Роберто Фирмино ёзда «Ливерпул»ни тарк этади. 31 ёшли бразилияликнинг шартномаси мавсум охирида тугайди ва томонлар янги шартнома имзолашмайди. «Энфильд» «қизиллар»нинг ҳақиқий афсонасини қолдирмоқчи — «Ливерпул»да саккиз йил давомида ўйнаган Бобби, мухлислари уни шундай аташади, Роберто бундай мақомга тўлиқ лойиқ. Муболағасиз, Садио Мане - Фирмино - Салоҳдан иборат ажойиб ҳужум триоси битта мисрлик билан қоладиган бўлди.
Бразилиялик футболчи «Энфильд»га Юрген Клоппдан бир неча ой олдин етиб келди. Уни немиснинг ўтмишдоши Брендан Рожерс сотиб олган. Бобби ўйнаган «Хоффенхайм» 2015 йилнинг ёзида 41 миллион евро миқдорида катта даромад олди, аммо бу келишув тўлиқ ўзини оқлади. «Ливерпуль» либосида барча мусобақаларда у 353 та ўйин, 107 та гол ва 71 та голли узатмани амалга оширди, аммо Фирминонинг жамоа учун қадрини рақамлар билан ўлчаб бўлмайди.
Айтиш мумкинки, бразилиялик ҳужумчи Европанинг машҳур клубларида ўйнаганлар орасида сўнгги ўн йилликдаги энг паст баҳоланган футболчидир. Албатта, энг кам баҳоланганлардан бири деса ҳам бўлади. Салоҳ ҳақиқий гол машинаси эди, Мане вақти-вақти билан катта саҳнага чиқарди, аммо Фирминосиз буларнинг ҳеч бири содир бўлмасди. Ўзининг энг яхши формасида бўшлиқни мукаммал ҳис қилган Бобби ажойиб футбол заковати билан даҳолигини исботлади. Клопп Фирминони жамоанинг двигатели деб атади.
Ҳозир бу кулгили туюлади, аммо 2015 йилнинг ёзида Роджерс - «қизиллар»нинг ўша пайтдаги хўжайини - Фирминони сотиб олишни чиндан ҳам хоҳламади. Ўшанда «Астон Вилла» вакили бельгиялик Кристиан Бентеке ҳужумни кучайтириш учун идеал вариантдек туюлди. Охир-оқибат, иккаласи ҳам олинди. Бразилиялик футболчи «Энфильд» афсонасига айланди, Бентеке эса «Кристал Пэлас»га йўл олди.
«Шубҳасиз, Бобби фаолиятини якунлагач, одамлар унинг тўққизлик позицияси ҳақида китоблар ёзишади. Мен буни у ихтиро қилган деб айтмаяпман, лекин Боббининг ўйнаш усули ягона», - деганди Клопп ўтган мавсумда «Манчестер Юнайтед»ни мағлуб этганидан кейин (5:0) бразилиялик футболчига қойил қолган ҳолда.
Бу Фирминонинг сўнгги икки йилдаги энг яхши ўйинларидан бири бўлиб, мушаклардаги жароҳатлар билан кечган. У ўтган мавсумда беш хил жароҳат олди ва барча мусобақаларда жами 26 та ўйинни ўтказиб юборди. «Ливерпуль» тўртта соврин учун курашиб, охир-оқибат иккита кубокни қўлга киритган пайтларни бразилиялик футболчи асосан четдан кузатди. Таққослаш учун, 2016 ва 2021 йиллар оралиғида Клоппнинг «Ливерпул»даги дастлабки бешта тўлиқ мавсумида у Премьер-лиганинг 10 та ўйинини ўтказиб юборган эди холос. Сентябрь ойида клуб ва футболчи янги шартнома бўйича музокараларни бошлаб юборди, аммо якунда Фирмино ҳеч нарса имзоламасликка қарор қилди. The Athletic хабарига кўра, ҳужумчи шунчаки муҳитни ўзгартириш ниятида ва янги синовларни кўрмоқчи.
«Мен унинг қолишини хоҳлайман. Бобби бу ерда нима бўлаётганини ва у ҳақида нима деб ўйлаётганимизни билади. Мавсумнинг биринчи қисмини ажойиб ўтказмадик, бироқ Бобби яхши ўйнаган ягона одам эди. У биз учун жуда муҳим, у қийин вазиятларда асосий бўғин бўлиб беради. Унинг футбол заковати билан биз ўз ўйинимизни қуришда давом этишимиз мумкин», - деди Клопп январь ойида, Фирмино ҳали ҳам янги шартнома имзолашига умид қилиб.
Аммо «Ливерпуль» қайта қуриш босқичига кирмоқда ва ёзда жамоани катта ўзгаришлар кутмоқда - буни ҳеч ким яширмайди. Луис Диас, Дарвин Нуньес ва Коди Гакпо сўнгги бир йил давомида пайдо бўлди. Албатта, Клоппнинг Фирминога айтган барча илтифотлари самимий, лекин янги шароитда у қанча вақт майдонда бўларди ҳам дейсиз (ахир Салоҳ ва Диого Жота ҳам бор-ку)? Жорий мавсумда бразилиялик футболчининг соғлигида алоҳида муаммолар йўқ (21 та ўйин, 16 таси бошланғич таркибда ва 9 та гол), лекин ушбу натижанинг қайтишига кафолат йўқ. Октябрь ойида Бобби 32 ёшга кирди - энди ўзгариш вақти келди, кейин жуда кеч бўлади. Фирмино ҳар доим энг фидойи футболчи бўлган, аммо бу ҳолатда бразилияликни тушуниш мумкин: у захира ўйинчиси бўлишга эмас, балки лойиҳанинг марказида бўлишга лойиқ.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
