Юрген Клопп «Ливерпул»нинг АПЛ 21-туридан ўрин олган «Челси»га қарши уй учрашувида мураббийлик фаолиятидаги катта юбилейни нишонлади - 1000-ўйин!
Айтишга осон рақам, аммо еврофутболда, яна асосан катта клублар бошқарувида бу маррага етишнинг ўзи бўлмайди. Ҳа, Клоппнинг шундай катта ўйини «Ливерпуль» учун яхши даврга тўғри келмади, қолаверса, донгдор рақиб ҳам қандайдир тушунарсиз ҳолатда ҳозир. Лекин бу германиялик мутахассиснинг «юмалоқ» натижасига соя сололмайди асло. Sports.ru сайти ҳам шу ҳақиқатдан кўз юммади ва Opta таҳлил гуруҳи маълумотлари асосида 1000та ўйин қандай юзага келганини кўриб чиқди.
***
Гапни совринлардан бошлаш керак, албатта. Демак, Юрген Клоппнинг 1000та ўйини аввало, 13та соврин демакдир. Бошқача айтганда, германиялик мутахассис ўртача ҳисобда ҳар 83та ўйин учун 1та турнирда ғолибликни расмийлаштирган.
Бош мураббий мақомида 2001 йили иш бошлаган Юрген Клопп 1000та ўйинда 1854 очко таъминлаган. Ғалабаларнинг жами ўйинларга нисбати - 53,8 фоиз. Ўртача маҳсулдорлик эса 1,9та голга тенг.
***
Юрген Клопп 1000та ўйин маррасига атиги 3та клуб бошқарувида етишгани билан алоҳида мақтаниши мумкин. Яъни у замонавий футболда энг барқарор фаолият олиб бораётган мураббийлардан биридир. 1000та ўйинида энг катта улуш ҳозирги клуби - «Ливерпул»га тегишли.
***
Германиялик мутахассиснинг 340та ўйинида Бундеслига белгиси бор. Умуман, Клопп 1000та ўйин маррасигача нақ 13та турнир кўрди. Агар мураббий АПЛда ишлашда давом этса, Бундеслига ўйинлар сони бўйича ҳали 2-ўринга сурилиши ҳам ҳеч гап эмас.
***
Юрген Клопп фаолияти давомида «Манчестер Сити» бош мураббийи Хосеп Гвардиола билан ҳаммадан кўп тўқнаш келган - 27 марта. Бинобарин, испаниялик мутахассис Германияда ҳам ишлаган ва Клопп йўлига тез-тез тушган. Ўзаро «дуэл»да устунлик ҳозирча германиялик томонида: ғалабалар ҳисоби - 11-9. Айтганча, Гвардиолани бошқа бирор мураббий бу қадар кўп мағлубиятга учратмаган. Ўз навбатида, Клопп ҳам бошқа ҳеч ким олдида 9 марта «бош эгмаган».
***
Клопп бошқарувидаги 3та клуб жами 150та рақиб билан тўқнаш келган. Германиялик мутахассиснинг деярли ҳар 30та ўйинидан бири «Бавария»га қарши кечганини алоҳида айтиш жоиз. «Арсенал» ёки «Манчестер Сити»нинг Клопп учун энг «қадрдон» рақиб мақомини олишига ҳали бор.
***
Юрген Клоппнинг 1000-ўйини «Челси»га қарши кечгани айтилди. Умуман, Юрген ўз жамоалари билан «аристократлар»га 20 марта қаршилик кўрсатган бўлса, шундан 2таси юбилей ўйинларга тўғри келган. Яна бир томони, Клопп «юмалоқ» рақамли бирор учрашувда енгилган эмас. Дейлик, «Челси» билан олдинги юбилейи (800-ўйин) Европа суперкубогида кузатилган бўлиб, асосий вақтда кучли томон аниқланмаган ва пенальтилар сериясида «Ливерпуль» устун келганди.
***
Невен Суботич - ҳақиқий машина: у Клопп бошқарувидаги 282та ўйиндан 278тасида бошланғич таркибдан жой олган. Роман Вайденфеллерда эса бу кўрсаткич 100 фоизга тенг: 280тадан 280та! Тўғри, дарвозабон учун оддий ҳолат. Жеймс Милнер аксинча, 302та ўйиндан 189тасини илк дақиқалардан бошлаган, холос. Клопп энг кўп ишонч билдирган футболчи эса - Роберто Фирмино (341та ўйин).
***
Муҳаммад Салоҳ - Юрген Клоппнинг энг яхши тўпурари. Мисрлик ҳужумчи германиялик мутахассис қўл остида ўртача ҳисобда ҳар 138 дақиқада 1та гол урган. Клопп раҳбарлигида 100та гол маррасидан ошган футболчилар сони эса 4 нафар.
СЎЗ
- 1000-ўйин? Бу ақлни шошириб қўядиган рақам. Ливерпулга келганимда соқолимга ҳали оқ тушмаганди. Соқолимнинг оқаргани ёшимга боғлиқми ёки клубдаги ишга - буни билмайман. Билганим шуки, ҳозирча тўхтатишни ўйлаётганим йўқ. Яна 10 йил ишлашга кучим етади, албатта, агар керак бўлсам... Юрген Клопп.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
