"Арсенал" бош мураббийи Микель Артета мавсумни омадли бошлаган эди. Шу сабабдан бу юришни давом эттиришни истайди. Бунинг учун эса у январь ойида, ҳеч бўлмаганда иккита йирик харидни амалга оширишни режа қилган. Клуб эгаси Стэн Кронке бу ҳаракатни қўллаб-қувватлайди. Йирик тадбиркор ўз клубига янги трансферлар учун маблағ ажратишга тайёр эканини билдирган. Артета ёзда 130 миллион фунт эвазига Габриэл Жезус, Олександр Зинченко, Фабиу Виейра, Мэтт Тёрнер ҳамда Маркиньосни харид қилганди.
"Арсенал"нинг кўпчилик мухлислари жамоасини ҳали ҳам чемпионлик курашида қатнашаяпти деб ҳисобламайди. Боз устига, жамоа сўнгги турда "Саутгемптон"га имкониятни бой берди ва энг яқин таъқибчиси бўлган "Манчестер Сити"ни ўзига анча яқинлаштириб қўйди. Аммо мавсумнинг тўртдан бир қисми ортда қолган бир пайтда, "Арсенал"нинг ҳали ҳам етакчилик қилаётгани, кўпчиликда жамоанинг чемпионликка бўлган даъвоси ҳақида таассурот уйғонишига сабаб бўлди.
Айни пайтда Микель Артета АПЛ баҳсларида асосан 15 та футболчиси хизматларидан фойдаланмоқда. Аммо бу етарли бўлмаслиги аниқ. Жамоа таркибни янада кучайтиришга муҳтож.
"Арсенал" ёзда "Астон Вилла" ярим ҳимоячиси Дуглас Луисга таклиф юборган эди. Аммо бу ҳаракат иш бермаган. Луис ҳозир бирмингемликлар билан янги, узоқ муддатлик битим тузиб олди. Шу сабаб Лондонликлар ўз эътиборини бошқа томонга қаратишга қарор қилди. Эндиликда, "тўпчилар" Бразилиядан яна бир футболчи харид қилиши мумкин. "Палмейрас" ярим ҳимоячиси Данило "Арсенал" учун яхши танлов бўлади. 21 ёшли футболчи учун Лондон клуби 22 миллион фунтдан воз кечишга тайёр экани айтилади. Бироқ, "Палмейрас"да Данилони сотиш борасида ҳеч қандай режа мавжуд эмас. "Арсенал" ҳам анойиларданмас. Ҳадемай Бразилияда мавсум якунланади. Дам олишда эса инглиз клуби 26 миллионгача нархни ошириб, Данилони ўз таркибига қўшиб олиш варианти ҳам ишлаб чиққан.
"Арсенал"нинг нишонидаги яна бир номлардан бири бу Донецкнинг "Шахтёр" клуби футболчиси Михаил Мудрикдир. Украиналик ёш талант январь ойида АПЛга келса, ажабланмаслик керак. Агар бу иш ҳам ўхшамаса, у ҳолда "Вильярреал" иқтидори Ереми Пино ҳам мавжуд. Испаниялик ёш ҳужумчи 25 миллион фунт атрофида бўлиши айтилган. Кузатамиз, "Арсенал" қишда қай бир режасини амалга оширишга муваффақ бўларкин. Ҳархолда, жамоада ҳали ҳам АПЛ чемпиони бўлишга ўта қулай имконият мавжуд.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
