"Ливерпул"нинг яқин ўтмишида эришган ютуқлари эътирофга лойиқ. Жамоа яна дунёнинг энг яхшиларидан бирига айланди. Юрген Клопп мерсисайдликларни 2015 йилдан бери бошқариб келмоқда. Унинг даврида кучли футболчилар етишиб чиқди. Қуйида Клопп жамоасида юлдузга айланган, жамоани тарк этган ва ҳозирда бундан (балки) афсусланаётган беш футболчи ҳақида гаплашамиз. Демак, бошладик!
Садио Мане
Сенегал терма жамоаси аъзоси мерсисайднинг қизил томонида доимо ардоқланади. Унинг номи "Ливерпуль" тарихига абадий ёзилган. Аммо у ёзда ўзи севган жамоани тарк этди. Энди у "Бавария" футболчиси. Шуни айтиш керакки, айни дамда ҳаммаси Мане ўйлагани каби кетаётгани йўқ. Германияда ўйнаш осон эмас экан. Мане эса янги жамоасида сафида 7 та баҳсда иштирок этиб, атиги 3 та гол уришга улгурди. "Бавария" айни дамда Бундеслига жадвалида 5 ўринни банд этган. Улар лига етакчиси бўлган "Унион Берлин"дан 5 очко, ашаддий рақиби саналган "BVB"дан 3 очкога ортда қолмоқда. Мане эса 6 та ўйиндан бери гол ургани йўқ. Камига "Бавария" сўнгги баҳсда "Аугсбург"га мағлуб бўлди. Мана шундай воқеалардан кейин, балки, Мане "Ливерпул"дан кетганига афсус қилар. Яна ким билади дейсиз.
Такуми Минамино
Минамино "Ливерпул"да ҳеч қачон асосий таркибга кира олмаган. У Клоппга фақатгина лига кубоги каби мусобақаларда керак эди. Бинобарин, япон ҳужумчиси кўпинча жамоаси жонига оро кирган. Аммо бу кўп давом этмади. Минаминонинг сабр косаси тўлди. Шу сабаб у ёзда "Монако"га кўчиб ўтди. Айтиш мумкинки, унинг Францияга сафари кўнгилдагидек кечмаяпти. У кўпинча таркибдан тушиб қолмоқда ёки захирадан майдонга ташланаётир. Шунга қарамай, Такуми охирги турда "Реймс" дарвозасига илк голини киритди.
Дивок Ориги
Бельгия терма жамоаси аъзоси доимо захира варианти бўлганига қарамай, "Энфилд"да қадрланар эди. Чунки Ориги жамоасига керак пайтда ёрдам бериб келган. Аммо у ҳам жамоадан кетди. Ҳозир Ориги "Милан" сафида. Бемалол айтиш мумкинки, италян жамоаси сафида, у Ливерпулдагидек ўрин топа олмади. Жароҳатлар сабаб ҳужумчи 4 тагина баҳсда қатнашди холос. Оригидан эса кўп нарса кутилганди. Балки у ҳам "Ливерпул"ни қумсай бошлагандир.
Филипе Коутиньо
Бразилияликнинг мерсисайдликлар сафидан кетиши, фақат ўзига зарар келтирди. Аммо "Ливерпуль" учун Коутиньо трансферидан тушган 142 миллион фунтлик фойда, жуда муҳим саналган. Айнан шу пуллар эвазига Клопп жамоаси, муваффақиятли трансферлар билан кучая бошлаганди. Коутиньо 2018 йилнинг январида "Барселона"га йўл олади. Ўша мавсумнинг сўнгига қадар эса англайдики, у катта хатога йўл қўйган. "Барселона"да омади кулмаган ярим ҳимоячи "Бавария" сафида ижарада ҳаракат қилди. Кейинчалик эса, шу ёзда "Астон Вилла"га сотиб юборилди. У ўтган мавсумнинг ярмини ҳам бирмингемликлар сафида ўтказган эди. Коутиньога, шунчаки, ачиниш мумкин...
Эмре Жан
Немис футболчиси 20 ёшида "Ливерпул"га олиб келинади. Жан у ерда таянча ярим ҳимояси, марказий ҳимоя ва қанот каби бир нечта вазифаларни бажара оладиган футболчи бўлиб шаклланди. Орадан кўп вақт ўтмай, Клопп Жанга ишонишдан тўхтаб қолди. Бу вақт оралиғида у жароҳатларга кўп йўлиққанди. Шу сабаб "Ливерпуль" 2018 йилда уни "Ювентус"га сотиб юборади. Айни дамда эса Эмре Жан ўз юртида, Германияда тўп тепмоқда. У "Боруссия Дортмунд" шарафини ҳимоя қилади. Аммо бир нарса аниқ, Жан "Ливерпул"дан кейин ҳеч қачон ҳақиқий ўсишга эриша олмаган.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
