“Локомотив” ва “Олмалиқ” жамоалари иккинчи даврани яхши бошлаб, ҳали мағлубиятга учрамаган эди. Иккала клуб ҳам юқори ўринни эгаллаб, келаси қитъа миқёсидаги мусобақаларда иштирок этишни мақсад қилишган. Шунинг учун ҳам “Локо” ва “Олмалиқ”қа ҳам ғалаба сув ва ҳаводек зарур эди.
Учрашув соат 17:00да бошланди. Кун анча иссиқ бўлишига қарамай, ўйиннинг дастлабки 10 дақиқаси ичида рақиблар кетма-кет бир неча марта ҳужумлар ташкил қилишга муваффақ бўлишди. Айниқса, “Олмалиқ” ярим ҳимоячиси Зоҳир Пиримов дарвозабон билан бирга-бир вазиятда дарвозани ишғол қила олмади. У Павел Бугалонинг бўш бурчагига тўни йўллади, аммо зарба бироз ноаниқ чиқди. Яна бир вазиятда эса Бугалони дарвоза устуни голдан сақлаб қолди. Олмалиқликлар тўпни олис масофадан йўллашганди.
Ўйиннинг 19-дақиқаси келиб, Александр Шадрин ўнг қанотдан ҳужумга қўшилди ва тўпни жарима майдончасига етказиб берди. Садриддин Абдуллаев эса 14 метрлар масофадан чап оёқ билан дарвозани аниқ нишонга олди. Голдан 2 дақиқа ўтар-ўтмас майдон эгалари бурчак тўпи тепиш ҳуқуқини қўлга киритишди. Зайниддин Тожиев бош билан дарвозани ишғол қилаётган пайтда олмалиқлик ҳимоячилар унга халал беришмаётганди. 2:0!
Ҳавонинг иссиқлигини инобатга олиб, биринчи бўлим ўрталарида Равшан Эрматов футболчиларга 1 дақиқа нафас ростлаш ва томоқ хўллаб олиш имконини берди.
34-дақиқада мезбонлар гол уриш учун 100 фоизлик имкониятни қўлдан чиқаришди. Акмал Холматов чап қанотдан жарима майдончасига кириб борди ва ҳимоячини чалғитган ҳолда тўпни шерикларига чиройли тарзда етказиб борди. Дарвозабон қаршисида Зайниддин Тожиев ва Дилшод Жабборов қолишди. Зайниддин ўзи зарба бериши мумкин бўлган ҳолатда тўпни Дилшодга қолдирди. Жабборовнинг яқин масофадан берган зарбасини эса Павел Харчик ўз реакциясини намойиш қилиб, тўпни майдон ташқарисига чиқариб юборди.
Иккинчи бўлим бошида меҳмонлар жарима майдончасининг ўнг бурчаги ёнидан жарима зарбасини тепиш имконини қўлга киритишди. Достон Абдураҳмонов томонидан айлантирилган тўп эса Бугало қўриқлаётган дарвозанинг тўсин ва устунлари кесишган жойига текканча, дарвоза тўрига тушди — 2:1.
“Локомотив” ҳам ўзининг навбатдаги голини стандарт вазиятдан сўнг киритди. Акмал Холматов ўнг қанот бурчакка яқин жойдан белгиланган жарима тўпни жарима майдончасига етказиб берди. Бўйи унчалик баланд бўлмаган Садриддин Абдуллаев бош билан дарвозани ишғол қилди ва ўйиндаги иккинчи голини нишонлади — 3:1.
Зайниддин Тожиев ҳам иккинчи голни киритиши мумкин эди. Аммо тажрибали футболчи Харчик билан юзма-юз ҳолатда уни доғда қолдира олмади. Навбатдаги бирга-бир вазиятда эса Тожиев ўзи зарба беришдан кўра, Оганесянга узатма беришга қарор қилди. Жора эса тўпни дарвоза устидан ўтказиб юборди.
