Жорий йилнинг 5 май куни Саудия Арабистонида старт оладиган 17 ёшли футболчилар ўртасидаги Осиё чемпионати ТВ-трансляцияси қисқартирилган форматда амалга оширилади. Бу ҳақда Алишер Никимбаев хабар тарқатди.
"Ўқувчилардан бири U-17 Осиё кубоги ўйинлари ОФК томонидан трансляция қилинмаслиги ҳақидаги хабар ростми, деб сўрамоқда.
Ҳа, бу маълумот тўғри, аммо тўлиқ эмас. Телетрансляциялар режалаштирилган, лекин фақат чорак финал босқичидан бошлаб. Гуруҳ босқичи ўйинларини эса (ваъда қилинганидек) ОФКнинг YouTube канали орқали томоша қилиш мумкин бўлади.
Яна бир жиҳат шундаки, трансляциялар анча соддалаштирилган форматда — фақат битта камера орқали амалга оширилиши режалаштирилган.
Айтиш керакки, худди шундай талабни ФИФА ҳам 2025 йилдан бошлаб U-17 Жаҳон чемпионати трансляциялари учун қўйган эди. Бироқ ўтган йил Қатарда бўлиб ўтган турнир ташкилий қўмитаси камида 9 та камера билан трансляция ташкил қилишга қарор қилган. Энг кўпи билан эса 16 та камера ишлатилган. Харажатлар ўртасидаги фарқни ташкилий қўмита ўз ҳисобидан қоплаган.
Кўринишидан, Саудия Арабистонида ОФК учун битта камера етарли деб ҳисобланган ва шу форматда қолдирилган", — дейилади "Футболиум" телеграм-канали тарқатган хабарда.
Маълумот ўрнида. Ўзбекистон U17 терма жамоаси мусобақанинг "D" гуруҳида иштирок этади. КХДР куни кеча турнирда иштирок этмаслигини маълум қилгач, бизнинг гуруҳда фақат 3 та жамоа қолди — Ўзбекистон, Австралия ва Ҳиндистон. Жамоамиз гуруҳдаги илк баҳсини 10 май куни Австралияга қарши ўтказади.
Матнда хатолик топсангиз, ўша хатони белгилаб, бизга жўнатинг (Ctrl + Enter).