўнг эса жамоа таркиби сезиларли даражада ўзгарди. 2019 йилнинг январида жамоани 14 нафар футболчи тарк этган бўлса ўрнига 16 нафари қўшилди. Футболчилар трансфери учун атги 2,15 миллион евро сарфланди. Лекин C серия жамоаси учун бу яхшигина маблағ эди.
Берлускони дарҳол ўз қоидаларини ўрната бошлади. У ўйинчиларга соқол қўйиш, сирға тақиш ва татуировка чиздиришни тақиқлади.У фақат италияликлар ўйнайдиган намунали жамоа тузмоқчилигини айтди.
Биринчи мавсум “Монца” Б серияга чиқа олмади, аммо кейинги йил улар ўз дивизионларидаги барча жамоани мағлуб этишди. 2019/20 йилги мавсум пандемия сабабли эрта тугатилган бўлишига қарамай “Монца” энг яқин тақибчисидан 16 очко олдинда эди.
Плей-офф босқичидан ўтиш
2020/21 йилги мавсумда клуб трансферлар учун 20 миллион евро сарфлади ва шу билан бирга ҳеч кимни сотмади. “Монца” А серия тажрибасига эга нисбатан ёш футболчиларга таяниб, 2021 йилда деярли А серияга чиқди, улар учинчи ўринни эгаллашди, аммо ўтиш баҳсида “Читтаделле”га ютқазиб қўйишди. Якунига етган мавсумнинг кўп қисмида клуб бешинчи ўринда борди ва якунда тўғридан- тўғри йўлланмани қўлдан бой берди. Жамоа плей-офф босқичидан ўтиши лозим эди. Ярим финалда “Брешия”, финалда эса “Пиза” мағлуб этилди. 2020 йил Галлиани: “Монца А серияда “Милан”га қарши?, катта орзуларимдан бири, бу ҳақида бир неча мавсумдан сўнг гаплашамиз”. Галлианининг орзуси рўёбга чиқди, “Монца” клуби келаси мавсум албатта А серияда ўйнайди. Лекин бу ҳали якун эмас. Берлусконининг орзулари янада каттароқ “Монца” хўжайини шундай дейди: “Мен ғалаба қозонишга ўрганиб қолганман, шу сабабли биз энди А сериядамиз, Скудеттони ютиб, Европа Чемпионлар Лигасига йўл олишимиз ва ғалаба қозонишимиз керак!”
“Монца” мисолида жиддий инвестициялар ва тажрибали инсонлар ҳатто кичик жамоани ҳам орзуга етаклаши мумкинлигининг гувоҳи бўлдик. La Republica нашрининг ёзишича, Берлускони деярли 4 йил давомида “Монца” учун 71 миллион евро сарфлаган. Албатта, А серияда ва ҳатто Чемпионлар Лигасида муваффақият қозониш учун кўпроқ сармоя керак. Клуб раҳбари эса бунга тайёрдек кўринмоқда.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