Куни кеча Ўзбекистон миллий терма жамоаси сафида Иорданияга қарши ўйинда ҳаракат қилган Олег Зотеев иккинчи бўлимда “Олмалиқ” сафида пайдо бўлди ва жамоасининг ўйинини кучайтира олди. Олег аслида чап қанот ярим ҳимоячиси бўлса-да, тез-тез ҳужумчилар ортида пайдо бўла бошлади. Мезбон ҳимоячилари ундан пас кутишган пайтда жарима майдончасига кириб борди ва дарвозанинг бурчагини аниқ нишонга олди — 3:2.
Садриддин Абдуллаев “хет-трик”ка эришиши мумкин эди, агар унинг 2о метрлардан йўллаган зарбаси бироз чапроққа йўналтирилганида — тўп дарвоза устунига тегиб қайтди.
Жамоалар очиқ ўйинга киришиб кетишди. “Олмалиқ” ҳаттоки ҳисобни тенглаштиришга ҳам муваффақ бўлди. Достон Абдураҳмонов томонидан йўлланган зарбани Бугало қайтарган бўлса-да, аммо уни ушлаб қола олмади. Унга биринчи бўлиб етиб келиб, ҳисобни тенглаштирган футболчи эса ҳакам томонидан ўйиндан ташқари ҳолатда деб топилди.
Жора Оганесян рақиб дарвозабонининг “совға”сидан фойдалана олмади! Харчик ўз ҳимоячиларидан тўпни қабул қилди ва тўпни майдоннинг иккинчи қисмига етказиб беришни мақсад қилиб, кутилмаганда, уни ўз олдида турган Оганесянга топшириб қўйди. Арманистонлик футболчи дарҳол тўпни дарвозабоннинг устида ошириш ўрнига уни алдашга киришди ва дарвоза томон йўлланган тўпни ёрдамга етиб келган ҳимоячи бартараф этди. Орадан кўп ўтмасдан Жора яккама-якка вазиятда гол ура олмади.
“Локомотив” томонидан киритилган гол ҳам бош билан киритилди. Бурчакдан етказиб берилган тўпни ҳужумга ёрдамга келган Ислом Иномов дарвозанинг бўш қолган қисмига йўллади — 4:2.
Умуман олганда, ўйин ҳаддан ташқари очиқ бўлди ва шу боис ҳам хавфли вазиятлар жуда ҳам кўп яратилди. Шулардан 6тасида эса тўп дарвозаларга бориб тушди.
Олий лига. 16-тур
“ЛОКОМОТИВ” – “ОЛМАЛИҚ” – 4:2 (2:0)
Голлар: Садриддин Абдуллаев (19, 54), Зайниддин Тожиев (21), Ислом Иномов (84) — Достон Абдураҳмонов (50), Олег Зотеев (72)
Огоҳлантиришлар: Темур Айзатулов (38), Баҳром Йўлдошев (41),
“Локомотив”: Павел Бугало, Ислом Иномов, Ислом Тўхтахўжаев, Рустам Аъзамов, Шерзод Шарипов, Садриддин Абдуллаев, Максим Казанков, Акмал Холматов, Дилшод Жабборов, Александр Шадрин (Жора Оганесян 53), Зайниддин Тожиев (Артурас Фоменко 66).
“Олмалиқ”: Павел Харчик, Темур Айзатулов, Баҳром Йўлдошев, Дарко Станоевич, Евгений Гоголь (Сирож Ҳамроев 42, Олег Зотеев 58), Достон Абдураҳмонов, Санжар Шоаҳмедов, Носир Отақўзиев, Зоҳир Пиримов (Фаррух Муродов 46), Александр Лупашко, Исроил Эргашев.
Ҳакамлар: Р.Эрматов, А.Расулов, В.Лушин
2012 йил 17 август. Тошкент. “Локомотив”. 1000 томошабин.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
