Алексис Санчес "Арсенал" тарихидаги энг яхши ҳужумчилардан бири сифатида клуб тарихида из қолдирди. У тўпчилар сафида 166 та ўйин ўтказиб, 80 та голга муаллифлик қилган. Чилилик ҳужумчи 2014 йилнинг ёзида "Барселона"дан Англия пойтахтига кўчишни амалга оширади. Унинг хизматлари учун "Арсенал" каталонияликларга 30 миллион фунт тўлаб берганди. Санчес Лондонга келиши биланоқ ўзининг ижобий таъсирини кўрсатади. Ҳа, у "МЮ"га ўтиб, мухлисларни ранжитгандир. Аммо Санчес билан олиб келинган қолган футболчиларнинг тақдири нима бўлганди? Қуйида шу ҳақида сўз боради.
Хьюго Кето
Финландиялик дарвозабон 2014 йилда, 16 ёшида клубга олиб келинади. Кето, асосан, академия сафида ҳаракат қилганди. 2015-16 йилги мавсумда Кето порлайди ва жамоаси билан ёшлар ўртасидаги Англия кубогига йўл олади. Аммо ёш футболчи асосий таркибга кира олмаган. Кето 2018 йилда "Брайтон"га трансфер қилинади. У ерда ҳам дарвозабонга ишонч билдирилмади. Шу сабаб у 2020 йилнинг ёзида Хелсинкига қайтди. Айни дамда Кето Норвегиянинг "Сандефьорд" клуби шарафини ҳимоя қилмоқда.
Матьё Дебюши
Гарчанд жамоада тўрт йил қолган бўлсада, Дебюши ўта беқарор ўйинлари сабабли асосий таркибга тўла кира олмади. 2014 йилда харид қилинган ҳимоячи, жароҳатлар гирдобида қолади ва ўз ўрнини Эктор Бельеринга бой беради. 2015-16 йилги мавсумда Дебюши фақат икки бор асосий таркибда майдонга тушган холос. Франциялик футболчи 2018 йилнинг қишида жамоадан эркин агент сифатида кетган эди. Ҳимоячи ўша йили "Сент-Этьен" сафига йўл олган. Ҳозирда Дебюши Лига 2 жамоаси бўлмиш "Валансьен" шарафини ҳимоя қилмоқда.
Каллум Чеймберс
2014 йилда "Саутгемптон"дан Чеймберс исмли ҳимоячи сотиб олинади. У марказий ҳимояда ҳам, қанотларда ҳам бирдек яхши ўйнай оларди. Ўша йил охирида Чеймберс, ҳатто, "Олтин бола" совринига ҳам номзод сифатида кўрсатилади. Аммо у, Стоунз ва Коман, Стерлинг томонидан маҳф этилади. Жами, Чеймберс "канонирлар" сафида 122 та ўйинда майдонга тушди. У орада икки мавсумни "Фулхэм" ва "Мидлсбро"да ижара асосида ўтказган. 2022 йилнинг январида, Чеймберс "Астон Вилла"га сотиб юборилади.
Давид Оспина
Оспина 2014 йилги мундиалда Колумбия сафида фантастик ўйин кўрсатганди. Шу сабаб у "Арсенал" назарига тушиб, турнирдан кейин "Ницца"дан харид қилинади. Оспина Щесныйга рақобатчи сифатида олиб келинганди. Польшалик посбон сигарета чекиб, жазога тортилгач, айнан Оспина асосий таркибда доимий кўриниш бера бошлади. У 2015 йилги "Олтин тўп" совринига даъвогар сифатида ҳам кўрсатилади. Қанчалик ғалати бўлмасин, бу ҳақиқат. Оспинанинг зўр даври дарров якунланди. Бир қанча қўпол хатоларидан кейин, Арсен Венгер уни "Наполи"га ижарага бериб юборади ва ўрнига Бернд Ленони олиб келади. Оспина ўша йили ёзда жамоани бутунлай тарк этганди.
Дэнни Уэлбек
Ҳужумчи ўзи ўйнаган жамоаларда мухлисларнинг ёқимтойига айлана олган. У 2014 йилда "МЮ"дан Шимолий Лондонга кўчиб ўтади. Англиялик футболчи "Арсенал" сафида 100 та баҳсда 24 та гол уради. 2015 йилги кубок баҳсида Уэлбек "Манчестер Юнайтед"га гол уриб, турнирдан чиқариб юборган. Аммо унинг ўзи ҳам финалда жароҳат сабабли қатнаша олмаган. Тикланиш жараёнлари чўзилиб кетганлиги сабабли "Арсенал" уни сотишга қарор қилди. 2019 йилда Уэлбек "Уотфорд"га йўл олади. Айни дамда қаҳрамонимиз "Брайтон"да ҳаракат қилмоқда. У собиқ жамоалари билан курашда доимо муаммо туғдира оладиган футболчилар қаторида эътироф этилади.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
