Про-лиганинг 3-туридан ўрин олган “Навбаҳор-фарм” – “Динамо” (0:3) учрашувидан сўнг, ОАВ ходимлари мезбонлар мураббийи Каримжон Бозоровдан ўйин ҳақидаги фикрларини сўрашди ва саволлар билан мурожаат қилишди. .
Ўйин ҳақида
— Сўзим аввалида бугунги мағлубият учун мухлислардан узр сўрайман. Ўзингизга маълум, азалдан Намангандаги ўйинларда футболчиларда босим юзага келади. Йигитлар ушбу босимни енга олишмади. Ваҳоланки, учрашувнинг биринчи бўлимида бизда 2-3 та голга тортадиган яққол вазиятлар вужудга келганди. Бироқ омад биздан юз ўгирди. Футбол 90 дақиқадан иборатлигини билардик. Аммо... Меҳмонлар эса тезкор гол уришга муваффақ бўлишди. Бу режаларимизга ўзгартириш киритиб юборди. Йигитлар қўлдан келганича ҳаракат қилишди.
Иккинчи бўлимда ўйинни кучайтириш мақсадида, захирадан майдонга туширилган футболчилар ўйинга киришиб кета олишмади. Қўпол хатодан сўнг, ўз дарвозамиздан иккинчи тўпни ўтказиб юбордик ва мазкур гол йигитларга руҳан таъсир қилди.
Энди бу хатолар устида ишлаб, улардан хулоса чиқариб, кейинги баҳсларда мухлисларни хурсанд қилишга интиламиз.
— Тан олиш керак, “Динамо” таркиб ва тажриба борасида кучли. Бу борада нима дея оласиз?
— Фарм жамоамизнинг мақсади, ёш футболчиларни тарбиялаб, тажрибаларини ошириш. Про лиганинг ҳам кучли эканлигини “Динамо”нинг таркибига назар ташлаб билса бўлади. Самарқандликлар таркибидан тажрибали футболчилар ўрин олишган. Шундай бўлсада, йигитлар кучли рақибга муносиб қаршилик кўрсатишга интилишди. Аммо биздан омад юз ўгирди. Яна қайтараман, футбол 90 дақиқа ўйналади.
— Жамоа бош мураббийи Рашид Ғофуровнинг захира ўриндиғидан жой олмаганлиги ҳам ўйинга ўз таъсирини ўтказдими?
— Албатта, ўтказди. Барибир бош мураббийнинг ўрни бошқа. Рашид Ғофуровнинг дисквалификацияси муддати якунланди ва кейинги учрашувда у захира ўриндиғидан жой олади.
— Футболчиларни алиштиришда Рашид Ғофуров билан маслаҳатлашдингизми?
— Албатта, маслаҳатлашдим. Захирадан майдонга туширилганлар ҳам маҳоратли футболчилар ҳисобланишади. Бироқ, таъкидлаганимдек, улар ўйинга киришиб кета олишмади ҳамда ўз имкониятларидан етарлича фойдалана олишмади.
Бу футболнинг бир бўлаги ҳисобланади ва энди кейинги баҳсларда бундай хатоларни такрорламасликка ҳаракат қиламиз.
— “Навбаҳор-фарм” Про-лига дебютанти ҳисобланади ва ушбу лига ўйинларига бирданига киришиб кетиш осон эмас. Илк турлардаги натижалардан фожиа ясамаслик керак. Шундай бўлсада, футболчиларни руҳий тушкунликдан қандай олиб чиқмоқчисизлар?
— Ўйинларни таҳлил қилиб, йигитларни кейинги баҳсларга руҳлантиришга интиламиз. Ҳозирча бизга гол етишмаяпти. Худо хоҳласа, кейинги ўйинларда голлар ҳисоби очилса, ҳаммаси яхши бўлади ҳамда мухлисларни ўз ғалабаларимиз билан хурсанд этишга ҳаракат қиламиз.
“Навбаҳор” ПФК матбуот хизмати.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
