Ҳаммамизга маълумки, Фарғонанинг "Нефтчи" жамоасини неча йиллардан бери Юрий Саркисян бошқариб келмоқда. Юрий Вазгенович ўз жамоасида тартиб-интизомни биринчи ўринга қўядиган, қаттиққўл мураббийлардан бири саналади. Лекин сўнгги вақтларда "Нефтчи" футболчилари "тарбиясизлик" кўрсатиб келишмоқда.
Узоққа бормайлик. ОФК Кубоги учрашувларидан бирида фарғоналиклар Иорданиянинг "Ал Виҳдат" жамоаси билан беллашиб, мағлуб бўлади. Ушбу учрашув якунлангач эса, Иқбол Акрамов ўз жамоадоши Павел Смоляченконинг бошига уради. Футболчи нима учун бундай қилганлиги бизга қоронғу. Лекин Акрамовнинг ҳаракати туфайли футболимизда ана шундай ҳолатлар учраб туришини Осиёга кўз-кўз қилдик. Ўша учрашувда жамоани Сергей Лебедов бошқарган эди. Саркисяннинг тоби йўқлиги учун сафарга чиқмаганди. Айнан шунинг учун жамоада интизом яхши эмас, деб ўйлаган эдик.
Якунда адашибмиз. Куни кеча барчамиз Косонсойдаги ўйингоҳда навбатдаги "водий дербиси"ни гувоҳига айландик. "Навбаҳор" ҳамда "Нефтчи" ўртасида кечган учрашувнинг ҳакам томонидан қўшиб берилган дақиқаларида Иқбол Акрамов яна саҳнага чиқди. Биринчи навбатда, учрашув бош ҳаками - Владислав Цейтлиннинг ўйин тизгинини қўлдан чиқариб юбориши натижасида хунук ҳолат юзага келди.
"Навбаҳор" таркибида ўзгариш бўлиши керак эди. Қўқонлик мезбонлар футболчиси Собир Ҳамидов ўз ўрнини Жаъфар Ирисметовга бўшатиб беришга чоғланаётганда Иқбол Акарамов Ҳамидовнинг майдонни тезроқ тарк этиши учун орқасидан туртки берди. Бу ҳолат Ҳамидовнинг ўзига ҳам ёқмади. Шу онда Ҳамидовнинг йўлига посбон Денис Романенко тўғаноқ чиқиб, футболчини майдонни тарк этмасликка ундади. Шундан сўнг ҳаммаси бошланди. "Навбаҳор" мураббийи Александр Клименко ва "Нефтчи" футболчиси Иқбол Акрамовнинг ўзаро даҳанаки жанги оқибатида Акрамов майдондан четлатилди.
Ён ҳакам А.Цапенко эса фарғоналик футболчилардан дакки эшитгани етмагандек, калтак ҳам еди. Иқбол Акрамов ҳамда Мансур Саидовлар қанот ҳакамининг оёғига тепганлигини барча кўрди. Шунингдек, Цапенко Юрий Саркисяндан ҳам "ширин" сўзларни эшитиб олди. Шу онда Цапенко ичида: "Ўзимни қанотимда юравермайманми-я", деган бўлса керак.
Чунки биринчи бўлимда А.Цапенко чап қанотда "патруль" хизматида эди. Иккинчи бўлимда эса ўз ҳамкасби билан жой алмашди. Аслида ушбу дербининг яна бир қанот ҳаками Ҳолмат Мирзааҳмедов бўлиши лозим эди. Аммо Мирзааҳмедовнинг тоби қочганлиги боис учрашувда иштирок этолмади. Сўнгра наманганлик Аъзам Ражаббоевга қанот ишониб топширилди. Айтиш керакки, биринчи бўлимда Ражаббоевга ҳам Саркисян эътирозлар билдирган эди. Балки шунинг учундир, Цейтлин ён ҳакамларнинг жойини алмаштирган бўлиши мумкин.
Хуллас, учрашув ҳар томонлама дерби номига "муносиб" ўтди. Ўйлаймизки, юқоридаги ҳолатлар юзасидан ПФЛ албатта тегишли чоралар кўради.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
